Ads by Google Ads by Google

Falepuipui Ivale mo le 20 masina ina ua faamaonia moliaga faaoolima


[ata: foa'i]
ausage@samoanews.com

E 20 masina le lea ua fa’asala ai e le Fa’amasinoga Maualuga le susuga a Sosaia Ivale e taofia ai i le toese i Tafuna, ina ua fa’amaonia e le fa’amasinoga le moliaga o le faaoolima i le tulaga lua sa tu’uaia ai o ia e le malo.

 

O le fa’asalaga fa’a falepuipui ua tu’uina atu ia Ivale, o se tasi lea o tuutuuga o lana nofovaavaaia e 5 tausaga na tu’uina atu e le fa’amasinoga i le vaiaso na te’a nei. O le ali’i loia fautua lagolago ia Rob McNeill na tula’i mo Ivale, ae o le tama’ita’i loia sili lagolago ia Laura Garvey na tula’i mo malo.

 

Na ulua’i tu’uaia e le malo ia Ivale i le moliaga mamafa o le faaoolima i le tulaga lua, faapea ai ma le moliaga mama o le tu fua i le fanua o le isi aiga. Ae i lalo o le maliliega na sainia e le ua molia ma le malo, na ia malie ai e tali ioe i le moliaga mamafa o le faaoolima i le tulaga lua.

 

I le tali ioe ai o Ivale i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 19 o Setema 2017, na ia fa’aaoga ai se mele’i o’a popo e fa’aoo ai manu’a i se ali’i la te tuaoi, e ala i lona sasa fa’alua o lona ulu ma lona tau’au ma manu’a tigaina ai o ia.

 

I le talia ai e le fa’amasinoga o le maliliega a Ivale ma le malo, na solofua ai loa e le fa’amasinoga moliaga na totoe ai i le pepa o le tagi na fa’aulu e le malo.

 

Na taua e le itu a le malo i tuutuuga o le maliliega e fa’apea, o le fa’alavelave lenei na mafua mai ina ua poloka e le ta’avale a le ali’i na a’afia le auala e aga’i atu i le fale a Ivale. Na taua e le malo e fa’apea, a o le i tula’i mai le fa’alavelave e pei ona manu’a ai le susuga a Eletise Fuimaono, sa i ai se isi fa’alavelave na tula’i mai i le 4 aso talu ai i le va lava o Ivale ma Fuimaono, e mafua mai i le fanua o lo o nofo ai Ivale i Pava’ia’i.

 

Na taua e le malo e fa’apea, o le vevesi lea na tula’i mai i le fanua i Pava’ia’i, na faaoolima ai Fuimaono i le atali’i o Ivale e ala i lona tu’iina o lona gutu ma manu’a mitimiti ai le atali’i o Ivale.

 

E tula’i mai le fa’alavelave lea o lo o taimi lea o lo o malaga ai Ivale i Samoa. Ina ua toe fo’i mai i le atunu’u, sa fa’ailoa atu ai loa e lona to’alua ma lana fanau le vevesi na tula’i mai i le fanua.

 

E lei leva ona taunu’u Ivale i le latou fale i le afiafi o le aso 19 o Setema, ae vaaia loa le sosolo atu o le ta’avale a Fuimaono ma paka fa’alava i le auala e aga’i atu ai i tua i le latou fale. Na aga’i atu le ta’avale a le Faifeau a Ivale e fia alu i tua i le fale a le ua molia, peita’i na faigata ona sao ona sa poloka e le pikiapu a Fuimaono.

 

O le ita tele o Ivale i le faalavelave lea na fasi ai e Fuimaono lona atali’i ao ia malaga ai i Apia, na ia savali atu ai loa ma lafo ana upu mamafa i le atali’i o Fuimaono na alu atu i le ta’avale. Na alu le atali’i o Fuimaono ma ta’u i lona Tama tala a Ivale, ma masau mai ai loa Fuimaono ma amata le la taugaupu ma Ivale.

 

Na taua e le malo e fa’apea, na fai fai tetele le tauga upu i le va o ali’i nei e to’alua, ma vaaia ai loa le savali ese o Fuimaono ma toe fo’i atu i lona fale. O le ita tele o Ivale na ua mulimuli atu ai i tua o Fuimaono ma aga’i atu ai lava seia oo i le fale o Fuimaono.

 

Na se’i e Ivale le mele’i sa tu i tafatafa o le umukuka a Fuimaono ma faaoolima ai loa ia te ia.

 

O le matuia tele o manu’a na a’afia ai le ulu o Fuimaono, na mafua ai ona taofia o ia i le falema’i i Fagaalu i le afiafi lava lea, ma moomia ai filo e 13 e toe tapuni ai le manu’a tuga na a’afia ai lona ulu.

 

Ina ua maua le avanoa o le ua molia mai le fa’amasinoga, sa ia fa’atoese ai e tusa o lana solitulafono sa faia. Na taua e Ivale i lana faatoesega e fa’apea, o le mea sese sa ia faia ua ia aoaoina mai ai se lesona taua mo lona olaga.

 

Na talosaga Ivale i le fa’amasinoga mo se avanoa e toe fo’i atu ai i lona aiga se’i tausi lona to’alua ma lana fanau, ma saili sana galuega e totogi ai se salatupe e tuuina atu e le fa’amasinoga ia te ia.

 

Na faatoese fo’i Ivale i le susuga a Fuimaono ma ia taua ai e fa’apea, e oo mai loa oti na te le toe solia se tulafono.

 

Na tutu fa’atasi loia a itu e lua e finau i le fa’amasinoga mo se fa’asalaga faanofovaavaaia mo Ivale, e aofia ai le faatonu o ia na te tuliina masina e 13 lea ua oo mai i le taimi nei ua mae’a ona ia tuliina i le toese.

 

Na taua e McNeill e fa’apea, afai e talia e le fa’amasinoga le talosaga mo se fa’asalaga faanofovaavaaia, na te talosagaina le fa’amasinoga ina ia aua ne’i faia se poloaiga e toe faafo’i ai le ua molia i lona atunu’u, a ia fa’aauau pea ona nofovaavaaia o ia.

 

E 5 tausaga na manatu le fa’amasinoga e faasala ai Ivale i le falepuipui, atoa ai ma lona totogiina o le salatupe e $1,000, peita’i ua faamalumalu e le fa’amasinoga le tuliina o le fa’asalaga fa’a falepuipui, ae ua faatonuina o ia na te tuliina masina e 20 i le toese, ae aofia ai ma le umi e silia ma le 13 masina lea ua mae’a ona ia tuliina i le toese.

 

Ua fautuaina e le fa’amasinoga le ua molia e totogi lana salatupe i totonu o le 5 tausaga o lana nofovaavaaia.

 

A mae’a ona tuli lana fa’asalaga fa’a falepuipui, ua fautuaina e le fa’amasinoga le ua molia na te tuua loa le teritori ae toe fo’i atu i lona atunu’u na malaga mai ai, ma aumau ai mo le taimi atoa o lana nofovaavaaia.

 

Peita’i, ua faamalumalu e le fa’amasinoga le fa’ataunuuina o le poloaiga e tuua ai e le ua molia le teritori, fuafua lava i lona usitaia o tuutuuga uma o lana nofovaavaaia. Ua fa’atonuina fo’i o ia e aua ne’i ona toe taumafai e fa’afesoota’i Fuimaono ma lona aiga i soo se auala, ma ia tausi fo’i le filemu i le latou tuaoi.