Ua fa’aleaoga e le Fa’amasinoga Feterale i le laumua i Uosigitone D.C se tagi sa faia fa’asaga i le Ofisa o le tofa a Faleomavaega Eni ao avea ai o ia ma sui o Amerika Samoa i le Konekeresi, ona o fa’amaumauga ua i luma o le fa’amasinoga e fa’ailoa ai le mae’a lea ona foia lenei mataupu, e ui e le o i ai ni fa’amaumauga e fa’ailoa ai pe na fa’apefea ona foia lenei mataupu.

O le ali’i sa tagi i lenei mataupu, o Victor E. Salazar, o se ali’i sa faigaluega i le Ofisa o Faleomavaega i Uosigitone mo le lua tausaga, seia oo i le taimi na fa’amuta fa’afuase’i ai lana auaunaga i le masina o Novema 2013, lea na ia faila sana tagi i luma o le fa’amasinoga feterale i le aso 30 Oketopa 2014, i ni nai aso ao lumana’i ai le palota tele ia Novema.

O le aso 24 Aperila o le tausaga nei na faila ai e loia o lo o tula’i mo le Maota o Sui o le Konekeresi, se talosaga i le fa’amasinoga feterale e solofua ai le tagi faasaga i le Ofisa o Faleomavaega, ona o ni isi o mafua’aga e aofia ai le leai o se malosiaga o le fa’amasinoga e toe iloilo ai lea mataupu, aemaise ai fo’i o le Ofisa o Faleomavaega ua tapunia.

Ae na taua e le loia a Salazar e faapea o le mataupu i le va o itu e lua ua mae’a ona toe teuteu, o le mafua’aga lena ua talosagaina ai le fa’amasinoga ina ia solofua lenei mataupu.

I faamaumauga a le fa’amasinoga feterale, o lo o taua ai le taliaina e le ali’i fa’amasino o Reggie B. Walton o le talosaga ina ia solofua le tagi e aunoa ma se masalosaloga tatau, lona uiga, ua solofua i le taimi nei ae mafai ona toe faila e le itu tagi lenei mataupu i luma o le fa’amasinoga.

Na pau le fa’amatalaga na tuuina mai e le isi loia sa tula’i a le maota o sui o le Konekeresi ia Joel J. Borovsky, sa ia taua ai le mae’a lea ona soa laupule tulaga uma o le mataupu, ma muta ai lenei mataupu.