E to’a 14 tina ma tama’ita’i talavou sa fa’auuina mai i le ulua’i aoga teu ulu i le atunu’u (1st Hairstyling Training), e pei ona fa’ai’uina ai a latou aoaoga mo le 10 vaiaso i se sauniga fa’apitoa ananafi, mo le tauaaoina atu o a latou tusi pasi i lenei polokalame.

O le i’u manuia ai o le polokalame lenei a le Matagaluega o Taupulaga Talavou, Tina & Tama’ita’i, ua tula’i mai ai le soso’o o fa’au’uga a le Matagaluega mo ni isi o matata eseese ua uma ona a’oa’oina ai ni isi o tama ma tina o le atunu’u, e pei o le aoga kuka, aoga su’isu’i, aoga tui teu, atoa ai ma le aoga lenei e a’oa’o ai auala e teu teu fa’amanaia ai le lauao.

O se sauniga pu’upu’u sa fa’atautaia i le potu fono a le matagaluega i le maota o le malo, le EOB i Utulei i le taeao ananafi, sa tauaaoina ai tusi pasi mo i latou uma ua latou ausia aoaoga sa fa’atinoina, e le faiaoga fa’apitoa ia Jonitta Fruean.

Na fa’afetaia e le Fa’atonusili o le Matagaluega ia Jonathan D. Fanene le vasega fa’au’u, ina ua mafai ona latou ausia se tasi o vaega taua i o latou soifua, o le iloa lea fa’atino galuega e pei o le teuteu fa’amatagofie o lauao o isi tagata, ae o se avanoa fo’i e maua ai le tomai e saili ai se isi galuega e tausi ai le aiga, po o le fa’atula’i fo’i o se pisinisi e fesoasoani ai i aiga ma fanau.

Na taua e le tina ia Sinalaulii Leota, o le taua o le aoaoga lenei ua mafai ai ona ia aoaoina auala e teu teu fa’amatagofie ai lona lauao, atoa ai ma lona taumafai e ofo atu lana taleni ua maua e fesoasoani ai i se isi tagata.

Sa ia talosagaina le Matagaluega ina ia saili se isi nofoaga lelei ma mautu e fa’atino ai se isi aoaoga o lo o fuafua mo le lumana’i.

“O le tomai lea ua tatou maua, o le a mafai ai ona tatou aapa atu e fesoasoani i isi tagata, e ala i le faaaoga o le taleni ma le agavaa, e faavae ai se tamai pisinisi e fesoasoani ai i le aiga, ae maua ai le avanoa e faasoa atu ai lou agavaa i lou tuaoi”, o le molimau lea a Leota i lana saunoaga e fa’afetaia ai le Matagaluega ma le tama’ita’i faiaoga sa gafa ma lenei aoaoga.

Saunoa le sui fa’atonusili o le Matagaluega ia Pa’u Roy Ausage e fa’apea, o polokalame fa’aauau nei a le matagaluega, o le a mafai ai ona aapa atu i soo se tasi o le atunu’u o lo o fia maua se isi tomai fa’aopoopo, e fesoasoani ai i lana sailiga mo le lumana’i manuia o lona aiga aemaise o lona lava olaga.