Na soifua mai Rev. Dr. Tele’a Ve’a Faleali’i i ona matua o Faleali’i Tele’a Tamaleve’a Maui ma lona tina o Si’igava’a Faga Afo Faleali’i i le aso 25 Iuni, 1937 peita’i, ua tu’ua nei le malo e lana susuga le faife’au malolo EFKAS i le aso 8 Ianuari, 2015.

O ona toe sauniga sa fa’ataunu’uina uma i le Malumalu EFKAS i Matu’u ma Faganeanea, lea na toe taliu mai i ai le faife’au ma le faletua Tepora Faleali’i ma le fanau, ina ua mae’a le la’ua tautua ua penisione mai le EFKAS mai Alofau.

E to’aiva ona uso ma ona tuafafine, e to’alua i la’ua na avea ma faife’au ma ua malolo manumalo uma i la’ua. E to’alua ona tuafafine ua maliliu ae o i si uma o i latou o lo’o soifua pea ma sa molimauina ona toe sauniga i lo latou aiga.

E lua ana fa’aipoipoga na osia i lona soifua galue, sa mua’i mafuta ma le faletua o Itumalo Gaisoa Tela Faleali’i na amatalia le la mafutaga mai ia Iulai 11, 1958 ae tatalaina i le maliu ia Me 9, 2006. Ona toe mafuta lea o le tama ia Tepora Uta’i Faleali’ia e afua mai ia Setema 13, 2006.

E to’a valu le fanau, e to’aono mai le mafutaga muamua ma le to’alua mai lana fa’aipoipoga mulimuli.

I le soifua galue, sa iloga ona tulagavae i mea sa ia tautua ai i le fa’amaoni ma lona filiga ia mae’a ma lelei mea uma, e pei ona molimauina. Na papatisoina i le LMS lea ua fa’aigoaina nei o le EFKAS ia Aokuso 6, 1937. Avea ma totino o le Ekalesia ia Mati 15, 1946. Avea lea ma Ti’akono ia Oketopa 11, 1968 i le fa’ato’a atoa o le 10 tausaga talu ona fa’aipoipo ma Itumalo Gaisoa Faleali’i. E sefulu ma le lua lelei tausaga o avea ma ta’ita’ipese i lana Ekalesia lava, 10 tausaga o avea ma sui o lana ekalesia i le Komiti o le Atina’e, 10 fo’i tausaga o avea ma sui i le Komiti o le Alofa mo Fa’afeagaiga Taulagi.

Na avea ma Faifea’u Faia’oga i Kanana Fou mo le 5 Tausaga, avea lea ma Faife’au Tausi Ekalesia i Alofau mai le 2003 se’ia pa’ia le 2010 ma fa’amalolo manumalo mai ai.

I lona soifua galue i le malo - na avea ma Faia’oga Taitai o le Mataupu -Fa’asaeanisi i le A’oga Samoana High i le tausaga 1964-65. Ona soso’o lea ma le avea ma faia’oga e ala i a’oa’oga i televise mai le tausaga e 1965-1966 ma sa fa’apitoa lana a’oa’oga i le Biologt ma le General Science.

Avea lea ma faipule i le Maota o Sui a le Fono Faitulafono mai le tausaga e 1966 - 1968 mai le Ituau Malosi. Toe se’e lea i le matagaluega o a’oga, ma sa avea loa ma Sui Pule o le A’oga Maualuga i Leone i tausaga lava na avea ai ma faipule 1966-1968.

Taliu lea o ia avea ma pule a’oga i le A’oga Maualuga i le Manu’atele i le tausaga e 1968-70. Soso’o ma le toe avea ma pule a’oga i le a’oga maualuga i Leone 1970-1971, ona se’e mai loa lea avea ma Fa’atonu o A’oga Maualuluga a le malo i le 1973 se’ia o’o i le tausaga 2003.

I le tulaga o aoaoga, na fa’au’u mai le a’oga maualuga a Amerika Samoa i le  1957. Ina ua mae’a fa’aipoipo ma Itumalo sa malaga loa i fafo ma tausailia lona fa’ailoga AA i le Kolisi a Warren Wilson College North Carolina- 1961 na fa’ai’u manuia ai. Sailia lona fa’ailoga BSc i le Iunivesite o Northeast Missouri State University i Kirksville, Missouri ma fa’amanuiaina ai i le tausaga e 1963. Toe sailia ai lava lona tusi pasi M.A ma maua ai lava a’o alaala ma a’oga ai pea i lea Iunivesite i Missouri lava i le tausaga e 1964.

Na toe sailia lona fa’ailoga Ed.D. i le Iunivesite o le Pasefika i Stockton, Kalefonia ma maua i le 1976, i lea taimi a’o faigaluega o ia i le Matagaluega o A’oga o le Fa’atonu o Aoga Maualuluga.

Ina ua tafa lana tofa e ao ina saili i le galuega a le Atua, sa toe tausailia lona fa’ailoga Tipiloma mai Kanana Fou Theological Seminary ma sa maua i le 1996. Ona si’itia lea o ana a’oa’oga i Suva Fiti mo lona fa’ailoga Master of Theology ma maua ai i le  1998.

O lana auaunaga i lona malo ma ona tagata, ae maise o aiga, fa’atasi ai ma lana tautua i le Atua, ua o’oo’o ma ua mae’a lelei, o lana auaunaga fo’i fa’a-Faife’au o le Talalelei, ua mae’a fa’apenisioneina ai, ma sa molimauina e lona faletua na i’u ai lana auaunaga Tepora Uta’i Faleali’i, “Sa ia mana’omia se tasi e malosi na te fa’ai’uina lana auaunaga i lona Atua, ae sa ia ta’utino mai i le amataga, ou te le o toe mana’o i so’u to’alua.”

Peita’i, i molimau sa fa’afofogaina e le mamalu na auai i ona sauniga e tolu, Sauniga i lona Aiga ma ana Uo Mamae, Ulua’i Sauniga i lana Ekalesia ma lona toe sauniga ma lagomau ai, sa tele ina iloga lona amio tamali’i, e le gaoia ma ua talafeagai lelei ma le upu i e latou te ave le fe’au a le Atua.

E fa’amaoni i ona tiute, ma ele fa’atuai ona ia faia ona tiute uma, e le manatu i se mea e le atoatoa, ae faia e ia le mea e gata ai lona iloa ma lona malosi ua i ai mai le Atua. O se tagata saili malo e ala i a’oa’oga ma ona faiva sa galue ai, e tele na’ua ona agava’a i taleni na foa’ina i ai e lona Atua e galue ai.