Ads by Google Ads by Google

TALA I VAIFANUA

FESOASOANI MO I LATOU AFAINA i LE AFA O PAM

 

E ese mai le tele o galuega o fa’atino e le Blue Sky ina ia fa’amaumau foa’i a le to’atele o le atunu’u e fia fa’ao’o atu mo i latou o afaina i le afa tele o Pam, ua talia fo’i e le Koluse Mumu ni foa’i ua ‘auga mo lea fa’amoemoe.

 

O le malo o Vanuatu lea ua iloga mai le afaina tele i lea afa saua ma le malosi, ma ua fa’apea lava ona o’o fo’i i ai le a’ao foa’i o le Koluse Mumua e pei ona lau silafia e le tatou Malo.

 

O le Taitaifono o le Koluse Mumu, Hans Langkilde sa ia fa’ailoa mai, “Ua talia nei ni foa’i mai so’o se tasi, po’o ni kamupani ma fa’alapotopotoga, ae ua na’o tinoitupe e talia ona o tulaga o feuiuia’iga ina ia vave fa’auia atu i le lala o le Koluse Mumu ua i ai nei i Vanuatu.

 

I aso Tofi ma aso Faraile o le a i ai sui o le Koluse Mumu i le EOB Maota o le Malo i Utulei mai le 8am-4pm ma aso To’ona’i e i ai i le Ace Hardware Malaeimi ma le Laufou Shopping Center i Nuuuli mai le 8am-4pm.

 

Mo le vaiaso atoa, o le a i ai lava sui o le Koluse Mumu i le CostULess.

 

FALE O LE KOLUSE MUMU:

 

Ua i ai nei le fale mo le Ofisa autu o le Koluse Mumu i lona tulaga ua toetoe a mae’a ma ulufale loa i ai le Ofisa e fa’amautu i ai latou galuega uma mo le tatou atunu’u ae maise feso’ota’iga ma fafo.

 

O se suiga tele ua va’aia ina ua mae’a ato le taualuga o lea fale i ona apa lanu mumu, ua matagofie ai fo’i lea galuega. Ua fa’atulaga e tatau ona mae’a tatala lea fale mo i latou i le masina o Me 2015, a leai o le amataga lava o Iuni.

 

“O lo ua fa’atulaga uma gaoioiga na i lea vaitaimi e tupu ai, peita’i, afai lava ae vave ona mae’a, e fa’aaoga loa lava ma le fale latou. Ua pau le faigata o lo’o taofiofia le galuega lea, ona o tulaga lava o le tau e femoumoua’i ma sui fo’i o ofo mai latou tomai ma le malosi ae maise le sapalai o mea e fausia ai lea galuega.” O se saunoaga lea a Vaito’a Langkilde i le tatou nusipepa nei.

 

O lo’o atagia mai, ua tau fuafua e avea ma se Ofisa Tutotonu o Auaunaga mo Fa’alavelave Fa’afuase’i [Emmergency Operation Center].

 

O le galuega ua va’aia nei ua tula’i, o lo’o fa’atautaia lava e i latou o ofoina atu le latou tautua ae ua i ai le tomai ma agava’a tau faufale ma kamuta, palama ma fa’auaea eletise. O masini ma mea faigaluega ua va’aia o fa’aaoga, o lo’o toina atu uma mo le galuega e leai se totogi i le Koluse Mumu, fa’afetaia ai le mamalu o Kamupani ma matagaluega o le Malo o lo’o latou fa’asoa atu mo lea itu o le galuega lenei.

 

“O le taimi lava e maea ai lenei galuega, o le a mafai ona fa’avasega ma fa’atulaga lona tau aofa’i, le taimi, le tele o le foa’i ma mea uma na fa’aaogaina mo le silafia e lemamalu lautele o le atunu’u fa’apea ma le Ofisa autu fo’i o le American Red Cross, lea e tele ina foa’i mo i tatou iinei.” O se saunoaga fiafia lea a Vaito’a e tusa o le galuega o le malu o le Koluse Mumu.

 

FONOTAGA MO A’OGA KATOLIKO - PULEAGA SAMOA PAGO PAGO

 

O le fonotaga fa’apitoa sa fa’atautaia ina ia mafai ona iloa lelei e matua ma aiga, fanau a’oga fa’apea fo’i faia’oga, ae tainane le Komiti Fa’afoe o A’oga a lea Ekalesia, lu’iga o lo’o feagai nei ma le Komiti Fa’afoe o A’oga Katoliko i lenei vaitau.

 

E tatau ona latou soalaupule i mea e fa’aleleia ai, e tatau fo’i ona manino le mata o le vai i Matua ma Aiga, i nei mea uma, ina ia motu le pa ae ua iloa, mea nei e fa’afaigata ai le tulaga o a’oa’oga a le Ekalesia.

 

O se tasi o mea na mua’i fa’atino e Epikopo Peter Brown, o le toe aumaia lea o Felela i totonu o le Pule’aga Samoa Pago Pago, e toe fesoasoani i a’oga a le fanau. O se mea sa i ai i tausaga e tele ua mavae, peita’i, ua fai si leva talu ona le toe i ai lea auaunaga i totonu o A’oga a le Ekalesia iinei.

 

O le galuega fautele e sili ona aoga mo le a’oa’oina o fanau, ma e mo’omia ai le galulue fa’atasi o matua, faia’oga ma le pulega o a’oga a le Katoliko ia ausia lea fa’amoemoe.

 

Na faia lea fonotaga fa’apitoa i Fa’asao Malisi High i Lepuapua.