Ads by Google Ads by Google

Fa’amaonia e le Fono ia Michael White avea ma Loia Fautua Lautele

ausage@samoanews.com

Ua aloaia nei le avea o le susuga i le ali’i loia ia Michael White ma Loia Fautua mo tagata lautele o le atunu’u, ina ua fa’amaonia e le Fono Faitulafono lona suafa i le vaiaso nei, i le mae’a ai lea o se iloiloga sa fa’atautaia e maota e lua e fesiligia ai ona agava’a mo le galuega.

 

E 13-1 i le palota na tau fai pasia ai e afioga i Senatoa ma afioga i Faipule le suafa o White i le aso Tofi o le vaiaso ua te’a.

 

O le vaiaso na te’a nei na tuuina atu ai e le afioga i le ali’i Kovana ia Lolo Matalasi Moliga sana tusi i le Fono Faitulafono, e fa’alauiloa aloaia ai lona filifilia o White e avea ma Loia Fautua mo tagata lautele, e sui tulaga i le ali’i loia ia Douglas Fiaui sa ia tauaveina lea tofiga, lea na fa’amavae i le masina o Me o le tausaga nei.

 

I lana tusi i le Fono na taua ai e Lolo e fa’apea, o White ua silia i le 32 tausaga talu ona avea o ia ma loia, ma ua silia fo’i ma le 7 tausaga talu ona galue o ia o se loia fautua lagolago i Amerika Samoa nei.

 

O le tausaga e 1981 na fa’auu mai ai o ia i le Iunivesite a Georgia Southern University, sosoo ai ma le fa’auu mai o ia i le Woodrow College of Law i le tausaga e 1985. O tausaga e 7 ua tuana’i atu, sa galue ai White o se loia fautua lagolago i Amerika Samoa nei. I tua atu, sa galue ai o ia o se loia fautua mo le aai o Atlanta i Georgia mo tausaga e 6, ma ia fautuaina ai le faitau selau ma selau o tagata sa molia i solitulafono eseese. Sa galue o ia i lana lava ofisa loia tua, ae le’i avea ma loia fautua i Atlanta.

 

“Ua ou filifilia White e avea ma loia fautua mo tagata lautele i Amerika Samoa nei, ina ua ou talitonuina atoatoa ona agava’a i lenei galuega, atoa ai ma lona tomai i le fa’atinoina o le galuega,” o se vaega lea o le tusi a Lolo i le Fono Faitulafono

 

ILOILOGA A LE SEANTE

 

E le i atoa se 15 minute le umi o le iloiloga a White sa fa’ataunuuina i luma o le Komiti o Tulafono a le Senate i le aso Tofi na te’a nei ae mae’a. O le iloiloga sa taitaia lea e le afioga i le ali’i Senatoa ia Magalei Logovi’i o le sui ta’ita’i komiti.

 

Ina ua fesiligia White e afioga i Senatoa, na taua ai e le ali’i loia lona fiafia tele ina ua tofia o ia e le ali’i kovana na te tauaveina lenei tofiga taua.

 

Na faailoa e White i afioga i Senatoa e fa’apea, e tele naua lu’itau o lo o fetaia’i ma le ofisa o le Loia Fautua mo tagata lautele i le taimi nei, e le gata e le o lava ni loia e fa’atinoina le galuega, ae le o lava fo’i le tupe fa’asoasoa, o tagata faigaluega, faapea ai ma mea uma e mana’omia i le fa’atinoina o le galuega.

 

Ina ua fesiligia le ali’i loia i tulaga o mataupu o lo o tauaveina e le latou ofisa i luma o le fa’amasinoga, na taua ai e White e fa’apea, o le mataupu pito sili lava ona mata’utia sa tauaveina e le latou ofisa, o le mataupu fa’asaga i le ali’i lea na molia i le tagatavaleina o se ali’i leoleo i le tausaga e 2010.

 

I lea mataupu e pei ona taua e White i luma o le Senate, sa finau malosi ai le malo ina ia fa’asala lea ali’i i le fa’asalaga o le oti, peita’i i le mae’a ai o feutanaiga e tele sa faia e le latou ofisa ma le itu a le malo, atoa ai ma iloiloga e tele sa fa’atinoina i luma o le fa’amasinoga e uiga i lea mataupu, na fa’ai’uina ai loa le fa’asala o lea ali’i i se fa’asalaga soloatoa.

 

Na fa’afetaia e afioga i Senatoa le susuga a White e tusa ai o lana auaunaga i le atunuu ma tagata o Amerika Samoa, ma tuuina atu ai fa’amanuiaga mo lana tautua.

 

ILOILOGA A LE MAOTA O SUI

 

O le mae’a ai o le iloiloga a White i luma o le Senate, na fa’ataunuuina ai loa lea o lana iloiloga i luma o le komiti o Fa’amasinoga a le maota o sui, i lalo o le ta’ita’iga a le afioga i le ali’i Faipule ia Gafatasi Afalava o le sui ta’ita’i komiti.

 

I lea iloiloga, sa maua ai avanoa o afioga i Faipule e fesiligia ai le ali’i loia e tusa ai o le auaunaga a lona ofisa mo tagata o le atunu’u.

 

Na taua e White i luma o afioga i Faipule e fa’apea, ua mafua ona oo mai ma galue i Amerika Samoa, ona ua filifilia o ia e le Atua e tautua mo tagatanuu o loo latou manaomia se fesoasoani, aemaise i latou e le lava le tamaoaiga e totogi ai ni loia tua e fautuaina a latou mataupu i luma o le fa’amasinoga.

 

Sa ia faatepa afioga i Faipule i se tasi o mataupu e sili ona matuia sa ia tauaveina, o le mataupu lea fa’asaga i le ali’i na molia i lona tagatavaleina o se ali’i Leoleo i le 2010. I le tausaga e 2011 ao avea o ia ma loia fautua mo lea ali’i, sa ia feagai ai ma se lu’itau mata’utia, ina ua finau le malo e fa’asala lea ali’i i le fa’asalaga o le oti.

 

Ae i le mae’a ai o feutanaiga e tele sa faia ma le malo, na fa’asala ai loa lea ali’i i le fa’asalaga o le solo atoa i le falepuipui.

 

O le ali’i, o Siaumau Siaumau Jr, lea o loo solo atoa i le toese i Tafuna, ina ua fa’amaonia moliaga o le fasioti tagata i le tulaga muamua sa tu’uaia ai o ia, e mafua mai i le fa’alavelave lea na ia tagatavaleina ai le ali’i Leoleo Suesue ia Lt. Det. Lusila Brown i le 2010.

 

O se tasi o mataupu na fesiligia i lea iloiloga, o se taumafaiga lea ina ia toe faia se teuteuga i le tulafono, ina ia taofia ai le to’atele o tagata e taofia i le falepuipui i solitulafono mama. Saunoa Vesi Talalelei Fautanu Jr e fa’apea, o le to’atele o tagata o loo tumu i le toese i le taimi nei, e le tatau ona i ai i latou, ae ua mafua ona i ai i latou i le toese, ona o solitulafono mama ua a’afia ai i latou, ae ana vave faia se toe teuteuga i le tulafono, e pei o le tulafono o le ave ta’avale ae o loo se’i le laisene, atonu e le to’atele ni isi e taofia i le falepuipui.

 

Sa fautuaina fo’i e afioga i Faipule ia White ina ia talosaga i le kovana ma le malo mo se vaega tupe e fesoasoani ai i le fa’agaioiina o lona Ofisa, lea ua matua tele le fa’aletonu i le taimi nei, ona o le le lava o loia atoa ai ma tagata faigaluega.

 

Saunoa Vesi e fa’apea, e tatau lava ona tulaga lelei le tupe fa’asoasoa a le ofisa o le loia fautua, ona o le isi lea ofisa e sili atu lona taua i totonu o le faigamalo.