Na toe fa’amalosi le ali’i kovana ia Lolo Matalasi Moliga i Fa’atonusili uma o lana Kapeneta i le fonotaga i le aso Faraile o le vaiaso na te’a nei, ina ia tautuana le fa’atinoina o a latou tiute e fa’atino ma le fa’amaoni, ae aua le tu’u tia’iina galuega e fa’atino e le aufaigaluega.

O lea fautuaga mai le ali’i kovana, na afua mai ina ua ia taua ni isi o fa’aletonu o loo maitauina i totonu o le malo i le taimi nei, e pei o le mataupu i ‘TA’ mo malaga i fafo, faapea ai le tu’u tia’i o le fuafuaina o paketi ma isi galuega tau tupe a matagaluega i tagata faigaluega, ae aunoa ma le silasila toto’a i ai o le Fa’atonusili.

“E i ai lo’u talitonuga e to’atele naua Fa’atonu latou te le o iloaina le fa’afitauli o loo tula’i mai i ‘TA’ a outou matagaluega o loo avatu i luga o le ofisa o le kovana ma toe fa’afo’i mai, ona e le o talafeagai fa’amatalaga o loo tusia atu ai i totonu,” o le saunoaga lea a Lolo sa tuuina atu i le kapeneta.

O ni isi o ia fa’afitauli o lo o tula’i mai i TA a ofisa, e tiga lava ona mae’a le aso o le fonotaga o loo faia i fafo ae fa’aauau pea le umi o aso e nofo ai le tagata i fafo, ma alu ai lava tupe a le malo, ae o isi TA ua aofia atu ai ma le totogi o le fonotaga atoa e lata i le $5,000.

Saunoa Lolo e fa’apea, e foliga mai o le fa’afitauli ua i mautaina, e i ai Fa’atonusili e na o le saini lava o lona aao i luga o le TA e aunoa ma lona faitauina o fa’aupuga o loo tusia ai.

 “O le tele o TA e tai 30 aso o lena ua toe fa’afo’i uma atu i a outou ofisa e le o taliaina, e le o sa’o na ituaiga TA o loo aumai e lau aufaigaluega mo fonotaga i fafo, tusa lava pe fa’apea o tupe mai le feterale lea e fa’atupe ai fonotaga o loo faia i fafo, aua ne’i galo ia te outou o fa’atonusili, o tupe lotoifale lea e totogi ai pasese tou te malaga ai,” o le saunoaga lea a le ali’i kovana.

Na fautuaina e Lolo ia Fa’atonusili, seiloga lava o ni fonotaga taua e usuia i fafo ona fa’atoa malaga lea o se isi o le ofisa e auai, ae afai lava o ni fonotaga masani, ia fa’aaoga fesootaiga fa’aonopo nei e saili mai ai fa’amaumauga e mana’omia.

E ese mai i fa’aletonu i TA e pei ona saunoa le ali’i kovana, o le isi fa’afitauli tele o lo o fetaia’i pea ma le malo i le taimi nei, o le fa’aletonu lea o le tulaga i le ‘system’ o lo o fa’aaoga e feso’ota’i ai fa’amaumauga a Ofisa uma o le malo.

O le mea moni e pei ona saunoa le ali’i kovana, e le o mafai lava ona sa’o fa’amaumauga a le malo i tulaga o itula livi atoa ai ma isi faamaumauga o loo teu i totonu o le ‘system’, o le isi lea auala e ala ai ona mafua fa’aletonu ma tetele ai tupe e totogi atu i isi tagata faigaluega.

I le tulaga vaivai ma le fa’aletonu o loo i ai le tamaoaiga o le malo i le taimi nei, ua fautuaina ai e Lolo ia fa’atonusili e aua le tuu tia’iina galuega e fa’atino e a latou aufaigaluega.

“Outou Faatonusili, o lou tiute o le fa’asa’osa’o uma o mea o loo fa’aletonu i totonu o lou ofisa, silasila toto’a i soo se faamaumauga tou te sainia ao le’i tuuina atu e fa’aaoga ma aloaia, o lou tiute lena, o lau matafaioi fo’i ina ia mautinoa e manuia ai le malo ma le atunu’u,” o le isi lea saunoaga a le ali’i kovana.