Ads by Google Ads by Google

TEPA I LA TA FAIGAMALO

TALOSAGA SANITOA IA TOE FAALAUTELE AUALA AOLOAU

 

E ui o lea ua molimauina e ni isi o le itumalo o Tualauta i Pavaiai, Mapusaga Fou ma Aoloau tulaga lelei i vaega mo le toe faafouina o le aualatele ae ua latou toe talosagaina le Faatonusili o le Matagaluega o Galuega a le malo e ala i se tusi na tuuina atu i ai e le alii faipule ia Larry Sanitoa, mo se avanoa e faaauau atu ai le faafouina o le auala i luga atu mai le vaega o lo o gata mai ai i le taimi nei.

 

Tasi le atugaluga o le itumalo e pei ona saunoa Sanitoa i lana tusi, o le auala e aga’i atu i Aoloau lea ua gata mai i le vaega tonu o lo o i ai le malae tenisi a Thompson/Jennings i Mapusaga Fou, ae tatau ona faaauau atu pea i luga le faaleleia o le auala, ona o lo o i ai isi vaega o lo o tele ai faaletonu i luga atu o le vaega e le’i oo i ai le galuega.

 

Na faamanino e Sanitoa i lana tusi ia Faleosina Voigt mai i le Ofisa o Galuega Lautele, ni isi o vaega faaletonu o lo o i ai i le auala i Mapusaga Fou, e pei o alavai tele lava pe tusa ma le 40 futu le umi o lo o taoto ai i lea vaega o le auala, e tatau ona faia i ai se galuega mo le saogalemu o tagata o lo o feafioa’i i lea vaega o le auala.

 

Fai mai Sanitoa, e le gata o lo o faaaoga e le mamalu o le at unuu le auala lea, ae oo lava foi i taavale falema’i, pasi aoga o lo o la’u ai le toatele o fanau aoga o lo o latou faaaogaina lea nofoaga lea i le tele o taimi.

 

Na faaiu le tusi a le alii faipule i lona talosagaina lea o le tamaitai faatonu mo se avanoa e toe faaauau atu ai le galuega o le auala i Mapusaga Fou, ina ia mafai ai ona faamalieina manaoga o le atunuu.

 

KOMITI FOU O SIKOLASIPI A LE MALO

 

I se tautalaga fa’alaua’itele a le tofa Le’i Sonny Thompson lea sa ia saunoa ai i le Fa’au’uga o le Vasega Fa’au’u a Iakina Adventist Academy i le aso Sa na te’a nei, sa ia fa’ailoa ai, “Ua mae’a faia le tiute o le tatou Malo, ua suia atoa totino o le Komiti o Sikolasipi a le tatou malo, ma ua i ai fo’i ma le latou komiti faufautua, ina ia va’ai toto’a  i agava’a ua mae’a fa’atulaga mo fanau a’oga uma lava, e ao ina maua lea fa’amanuiaga mai le tatou malo, o se avanoa e totogia ai lana a’oga a’o taumafai i kolisi ma iunivesite ua saofaga i ai latou talosaga ma togi.”

 

O suafa nei o i latou na tolaulauina aloaia:

 

Taitaifono Rev. Elder Kalepo Vaitautolu; Senatoa Faumuina Tagisiaali’i, Rep Tu’umolimoli Moliga, Mr. Tamaali’i Anesi Poloa, Mrs Evelyn Satele ma Mrs Jeanette Yamasaki. O le komisi faufautua mo lea Komiti Fa’afoe ua tofia i ai sui nei e to’atolu, ae le palota i mataupu e soalaupule ai le Komiti Fa’afoe: Dr Seth Galea’i mai le Kolisi Tu’ufa’atasi; Dr Vaitinasa Salusalumealelei Hunkin Finau mai le DOE ma le tofa Le’i Sonny Thompson o le DHR a le tatou Malo.