O le fa’aiuga o le vaiaso na te’a nei na fa’apaiaina ai le Sa fou a le afioaga o Leone, le “Lady Taema II”, e ala i se sauniga lotu sa molimauina e fa’auluuluga o le afioga, Faifeau o Ekalesia eseese i totonu o le afioaga, fa’apea ai fo’i sui o le malo.

O se taimi lona lua lea ua fausia ai se isi fautasi a le afioaga, talu mai le fautasi sa i ai i le silia i le 50 tausaga talu ai, ina ua fa’aleagaina le latou fautasi sa i ai i le afa o le 1966, e pei ona taua e le tofa Fiu Saelua.

O le sauniga lotu mo le fa’apaiaina o le Sa fou a le afioaga, sa taitaia lea e le afioga a Patele Kolio Eteuale, ae o le taimi o le sauniga fa’apitoa e fa’apaiaina ai le va’a sa tofu sao uma i ai Faifeau i totonu o le afioaga.

O le agaga atoa o le afioga ina ua tutu fa’atasi e fa’apaia le latou sa fou, “tasi i latou uma, tasi le fatu, tasi fo’i le leo”.

Na taua e le afioga a Faiivae Alex Godinet i le taimi o lana saunoaga e fa’apea, o le mataupu i le fausia o se fautasi mo le afioaga, na alia’e mai i le amataga o le tausaga na te’a nei, peita’i sa tula’i mai ai fo’i ma se fesili tele i lona mafaufau, pe o le a le aoga o le fausia o se fautasi fou mo le nu’u.

“O le tali na oso mai i lo’u loto, o le a avea le fausia ma auala e o mai fa’atasi ai ta’ita’i o le nu’u faapea ai ma le aumaga, e tutu fa’atasi i le fausiaina o lenei galuega tele”, o le saunoaga lea a Faiivae, ma tofia ai loa se komiti mai ni isi e i ai le agava’a i totonu o le afioaga, mo le sailia o se tufuga e fausiaina le galuega.

Ina ua mae’a sailiiliga a le komiti mo se tufuga na te fauina le galuega, sa tula’i mai ai loa le suafa o Papu Williams, o ia lea sa fausiaina le fautasi a le afioga o Salelologa, le “Le Tolotolo o Tama Uli”, lea fo’i sa siamupini i ni isi o tu’uga i Samoa.

Na taua e Faiivae e fa’apea, e le i faigofie sailiga a le komiti i le taimi na tu’uina atu ai le galuega latou te fa’atinoina, ae sa latou matua iloilo ma le toto’a mo se tasi e i ai le agava’a fa’apitoa e fa’atino ai le galuega, ae ina ua latou feiloa’i fo’i ma Williams, sa latou tu’uina atu le isi suega lona lua ia te ia, ma talosagaina ai o ia ina ia tusi atu le ata o le va’a sa ia fausiaina, lea fo’i na fa’atinoina e Williams e ala i lona tusia o le ata o le va’a sa ia fausiaina, ma avea ma itu na fa’agae’etia ai le komiti.

Ina ua tuua e Williams le atunu’u ae toe fo’i atu i Samoa, sa fautuaina ai loa e Faiivae le komiti ina ia filifilia loa Williams na te fa’atinoina le galuega, i le mae’a ai lea ona ia molimauina o le ata sa ia tusiaina, lea na tauaao atu e le komiti ia te ia, ae ina ua toe fo’i atu le komiti i Apia e toe feiloa’i ma Williams, o le taimi lea ua amata ai le isi ana galuega fou, o le fausiaina lea o le fautasi mo le afioaga o Pesega.

Na fa’afetaia e Faiivae le susuga Williams e tusa ai o le galuega matagofie sa ia fa’atinoina, aemaise ai o lona talia o le talosaga ina ia toe malaga mai i Amerika Samoa e fa’atino le fausiaina o lea galuega tele.

E le gata i le agaga fa’afetai mo Williams, ae sa fa’afetaia fo’i o ia e Faiivae i lona lagolagoina malosi o sailiga tupe, sa fesoasoani malosi ai i le fausiaina o le fautasi.

O le auala saili tupe na taua e Faiivae, o le “Pepa Ponesi” sa fa’asavali solo i le nu’u, ma maua ai le aofaiga tupe e $25,000 na fesoasoani malosi i le fa’atinoina o lenei galuega taua.

Ae na taua e le tofa Fiu e faapea, i le tausaga e 1964 ina ua malaga mai se au malaga mai Samoa ma tali malo ai Leone, na fa’atau ai loa e le afioga ma le fautasi sa malaga mai ma le au malaga lenei mai Samoa.

O le tausaga e 1965 na filifilia ai le au va’a muamua latou te aloina le va’a, i lalo o le ta’ita’iga a le tofa Fiu Saelua sa ia nofoia le nofoa i na vaitaimi, o ia lea sa kapeteniina le va’a, ae fesoasoani i ai le afioga a Olo Letuli.

O le afa malosi i le 1966 na fa’aleagaina ai le fautasi a le afioaga, ae i le tausaga e 1981, na alia’e ai se finagalo i le afioaga e toe fia fausia se isi fautasi, peita’i o le tali sa tu’uina mai i lena taimi, e leai.

O le tausaga e 1983 na toe tula’i mai ai fo’i le isi finagalo i le afioaga e toe fausia se isi fautasi, peita’i sa tumau pea le tali e leai, ae o le fa’atolu ai lea ona tula’i mai se finagalo o le afioaga e toe fausia sana fautasi, lea fo’i ua talia aloaia e le afioaga.

Na tutulu le tofa Fiu ina ua afea i lana saunoaga ni isi o tulatoa o le afioaga ua tofafa mai Tia Sa ao lea fa’atoa taunu’u le miti ua leva ona lavasi mai ai, e pei o le afioga ia Tuitele ma Faiivae.

O le fautasi o le “The Taema II”, o lo o fausia i le fausaga fou lea ua tele ina fausia ai fautasi i ona po nei, le ituaiga o le ‘fiberglass’, lea fo’i e alo o foe i sipuni, ma, o ituaiga fautasi nei ua maitauina lo latou tauaveina o le siamupini i soo se taimi e fai ai tuuga fatasi, peita’i, o le Sa a le afioaga o Nuuuli lea na siamupini i le tuuga o le fu’a o le tausaga na te’a nei, e le o se fautasi o le ituaiga o le ‘fiberglass’.