Ads by Google Ads by Google

To’a 69 ‘au fa’au’u Aoga Maualuga Matata Ese’ese - NVTHS - 2018

A look at some of the 69 graduates of Nu’uuli Vocational Technical High School class of 2018NVTHS 2018 Valedictorian, Jayne F.M. SolofaNVTHS 2018, Salutatorian, Agahpay Lina Manase

Pago Pago, AMERICAN SAMOA — "O le Lumana'i e fai mo i latou e talitonu i le Matagofie o a latou Miti" - le autu lea o le aso fa'apitoa mo le vasega fa'aiuaso a le Nuuuli Vocational Technical High School (NVTHS), le Aoga Maualuga a Matata Ese’ese, i le aso Tofi na te'a nei.

O le latou aso fa'apitoa sa fa'atautaia le latou polokalama matagofie o le fa'au'uga i le Faleta'alo o le A'oga Maualuga a Tafuna, ma sa amatalia fo'i i le itula e 9:00 i le taeao ae toetoe ta le 10:00 ua mae'a lelei. E to'a 69 fanau fa'au'u i lenei tausaga.

O le susuga le Fa'afeagaiga Rev. Eleasaro Fa'ata'a sa avea ma Faife'au tofia e si'itia le talosaga amata mo le polokalama o le fa’au’uga, a'o le tama'ita'i Pule A'oga Mrs. Batta Siatu'u-Leatualevao na ia mua'i saunoa e fa'afeiloa'i le mamalu na aofia, i a latou malo fa'aaloalogia, se'ia o'o i le vasega o matua ma aiga, uo mamae ma aiga o le vasega fa'au'u na latou potopoto mo lea fa'amoemoe lelei.

O le tama'ita'i ua avea le togisilia i lenei tausaga o Jayne F.M. Solofa mai Tafuna. O lona tina matua o Tereise Tulafono Young ae o ona matua o Joseph Solofa ma Silika Young. E auai o ia i le Makeke 1st Ward i le Ekalesia Mamona. Ua fa'anaunau o ia e fia avea ma Pailate i lona lumana'i faigaluega ma ua fa'apena fo'i ona naunau e amatalia lana sailiga e afua atu i lenei tausaga.

O le tama'ita'i ua avea le tulaga lua i lenei tausaga i le Laumua o le Wild Cats o Agahpay Lina Manase, o se alo e fa'asino ia Tutuila Manase ma Elenoah Taele Mata'u, ma Lisa Marie Manase o Futiga. O ia o le sui totino o le Ekalesia Fa'apotopotoga Kerisiano i Amerika Samoa i Futiga. O ia ua pale fo'i i le Tausala Lalelei o le Nuuuli VocTech High, Peresetene o le National Honor Society ma o le totino o le Association of High School Scholars. O lo'o ua ia ofoina lenei la'asaga ua ia ausia i lona soifua taumafai mo matua o ona matua, ae maise si ona tama matua ua tu'ua le mafutaga - Letoga Manase o Futiga.

I le saunoaga a le afioga i le Kovana Sili, Lolo Matalasi Moliga, mo lenei vasega fa'au'u sa ia fa'ailoa ai, "O lenei taeao ua ou ofuina ai la'ei auro, ua fa'apena fo'i se lagona aua a auro le laei e te ofu ai, fa'apena fo'i ou lagona ua auro ma mea e te faia ua auro."

"Ia outou fa'ataua le manulauti ua outou si'i maia mo lo outou aso. O se fa'aupuga matagofie na faia e se tasi o tina ta'ita'i iloga i le lalolagi. Peisea'i ua outou aumaia fa'aupuga mai tina, aua o i latou e tapenapenaina outou olaga mai le pepe se'ia o'o ina matutua ma ua iloga ala e tou te ola, tautua ma fa'aauupegaina ai."

"Ia mua'i talitonuina e oe lava oe, ona fa'ato'a e taoso lea o lou olaga tausaili i le lumana'i. Ua mae'a avatua ia te outou auupega o le taua fa'aletomai ua outou agava'a ai, ia lototele ma taumafai, e o fa'atali ma lou ola mata'u i le Atua, e le asa lava tou faiva."

"O outou nei e fa'amoemoe i ai le malo, ina ia le valetu'uina faiva nei i le lotoifale o le tatou Malo tau atina'e. O outou tomai e mo'omia i taimi uma, o feoa'iga, o le fausaga o fale, o le fa'amaluluina o fale ma ofisa, o tomai na o lo'o a'oa'oina i o outou potu a'oga, lo outou sao lea e tatau ona fa'atino,” o se tima'i lea a le ta'ita'i o le Malo mo le fanau ua sauni e la'asia le isi la'asaga fou i le soifua a'oa'oina, soifua faigaluega, po'o le soifua tausiaiga.

O le fofoga fa'apitoa o le latou faia'oga ua 33 tausaga o lana tautua, Anetone Fuga, ma sa ia fa'amamafa i le afioga le Kovana sili ma le Taupulega, "E toe lava o le Nuuuli VocTech High le a'oga Maualuga a le tatou Malo, e leai lava sona faleta'alo e afuafua e fa'atino ai tapenaga fa'apenei. O lea matou te aisi i isi a'oga mo se avanoa mo i matou. O lea la ua toe pau lenei o so'u leo e avatu, ae ou te tatalo, a'o le'i i'u le ola, ae ua ou va'aia se faleta'alo mo le Nuuuli VocTech High!"

Tala tusia mo fa'ailoga ma nisi o vaega o le tautua a lenei faia'oga i le NVTHS i le tala tusia i le Le Lali.