Pago Pago, AMERIKA SAMOA

E $5 miliona lea ua faaopooopo i le tupe e fausia ai le Maota Fono fou a le atunu’u lea ua faamoemoe e tatala aloaia i le masina o Aokuso o le tausaga fou 2022, ma tula’i mai ai loa i le $16 miliona le tau atoa e fausia ai e le Konekarate a le Paramount Builders le Maota Fono fou a le atunu’u.

Ae o le galuega lea o lo o fausia e Paramount Builders i le taimi nei, e na o Potu Fono lava e lua o loo aofia ai (chambers), ae le o aofia ai Ofisa o Senatoa ma Faipule faapea ai ma le vaega e paka ai ta’avale.

Na faamanino e le Faatonusili o le Matagaluega o Galuega Lautele a le malo i se feiloaiga ma le Senate i le vaiaso na te’a nei, e ese fo’i le tauofoga mo le fausiaina o Ofisa o Senatoa ma Faipule, lea e lata i le $4 miliona lona tau aofa’i.

O lea galuega e le i amataina i le taimi nei, o lo o fa’agasolo tauofoga ma le fa’amoemoe e tatau ona mae’a i le masina o Iuni o le tausaga nei, sosoo ai loa ma le sailia o se konekarate e manumalo i le tauofoga, ma amata ai loa ona fausia le galuega.

O le iloilioga e pei ona valaauina e le Komiti o le Faagaioiga o le Malo a le Senate i le vaiaso na te’a nei, na fesiligia ai le tele o mataupu e faatatau i le galuega o le Maota Fono fou a le atunu’u ua lata i le 2 tausaga talu ona amata, atoa ai ma le tupe na pasia e fausia ai le galuega, pe fia se vaega tupe o totoge.

E $10 miliona le tau na pasia e fausia ai le galuega, peita’i o le galuega faaopoopo mo le toe fausia o le faavae u’amea, e mafua mai ina ua le pasia e le FEMA le ulua’i faavae na fausia i le ulua’i taimi na amata fausia ai le galuega, o le mafua’aga lea o le faaopoopo o le isi $5 miliona i le tau o le galuega.

E $1.2 miliona le tupe na fa’aalu e fausia ai le ulua’i fa’avae, peita’i ina ua tata’e ese ma faaleaoga le ulua’i fa’avae, na suia ai loa i le faavae fou e pei ona i ai nei, lea e silia laititi i le $5 miliona lona tau atoa, ma tula’i mai ai loa le tau atoa o le galuega e fausia ai na o potu fono mo maota e lua i le $16 miliona.

O le Faatonusili o le Pulega o Galuega a le malo ia Faleosina Voigt ma le Pule o le  Paramount Builders ia Papalii Lauli’i na molimau i le iloiloga, lea na ta’ita’ia e le afioga i le ali’i Senatoa ia Togiola T. A Tulafono o le ta’ita’i komiti. E toatele afioga i Senatoa na auai i lea iloiloga.

O le mataupu na ulua’i fesiligia i le iloiloga o le tulaga o le ata o le galuega, pe ua sui le ata o le Maota Fono, poo le ata tuai lea lava na amata mai ai le tauofoga i le 2 tausaga talu ai. I le talitonuga o afioga i Senatoa e tusa ai ma le ata fou lea na faailoa i le masina na te’a nei, ua sui foliga o le ata o le Maota Fono. Na faatusa e Togiola le ata fou, e tai foliga o se “faase’e”.

Na faamanino e Faleosina, e le i suia le ata o le Maota Fono, o le ata tuai lava lea na i ai le taimi o le tauofoga i le 2018, lea lava o lo o faaauau mai ai pea le galuega i le taimi nei. O le molimau fo’i lea a le afioga a Papali’i ina ua fesiligia sona taofi. Sa ia taua e faapea, e leai se suiga o le ata i lona talitonuga, ae afai ua sui e le malo, e le i logoina la o ia i lea suiga.

Saunoa le afioga i le ali’i Seatoa ia Alo Dr. Paul Stevenson e faapea, e lagona lona faanoanoa i le suiga ua tula’i mai. I lona talitonuga, poo a lava tusitusiga e faia i tulaga oa ta, o le faavae o le malo o Amerika Samoa, e tatau ai lava ona atagia mai ai le ola Faa Samoa. I lona taofi, o le ata muamua o le Maota Fono na atagia mai ai tulaga tau i le olaga Faa Samoa, peita’i o le ata fou lea ua faalauiloa mai i le taimi nei, ua tau se’e ese.

Sa ia talosaga i molimau ina ia silasila toto’a i le tulaga o le galuega, ona o lo o maimoa mai le atunu’u ma tu’u fesili i suiga o le galuega. Sa ia fautuaina fo’i ie Papalii ma Faleosina e fau faalelei le Maota Fono, e fia galulue fo’i afioga i Senate i se Fale Foga Falelua.

Na fesili le afioga i le tamaitai Senatoa ia Fonoti Tafaifa Aufata i le tau sa’o lava na amata mai ai le tauofoga. I lona taofi, e i ai le tagata o molimau o lo o pepelo i lana faamolimau i luma o le Fono Faitulafono.

Na faamanino e Faleosina e faapea, e $12 miliona le tau o le tauofoga a le Paramount Builders ae $20 miliona le tauofoga a le Fletcher Constructions. O le konekarate a le Paramount Builders na manumalo i le maualalo o lana ofo ma tuuina atu ai loa le galuega latou te fausia. O le galuega e tusa ai ma le tauofoga, e na o maota fono lava e 2 ma le vaega e paka ai ta’avale.

Ae ina ua mae’a ona toe iloilio e le malo tuutuuga uma o le tauofoga, na manatu ai loa e aveese mai le fausiaina o vaega e paka ai ta’avale e fausia e le Ofisa o Galuega a le malo, ma faaitiitia ai loa le tau o le galuega mai le $12 miliona i le $10 miliona e pei ona i ai. Ae talu ai le suiga o le faavae o le galuega, lea na faaopoopo ai loa le $5 miliona ma sui ai loa le aofa’i o le tau atoa o le galuega i le $16 miliona.

O le tupe e faatino ai le fausiaina o le galuega e pei ona faatino e le Paramount Builders i le taimi nei, e aumai lea i le $19 miliona na maua mai i tupe o le Pone, e pei ona taua e le sui o le Ofisa o le Paketi i luma o le Komiti a le Senate. O lea vaega tupe ua mae’a ona tu’u ese faapitoa ma le faamoemoe e fausia ai le Maota Fono.

O le tupe e $48,000 lea o lo o taua o loo totoe, na faamanino e sui o le Ofisa o le Paketi, o le tupe lena na totoe mai i le faasoasoanina o le tupe mo le totogi o le galuega, e le o i ai se galuega ua filifilia e fausia ai.

Saunoa le afioga i le ali’i Senatoa ia Uti Petelo e faapea, o lona popolega o lo o i ai, ina ne’i faaopoopo pea mea nei o ‘change order’ i le faagasoloina o le galuega, ona emo ane loa lea o le ata ua le $16 miliona le tau o le galuega ae ua oo atu i le $100 miliona.

Na fesili Uti i molimau e faailoa sa’o atu i le Komiti, poo i ai nisi ‘change order’ i le lumana’i e toe faatino i le galuega lea ua amataina nei. Na faamanino e Faleosina ma Papali’i i le Komiti a le Senate, e le toe i ai lava isi suiga e faia i le galuega, a o lea o le a faagasolo loa le galuega seia oo lava ina mae’a.

A o faagasolo le iloiloga atoa ai ma le taliina o fesili a afioga i Senatoa, na saunoa le afioga i le alii Senatoa ia Malaepule S. Moilga ma ia faatula’i le mau e fa’aagafua loa molimau ae tu’u atu i latou e faatino a latou galuega. Na faapupula atili e Malaepule e faapea, e tatau i le Fono ona ave le faatuatuaga i le faigamalo fou faatoa tula’i mai, latou te faatinoina le galuega mo le fausia o le Maota Fono fou a le atunu’u.

Na lagolago e afioga i Senatoa ia Faiivae Iuli Godinet ma le afioga i le Senatoa ia Soliai T. Fuimaono le mau na faatula’i e Malaepule ina ia fa’aagafua molimau. Saunoa Faiivae e faapea, e maualuga lona talitonuga e le o tapena le malo e fausia se Maota Fono faaletonu mo le atunu’u, ae o se Maota Fono e tua i ai le vaega o le Fono.

E le i talia e le Taitai Komiti ia Togiola le mau.

Saunoa Togiola e faapea, na mafua ona valaau le iloiloga, sei mafai e sui o le malo ma le konekarate ona faamanino le tulaga o le galuega i le taimi nei, atoa ai ma le tulaga o le tupe o lo o totoe i le galuega. E le i taofia le iloilioga ae na faaauau pea.

I le toe faaauauina ai o le iloiloga, na fautuaina ai loa e afioga i Senatoa susuga i molimau ina ia silasila toto’a i le faatinoina o le galuega o le Maota Fono, ina ia lelei ma matagofie. 

Sa fautuaina fo’i e Senatoa molimau, afai e faigata ona tau toe saili se isi konekarate fou latou te fausia le vaega lona lua o le galuega mo ofisa o Senatoa ma Faipule, e sili pe a taoto atu loa lea galuega e fa’atino e le Paramount Builders.