Ads by Google Ads by Google

Fa’amaonia moliaga fa’asaga i se ali’i sa avea ma Leoleo Sinia

ausage@samoanews.com

Ua faamaonia e le Fa’amasinoga Fa’aitumalo le moliaga o le fa’aoolima i le tulaga tolu sa tu’uaia ai e le malo se ali’i sa avea ma Leoleo Sinia a le malo.

 

O le aso Faraile na te’a nei na toe valaau ai i luma o le afioga i le ali’i Fa’amasino ia Fiti Sunia le mataupu a le susuga a Siaosi Aiono. Ina ua valaau lana mataupu, na fa’ailoa e le loia a le malo ia Christy Dunn le mae’a lea ona sainia e itu e lua se maliliega e fa’amuta ai lenei mataupu. O le susuga i le ali’i loia tua ia Marcellus T. Uiagalelei o lo o tula’i mo Aiono.

 

I le tali ioe ai o le susuga Aiono i le moliaga mama o le faaoolima i le tulaga tolu i lalo o se maliliega sa latou sainia ma le malo i le aso Faraile na te’a nei, na ia ta’utino ai loa i luma o le Fa’amasinoga e fa’apea, i se taimi o le masina o Aperila o le tausaga nei, sa ia pa’i atu ai i le tino o se tama’ita’i Leoleo sa la galulue fa’atasi i le Ofisa o Leoleo i Tafuna.

 

Ina ua fesiligia e Sunia ia Aiono e fa’amatala le fa’alavelave sa tula’i mai, na taua ai e le ua molia e fa’apea, i se taimi o le masina o Aperila o le tausaga nei, sa ia pa’i atu ai i le tino o le tama’ita’i Leoleo na a’afia. Sa ia taua atili e fa’apea, sa ia iloaina lava e le talafeagai lana gaioiga sa faia.

 

Na fa’atoese Aiono i le malo e tusa ai o lana solitulafono sa faia, atoa ai ma le tama’ita’i Leoleo na a’afia ma lona aiga.

 

O ni isi o tuutuuga o le maliliega i le va o le ua molia ma le itu a le malo, o le aua lea ne’i toe i ai se fesootaiga i le va o Aiono ma le tama’ita’i Leoleo na a’afia, atoa ai ma le talosaga a le malo ina ia fa’asala le ua molia i se fa’asalaga fa’anofovaavaaia e 12 masina.

 

O le solitulafono o le faaoolima i le tulaga tolu, e mafai ona fa’asala ai se tasi i le toese mo le umi e le silia i le 15 aso, pe fa’asala i le salatupe e le silia i le $300, poo le fa’asala fo’i i fa’asalaga uma ia e lua.

 

I le mae’a ai ona talia e le afioga i le ali’i Fa’amasino ia Sunia o le tali ioe a Aiono, na ia talosagaina ai loa le Ofisa Fa’anofovaavaaia, mo se ripoti e fesoasoani ai i se fa’aiuga a le fa’amasinoga mo lenei mataupu.

 

E pei ona taua soo e Sunia e fa’apea, e le mana’omia e le fa’amasinoga se ripoti mai le Ofisa Faanofovaavaaia i soo se taimi e tuuina atu ai e le fa’amasinoga ana faaiuga i soo se tagata e ta’usala i solitulafono mama, se’i vagana lava o ni mataupu e ogaoga, ona fa’atoa mana’omia lea e le fa’amasinoga o lea ripoti.

 

O lo o tumau pea tuutuuga o loo tatala ai Aiono i tua, e fa’atali ai le aso 6 Setema lea ua fa’atulaga e lau ai lana fa’asalaga.

 

O le mataupu e pei ona tu’uaia ai Aiono, na alia’e mai ina ua faila e le tama’ita’i Leoleo na a’afia sana tagi i le Ofisa e Suesueina Mataupu Lotoifale a le Ofisa o Leoleo i le masina o Aperila o le tausaga nei.

 

O le mae’a ai o le suesuega na fa’atino e le Ofisa Suesue lea a le Matagaluega o Leoleo, na tuuina atu ai loa le ripoti i le Ofisa o le ali’i Komesina ia Le’i S. Thompson, ma faia ai loa e Le’i le fa’aiuga e fa’amalolo ai Aiono mo le vaiaso atoa e aunoa ma le maua o sona totogi.

 

E to’atele ni isi o Leoleo e aofia ai ma Leoleo sinia e le i fiafia i le fa’aiuga a le Komesina, ma latou fesiligia ai le mafua’aga ua le mafai ai ona molia Aiono i le tulafono.

 

E le i gata ai i le fa’aiuga a le Komesina lenei mataupu, ae na tofu atu i le Ofisa o le Loia Sili, ma tofia ai loa le tama’ita’i loia sili lagolago ia Dunn na te suesueina lenei mataupu.

 

O le mae’a ai o se suesuega sa faia e Dunn, lea na galulue ai ma ni isi o ali’i Leoleo su’esu’e, na faila ai loa e le malo le latou tagi fa’asaga ia Aiono i le masina o Me o le tausaga nei. E faila le tagi a le malo faasaga ia Aiono, ae o le taimi lea ua uma ai ona fa’amavae o ia mai lana galuega fa’a Leoleo.

 

O tagi fa’asaga ia Aiono na alia’e mai i se fa’alavelave na tula’i mai lava i le ofisa o Leoleo i Tafuna, ina ua tago atu o ia i le tama’ita’i leoleo na a’afia ao punou lea tama’ita’i leoleo e aumai sana vaiinu mai totonu o le pusa aisa o lo o i totonu o le ofisa a Aiono.

 

O le te’i o le tama’ita’i leoleo ina ua tago atu le tagata i le pito i tua o ia, na tu sa’o ai i luga ma faliu i tua e vaai poo ai, ae na te’i ina ua fa’asaga atu i tua ae vaaia le taumafai o le ali’i Taitai leoleo e kisi atu i ona laugutu. Na faliu ese le tama’ita’i leoleo ma alu atu ai laugutu o le Ta’ita’i leoleo ma tau i lona alafau.

 

O lo o tu’uaia fo’i le tago atu o le Taitai leoleo i le auvae o le tama’ita’i leoleo, ma taumafai e fa’a fa’asaga atu o ia ae sogi atu i ai, peita’i na tapuni e le tama’ita’i leoleo lona gutu ao taumafai le Ta’ita’i leoleo e sogi atu ia te ia e fa’aaoga ai lona laulaufaiva.