Ads by Google Ads by Google

E FIA ‘GHOST EMPLOYEE’ O LO O GALULUE I LE MALO TAIMI NEI?

Talu lava ona tula’i mai le faigamalo a Lolo ma Lemanu, o le fesili lava lea o lo o la taumafai e faamanino, “poo i ai ni tagata faigaluega a le malo e taua o ‘ghost employee’ o lo o totogi e le malo ae le o galulue.

 

O le pine faamau o lo o mafua ai ona tau masalomia e ta’ita’i o lo o i ai ‘ghost employee’ o lo o totogi e le malo ae le o faigaluega, o le eseese lea o le aofa’iga o tagata faigaluega a le malo o lo o mafai ona tuuina mai e le Ofisa o le Tupe atoa ai ma le Ofisa o Tagata Faigaluega a le malo.

 

Na faamanino e le afioga i le kovana sili ia Lolo Matalasi Moliga i le fono a le Kapeneta i le vaiaso na te’a nei e faapea, o lo o la taumafai pea ma Lemanu e faamanino le mataupu o lo o nenefu ai o la mafaufau, “pe fia sa’o le aofa’i o tagata faigaluega a le malo o lo o i ai.”

 

“Fai mai le isi ripoti e 6,000 ma ona tupu, ae fai mai le isi ripoti e 5,000 ma ona tupu, o le ma fesili ma Lemau, e fia sa’o tagata faigaluega a le malo o lo o i ai,?” o le fesili lea a Lolo i sui o le kapeneta.

 

Saunoa foi Lolo, “E tatau i Faatonusili o Matagaluega uma a le malo ona latou iloa pe toafia sa’o le aofa’i o lau aufaigaluega, ina ne’i e nofonofo e te le o silafia ae o lo o alu tupe a lau matagaluega e totogi ai se tagata e le galue i lalo o lau matagaluega.”

 

Na taua e se molimau faatuatuaina i le Samoa News e faapea, o le ripoti a le ‘Transition Team’ a Lolo ma Lemanu lea na tuu faatasia e le komiti faapitoa na tofia e suesue ma iloilo ofisa ma matagaluega uma a le malo, o lo o faavae mai ai le talitonuga maumau tutu a le alii kovana, o lo o i ai tagata o lo o totogi e le malo ae le galulue i ni ofisa o le malo.

 

I le ripoti a le komiti lea sa tuuina atu i le alii kovana, o lo o taua ai ‘ghost employee’ o lo o galulue i ni isi o ofisa o le malo, o lo o totogi i latou i ni totogi maualuluga ae le o i ai ni a latou galuega o faia, poo se isi upu faa faigofie, e nofonofo i le fale ae maua lona totogi.

 

Na alie’e le mataupu i ‘ghost employee’ i le nofoaiga na faatoa mae’a atu nei, na i’u ina tofu atu ai i luma o le komiti Suesue a le Senate (SIC) o le Fono Faitulafono le suesueina o se tasi o ia mataupu, ina ua maua ane o lo o i ai ni alii o lo o totogi e se tasi o matagaluega a le malo ae ese kamupani tua o lo o galulue ai ia aualii.

 

Na taua e le faatonusili o le matagaluega o Tagata Faigaluega a le malo ia Le’i Sonny Thompson i sana tusi i faatonusili o matagaluega uma a le malo i le taeao ananafi, o lo o ia taua ai lona popole tele i le mataupu o le faa faigaluegaina lea o tagata e sui tulaga i isi tagata faigaluega ua malolo, e aunoa ma le uia o ala talafeagai mo le faa faigaluegaina o nei tagata.

 

Ua fautuaina e Lolo faatonusili uma ina ia tuuina atu la latou lagolago i le tofa Le’i, e ala i le tuuina atu o a latou ripoti e faailoa atu ai le aofai o tagata o lo o galulue i a latou matagaluega, i lea auala e mafai ai ona manino tonu le aofai o tagata faigaluega a le malo o lo o i ai, ma taofia ai loa le toe tulai mai o le mataupu i ‘ghost employee’ i totonu o le malo.