Taeao manuia i lou alafa’i mai i fanuga lelei o lenei aso fou i le alofa ma le agalelei o le Atua Soifua, e ao ai ona o tatou fa’apea ifo, “Le Atua e, o Oe o lo matou malosi’aga ma lo matou maluapapa, ia tumau atu pea i Lau Afio le vi’iga ma le fa’ane’etaga e fa’avavau, fa’avavau lava, Amene.”

Na muta mai la tatou tala, ina ua fai nei le talanoaga a le ali’i foma’i manu o Dan Dalgard mai le kamupani a le Hazelton Washington ma le ali’i foma’i fa’apitoa a le Ami o C.J. Peters. O lea ua fa’ailoa i ai e Dan, le ma’i ua maua ai le ali’i o Milton. Na i ai le manatu o C.J. Peters, sa le tatau ona ave Milton i le falema’i, ona e to’atele tagata o lo’o i ai, ae tatau ona avane i le nofoaga a le Ami ua ta’ua o le Slammer.

Fai mai, na ona uma lava o talanoaga a Dan Dalgard ma C.J. Peters, liliu ane loa Peters ma alu loa le vala’au i le ali’i foma’i o Joe McCormick, o le C.D.C i Atlanta. Afai na e tulituliloaina la tatou tala lenei, ona e manatu ai lea, o le ali’i o Joseph McCormick, o le alii’i pule sinia lea i totonu o le C.D.C i Atlanta. Na taumafai nei C.J. Peters e tauanau le ali’i o Joe McCormick, ina ia avatu le ali’i o Milton i le nofoaga a le Ami, e va’ai ai, ma sa le tatau ona ave i le falema’i tua, ona e tumutumu ai tagata.

E ui lava ina taumafai atu le ali’i o C.J. Peters, ae sa le i taliaina e le ali’i foma’i o Joe McCormick, o lo’o finau mai fo’i le ali’i e tu’u pea Milton i totonu o le falema’i o Fairfax. Fai mai le fa’amatalaga, na toe fa’ailoa mulimuli ane lava e le ali’i o C.J. Peters i a Joe McCormick, le tulaga e ono o’o i ai, pe afai ua a’afia le ali’i o Milton i le virusi o le Ebola.

Na toe fa’amanatu nei e C.J. Peters i a McCormick le tulaga e o’o i ai, pe afai o lona manatu lea, ma sa toe fa’ailoa i ai e Peters e fa’apea, “Ua lelei McCormik, e te talitonu i le isi itu, ae ou te talitonu fo’i i isi itu, ae ia e manatua lelei le mea e ono o’o i ai, pe afai, o le a tula’i mai se tulaga fa’aletonu i tagata o lo’o i totonu o le falema’i, ae maise fo’i o foma’i o lo’o galulue ai.”

Fai mai na fiu le ali’i o C.J. Peters e tauanau atu, ae le i fa’alogo i ai le ali’i foma’i o Joseph McCormick, ona o lo’o i ai le manatu o le ali’i foma’i o McCormick, sa fa’afeagai o ia ma le virusi o le Ebola i Aferika i se taimi ua fano. Na nofonofo fa’atasi ma tagata na a’afia i le virusi, na momoe fa’atasi ma tagata ua a’afia i le virusi o le Ebola i totonu o Aferika. Na ia togafitia fo’i tagata ua na o le pau’u ifo ma ua piliki fa’asolo atoa mai le toto. O manatu ia na a’e i le ali’i o Joe McCormick, ma e le i malolo ai lona manatu ina ia tu’u pea Milton i le falema’i o Fairfax mo ona togafitiga.

Fai mai e ui ina ‘ese’ese manatu o ali’i foma’i nei, ma e tele isi itu e le tutusa ai o la manatu, ae sa talia e C.J. Peters le manatu o Joe McCormick. Na toe manatu fo’i C.J. Peters, ma ia talia ma le fa’aaloalo le fa’aiuga e pei ona talanoa ane ai le ali’i foma’i mai C.D.C.

A’o faia talanoaga a C.J.Peters ma Joe McCormick, o le taimi lea, ua paka tonu lava le ta’avale a le T.V mai Uosinitone i luma o le fale o lo’o i ai manuki i Reston. Ua na o le autilo mai nei i fafo o tagata faigaluega, ae ina ua tu’itu’i ane e se ali’i o le fale televise le faitoto’a, e leai se tasi na gaioi e tatala, ona ua uma ona fai i ai le fa’atonuga a Dan Dalgard, ia ‘aua lava ne i ai se tasi e fai sana tala i tagata fa’asalalau.

O le taimi tonu lava lea na sosolo ane ai le ta’avale a le falema’i mai Fairfax e ave Milton mo ona togafitiga, i le falema’i o Fairfax i Uosinitone. Fai mai, ua le fa’atali le ali’i fa’aslalau, ua mata’i lelei le ta’avale lea a le falema’i, ma na iloa ai fo’i e le ali’i fa’asalalau, e moni lava, o le matua’i mea malosi lava le mea lea e tupu i totonu o le fale lenei.

E faia pea…

Fa’aliliu: Akenese Ilalio Zec