O le fa’aa’upegaina o fanau aoga ua maua avanoa sikolasipi, e ulufale atu ai e aooga i Amerika e ala i le faailoa i ai o auala e faia ai faaiuga, faaaoga tatau tupe ma le taimi aemaise ai o le sauni ai e ola toatasi na o ia i nofoaga e ese mai i le aiga, o le autu lea o se aoaoga sa faatautaia a le Matagaluega o Tupulaga Talavou, Tina & Tama’ita’i i le Fale Laumei i le aso ananafi.

E lata i le to’a 80 ali’i ma tama’ita’i sa faauu mai i le vasega 12 i aoga maualuluga a le atunuu sa auai i lenei aoaoga e taua o le ‘Graduates Orientation Workshop’, e le gata o i latou ua maua avanoa sikolasipi mai le malo mo aoaoga ma taaloga, ae faapea foi i fanau o lo o totogi e matua a latou aoaoga mo kolisi ma Iunivesite i fafo.

I se faatalatalanoaga ma le Faatonusili tofia o le Matagaluega, le afioga Pa’u Roy T. Ausage, sa ia faamaninoina ai le taua o lenei aoaoga mo fanau faatoa faau’u mai i vasega 12 i Aoga Maualuluga i le atunuu, ma ua sauni e laasia le isi laasaga tau aoaoga i o latou olaga.

Saunoa Pa’u e faapea, o le lona fa lenei o tausaga talu ona amata mai e le matagaluega lenei polokalame, lea na ulua’i amata mai e le Faatonusili sa i ai muamua, le afioga a Leiataua Leauga Turner, ma o lo o galulue faatasi ai ma le matagaluega o aoga a le malo mo le tapenaina lea o fanau aoga ua sauni e ulufale atu i aoaoga i fafo e ala i avanoa sikolasipi.

“O le aoaoga lenei e fesoasoani ai i fanau a’o le’i malaga atu i fafo mo a latou aoaoga, ina ia tapena lelei o latou mafaufau i soo se vaega a’o le’i la’a atu i le isi laasaga o le olaga, e pei o le aoaoina lea o le iloa faaaoga tatau le taimi, iloa faaaoga tatau tupe ua tuuina atu e le malo ma matua mo le aoga, ma ia iloa fo’i le ituaiga olaga e ola ai a’o nofo toatasi ai na o ia i le aoga lea o le a alu i ai,” o le saunoaga lea a le afioga Pa’u.

“O le toatele o fanau o le taimi muamua lea faatoa oo atu ai i Amerika, ma o le a faateia i latou i le ituaiga olaga o lo o ola ai tagata, o tu ma aganuu eseese o le a latou vaaia i lea atunuu, aemaise ai o lagona o le misia mai o aiga i matua ma e pele o lo o i Samoa nei, o le matou galuega la lea o lo o faia, ia aoaoina i latou i soo se auala e mafai ai ona foia tulaga e pei ona faailoa atu, ae taula’i le mafaufau i le aoga ma ia ola fiafia fo’i,” o le isi lea saunoaga a le afioga Pa’u i le Samoa News.

Na faaaoga e le matagaluega ni isi o Matua o Faiva po o ni isi ua i ai le tomai faapitoa i le aoaoina o fanau i mataupu eseese nei, ina ia fesoasoani ai i o latou mafaufau, e pei o le foma’i ia Dr. Faofua Faatafe lea na saunoa e faamanino i fanau auala e tatau ai ona faaaoga tatau le taimi ma tupe ao i ai i le aoga.

“O le taua o le mataupu i le faaaoga tatauina o le taimi ma tupe, ia malamalama le fanau aoga i le faasoasoaina o lona taimi, ia iloa le taimi e fai ai ana meaaoga, iloa le taimi e moe ai, iloa le taimi e taalo ai, iloa foi le taimi e tafao ai ma le uo, aua o le isi ituaiga amio o lo o maitauina i fanau aoga, seiloga lava e oo i le aso e faagata ai le meaaoga (assignment) ona faatoa ave lea i le faiaoga, ae o le taua o le polokalame lenei, ia lava le taimi e tapena ai le meaaoga ina ia aua ai ne’i faalavelave i le taimi mulimuli,” o le isi lea saunoaga a le afioga Pa’u.

O isi Matua o Faiva sa gafa ma le faia o isi aoaoga mo le fanau e aofia ai le susuga Rev. Iasepi Ulu, lea na faapitoa lana saunoaga i auala e faamasani ai fanau aoga i le ituaiga olaga fou lea o le a oo atu i ai; o Maria Tuatoo Salevao na talanoa i ituaiga galuega e tatau ona aga’i i ai fanau aoga mo le sailia o latou lumana’i; o Ethan Lake na saunoa e faamalosi fanau aoga i tulaga o a latou aoaoga, ma le sui faatonusili o le matagaluega, le afioga a Tapumanaia Galu Satele Jr na talanoa i le tatau lea ona faaauau le olaga na tupu a’e ai fanau Samoa i totonu o nuu ma aiga, pe afai ae ulufale atu i aoga i fafo.

Saunoa Pa’u e faapea, ina ua latou maitauina le tulaga manuia o lenei polokalame na amata mai e le afioga a Leitaua, na manatu ai loa le matagaluega ina ia faaauau pea lenei polokalame taua mo fanau aoga.