Pago Pago, AMERICAN SAMOA — Na tatala le sauniga mamalu o le Aso Fa’apitoa mo Vetereni uma o vaega au a le Malo o Amerika na faia i le latou lotoa i Tafuna i le fetalaiga a le Tootoo Malemo Tausaga, sui Failautusi o Mataupu Tau Samoa, e fa’afeiloa’ia le mamalu lasi sa pa’au i maota aua lea fa’amoemoe i le taeao o le aso Gafua na te’a nei.

Peita’i o lana fa’apa’i malu mai, ina ia saunia le mamalu na aofia, i le sauniga fa’apitoa e si’i ai le fa’afetai i le Atua, aua o ia ua mafua ai ona to’ai taunu’u fa’amoemoega uma. O le faitauga fa’apitoa o le Poloa’iga Fa’alaua’itele a le afioga le Kovana Sili Lolo Moliga, e taualoa ai lea aso malolo, Novema 11, 2019 mo fitafita tuai o vaega au uma a le Iunaite Setete o Amerika.

O le faitauga fa’aperetania na fofogaina lea e le tama’ita’i CW2 Ret. Punipuao Naiuli Sivas, ae o le faitauga fa’aSamoa sa fofogaina lea e MSgt Ret. Foleni Esekielu.

Ona tu’u lea o le avanoa mo le sauniga lotu sa si’itia fa’apitoa e le susuga le Tiakono Malaki Timu. O ia lea sa ia toe fa’amanatu mai, “O mea uma ua fa’amaite mai lona amataga ona o le tautua matavela ma le tautua toto a le fitafita sa tautua ma le fa’amaoni, ina ia tu’ulima mai le saogalemu ma le aia tatau a le Tusitala, O ia fo’i sa punou ma tautua e tau mo le saolotoga o tagata lautele e palota ai ae le o se mea na fofoa mai i se galuega e se sui fa’apolokiki o galue i faigamalo. O le Fitafita foi na ia fa’amautu mai le sa’olotoga o tatou o ola ai nei, e mau fa’ata’ita’i i le sa’olotoga na faia e Iesu mo le fanau a tagata i lenei lalolagi ia maua le Ola e fa’avavau. Le Alii e, ua fa’afetai!”

Ina ua maea le tatalo na si’itia ona soso’o lea ma le lauga a le afioga Kovana Lolo Moliga, ma sa ia fa’ailoa ai lona agaga fa’afetai i fitafita uma lava o lo’o tau mau fanua mamao, “O lo’o tautua nisi e puipui mai o tatou tagata nai fa’aletonu fa’aterarisi, o le taua fita aua ua le toe so’ona gaoioi ae ua mautinoa ua ogaoga mea totino ua fa’aleagaina ma le anoanoa’i o le soifua ua maumau ai.”

“O le tautua a Fitafita ua fa’amautu ai le Sa’olotoga ma o le ioimata lea o Faigamalo Fa’atemokalasi, ia mautu le sa’olotoga!” Fa’afetai mo la outou tautua, tama fanau uma a Amerika Samoa o loo tautua i le vaega au, fa’afetai mo lo outou sao, ua fa’amautinoa ai le nofo filemu fa’avaomalo, ua fa’afiafiaina ai soo se lotoifale i malo eseese o le lalolagi ae maise ai lava i eleele ma ogasami o le Iunaite Setete o Amerika. E me’eme’e o matou loto, o matua ma aiga, o nu’u ma afio’aga fa’apea Samoa na lua, aua ua i ai se sao o Amerika Samoa ma Samoa i le taua mo le sa’olotoga ma le nofo lelei o le lalolagi.”

“E i ai nisi o i tatou e le’i tautua i le vaega au, peita’i o tatou aiga, ua tofusia ma fitafita o taua, e mafai ona e fa’aalu sina taimi, fa’atalofa ia i latou ma fa’afetaia lo latou sao i le tausiga o le filemu ma le sa’olotoga o tatou o sapi a’i i lenei vaitau.”

“Pe afai fo’i ua afe i fanua la outou tautua, e mana’omia ona fa’aauau pea ona outou puipuia o tatou aiga, ekalesia ma afio’aga fa’apea itumalo i so outou sao. O a uma metotia sa outou a’otau ai e maua ai le nofolelei o uso ma aiga, ia outou fa’ata’ita’i mai ia i matou uma, o so outou toe sao lea i o tatou aiga ma le malo.”

 O i’umaea ia o le saunoaga matagofie a le Kovana Sili e fa’ai’u ai tima’iga o le taeao, ae se’i sisi a’e fu’a ta’itasi o le Malo Amerika, malo fa’ateritoti o Amerika Samoa, ma vaega ta’itasi o le Vaega au, e afua mai le USArmy, USMarines, US Navy, USAir Force; US Coast Guard ma le POW & MIA [Fitafita o lo’o Fa’apagotaina i atunuu Mamao ma Fitafita e le’i maua lava o latou tino, talu ona malaga atu e tau].

Mo le Agiagia a le Malo tele sa sisi a’e lea e SFC [Ret] Nikolao Fe’a & SC Kent Santos Porquez USA.  Mo le Fu’a a le Malo o Amerika Samoa sa sisi a’e lea e SFC [Ret] Auvai Leutele ma SFC Shaun F. Salanoa.

O le sisiga o fu’a mo le fa’aaloalo i fitafita tuai uma o lo’o soifua pea, le vasega o fitafita o lo’o tiute, ae maise le vasega o fitafita fa’aagaaga uma a le vaega au, na sisi a’e ai le fu’a a le USArmy e SFC [Ret] Iuni Maeva ma Sgt Daniel Saufo’i. O le Fu’a a le USMarine Corp sa sisi a’e e SSgt Jesse Mong ma Sgt Taga’imamao Masaniai. O le fua a le USNavy sa sisia a’e e CPO [Ret] Robert Toelupe ma CTO2  Salote Aoelua T. Malala. O le fu’a a le Fuava’alele po’o le USAir Force na sisia a’e e Sgt Ethan Lake ma Sgt Paulava T. Malala. O le fu’a a le US Coast Guard na sisia a’e e Lieutenant Ryan Junod ma MSTl Clarence Rivera. O le toe fu’a o le POW & MIA e lanu uliuli na sisia a’e e MMI [Ret] Ioasa Pese ma SPC Filipina Nelda Petelo.

Na fa’apitoa lava le pese sa sisi a’e ai lea fu’a lanu uliuli e fa’ailo ai, o le leiloa i atunuu ese ona o le tautua matavela a fitafita o taua, o le masa’a lava lea o le toto i nu’u mamao ona o le tautuaina o le filemu o aiga, malo ma atunu’u e pele. O le vi’iga o le Lota Nu’u na ou fanau ai, sa usuina malie mo le fa’aaloalo ia i latou ua maumau le soifua, ona o le faiva i tafa o taua, a’o nopia’i i le tautua tuavae ma le tautua toto mo le saogalemu o ona tagata, laufanua ma tuaoi o le gataifale o le Iunaite Setete o Amerika.

Na toe fa’amae’a le sauniga i le tatalo na si’itia e lana susuga le Tiakono Katoliko Malaki Timu.