I le aotelega o fa’amaumauga sa mafai ona tu’uina mai e le Fa’atonusili o le Matagaluega o Aoga, i luma o le fonotaga sa valaauina e le alii kovana ma le mamalu o le aufai fa’atoaga a le atunu’u i le taeao ananafi, na manino mai ai, “e foliga mai e atamamai atu tagata fai fa’atoaga mai Asia nai lo le aufai fa’atoaga a Amerika Samoa”, e pe ona taua e le susuga a Ifopo Amituana’i, o se tama fai fa’atoaga mai Iliili.

E fa’avae lea talitonuga mai le susuga a Ifopo i le ripoti sa tolaulau e le Fa’atonusili o Aoga ia Vaitinasa Dr. Salu Hunkin Finau, lea na ia taua ai le fiafia tele o tagata fai fa’atoaga mai Asia e toto ituaiga fualaau ‘aina e tigaina toe tele galuega e fai i ai, ae vave na selesele ma taugata lona tau i le polokalame a le ‘school lunch’.

Mo se fa’ata’ita’iga e pei ona saunoa Vaitinasa, o le to’atele o tagata fai fa’atoaga mai Asia ua mae’a ona lesitala a latou fa’atoaga ma kiliva atu i le ‘School Lunch’, e mafuli a latou fa’aeleeleaga i fualaau ‘aina e pei kapisi, kukama, maukegi, pi, Isalaelu, o fualaau ‘aina ia e pito sili ona mana’omia e le School Lunch e kuka ai taumafa a fanau laiti, toe taugata lo latou tau, ae vave fo’i ona selesele, ae o le aufai fa’atoaga a le atunu’u, e mafuli a latou fa’atoaga i taro ma fa’i, o taumafa e tau le mana’omia i le polokalame ae maualalo fo’i le tau o lo o fa’atau ai.

Mai le to’a 194 o le aufai fa’atoaga ua uma ona lesitala i totonu o Amerika Samoa ma maua laisene faipisinisi, o le to’a 40 o i latou nei o tagata fai fa’atoaga mai Asia, e pei ona fa’amaonia e Vaitinasa i se ripoti sa tu’u fa’atasia e lona Ofisa.

“O le uiga o le ripoti lea ua fa’ailoa atu i le aufai fa’atoaga, ua tatau nei loa ona amata toto fualaau ‘aina e so o se fai fa’atoaga, e lelei lena e le umi lava ona toto ae selesele, nai lo le naunau e toto le talo ma le fa’i, e fetaui lava le selesele ane ae o o loa fo’i i le taimi e fa’au’u ai le fanau aoga”, o le isi lea saunoaga a Vaitinasa.

I le tausaga na te’a nei, e $1.5 miliona le tupe na fa’aalu e le polokalame a le school lunch i le aufai fa’atoaga a le atunu’u e fa’atau mai ai taumafa mo le fanau aoga.

“O le taimi lenei ua tatau loa i le aufai fa’atoaga ona amata toto fualaau ‘aina nei nai lo le toto o isi taumafa e umi se taimi fa’atoa selesele”, o le isi lea saunoaga a Vaitinasa.

A fa’atulaga fua o fa’atoaga e pito sili ona taugata ma mana’omia e le polokalame o le school lunch, e numera tasi lava le fa’i pula; sosoo ai le esi pula; kukama; pi; maukegi ona fa’atoa soso’o ai loa lea o le talo ma le fa’i.