Ads by Google Ads by Google

Tala otooto o Fa’amasinoga

ausage@samoanews.com

PULUMU FIFITA

 

O le ali’i talavou lea na ta’usala e le fa’amasinoga maualuga i le moliaga o le taumafai lea e osofa’i ma talepe le fale o se aiga i Leone i le amataga o le tausaga lenei, ua poloaina e le fa’amasinoga ina ia taofia i le toese i Tafuna mo le 20 masina, o se tasi lea o tuutuuga o lana nofovaavaaia e 5 tausaga.

 

Na fa’atoese le ali’i o Pulumu Fifita i le fa’amasinoga e tusa ai o lana solitulafono, ma ia talosagaina ai loa se isi avanoa o ia. Sa ia taua lona salamo e tusa ai o le filifiliga sese ua mafua ai ona taofia o ia i le toese, ma ua ia folafola i le fa’amasinoga, na te le toe soliina lava se isi tulafono a le malo i le lumana’i, ae o le a fa’aaoga aso o lo o totoe o lona ola e tautua ai lona aiga, nu’u ma le itumalo fa’apea lana Ekalesia.

 

Na tutu fa’atasi loia a itu e lua e finau i le fa’amasinoga fa’asalaga fa’anofovaavaaia, e aofia ai a’oa’oga fa’a faufautua e foia ai le fa’afitauli o le ‘ava malosi o lo o a’afia ai le olaga talavou o le ali’i ua molia.

 

Saunoa le afioga i le ali’i fa’amasino sili ia Michael Kruse ia Fifita e fa’apea, o lana faila lea o lo o i ai uma fa’amaumauga o solitulafono ua mae’a ona ta’usala ai o ia e le fa’amasinoga, o lo o manino mai ai le i ai o se itu vaivai o lona olaga i le ‘ava malosi, ma ua sauni le fa’amasinoga e saili se auala e fesoasoani ai ia te ia i le foiaina o lea itu vaivai o lona olaga.

 

E 5 tausaga na manatu le fa’amasinoga e taofia ai Fifita i le toese i Tafuna, ina ua ta’usala o ia i le moliaga o le taumafai e osofa’i ma talepe le fale o se aiga i le tulaga lua, peita’i ua manatu le fa’amasinoga e fa’amalumalu le tuliina o lea fa’asalaga fa’a falepuipui, ae fa’anofovaavaaia ai o ia mo le umi e 5 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o masina e 20 i le toese i Tafuna, peita’i ua manatu le fa’amasinoga ua lava masina e 10 e tuli e le ua molia, ona tatala ai loa lea o ia i tua e saili sana galuega, ae o masina e 12 o lo o totoe ai i lana fa’asalaga fa’a falepuipui, o le a fa’amalumalu lona tuliina, fuafua lava i lona usitaia o isi uma poloaiga e tu’u atu ia te ia.

 

O le aso 5 Ianuari 2017 lea ua fa’apolokalame e le Fa’amasinoga e atoa i ai le 10 masina lea ua poloaina Fifita e tuli i le toese, afai ae magalo mai tua, ona tu’u atu loa lea o aso e 90 e saili ai sana galuega tumau, afai e mae’a ane le 90 aso ae lei maua lava sana galuega, ua atagia mai ai i le fa’amasinoga lona le usitaia o poloaiga sa tu’uina atu ia te ia, ma, o le a toe poloaina loa o ia ina ia toe fo’i i totonu o le toese e tuli fa’amae’a masina e 12 o lo o totoe o lana fa’asalaga fa’a falepuipui e 20 masina.

 

O isi tuutuuga o le nofovaavaaia a Fifita e aofia ai le fa’asa lea ona ia toe tagofia le ‘ava malosi, fualaau fa’asaina, a ia avea o ia ma tagatanu’u lelei e tausisi i tulafono a le malo i soo se taimi.

 

“Fifita, o le fautuaga lenei a le fa’amasinoga mo oe, afai ua le mafai ona e alu ese mai le ‘ava malosi, o le a matou tu’uina loa oe i le toese i Tafuna mo le 5 tausaga ina ia mautinoa e te le toe mafuta ai ma le ‘ava malosi”, o le saunoaga lea a Kruse e fai ai o ia ma sui o afioga i Fa’amasino Lagolago sa latou iloiloina se fa’aiuga a Fifita, le afioga ia Mamea Sala Jr ma Fa’amausili Pomele.

 

Saunoa atili Kruse e fa’apea, ua mafua ona manatu le fa’amasinoga fa’atoa tatala Fifita i tua mai le falepuipui i le aso 5 Ianuari 2017, pe a mae’a aso fiafia o le kerisimasi ma le tausaga fou, ina ia taofia ai le toe a’afia o le ua molia i fa’aosoosoga o aso fiafia ma le ‘ava malosi.

 

O le ali’i loia ia Jerard Murphy na tula’i mo le malo, ae o le ali’i loia fautua ia Michael White na tula’i mo Fifita.

 

YUSEFF CARTER

 

O le itula e 9:00 i le taeao nei, aso Gafua, 28 Novema ua fa’atulaga e le fa’amasinoga maualuga e tatau ona o o atu ai le ali’i o Yuseff Carter i luma o ali’i fa’amasino mo lana ulua’i iloiloga, afai e leai, o le a fa’aleaogaina loa le avanoa o lo o tatala ai o ia i tua, ae o le a toe taofia o ia i totonu o le toese e fa’atali ai taualumaga o lana mataupu.

 

O le aso Faraile na te’a nei na fa’atulaga ai le ulua’i iloiloga a Carter i luma o le fa’amasinoga maualuga, ae ina ua le auai o ia i le taimi na valaau ai lana mataupu, na fa’ailoa ai loa e le afioga i le fa’amasino sili ia Kruse i le loia fautua a Carter ia Karen Shelly, ina ia fautua ia Carter e tatau ona oo atu i luma o le fa’amasinoga i le aso Gafua nei.

 

O se tasi o tuutuuga o lo o tatala ai Carter i tua, ia auai i soo se taimi e valaau ma fa’atulaga ai ana ulua’i iloiloga.

 

O lo o tu’uaia e le malo Carter i le moliaga o le umia fa’asolitulafono o vaega o fualaau fa’asaina o le pauta, e mafua mai i le afifi lea na aumai i lana pusa meli, lea na maua i ai e Leoleo se vaega tele o le pauta fa’asaina o le aisa.

 

TAVITA IAKOPO

 

O le aso 1 Fepuari 2017 lea ua poloa’i e le fa’amasinoga maualuga le ali’i o Tavita Iakopo e tatala ai o ia i tua mai le toese i Tafuna, mo le fa’amoemoe e alu e saili sana galuega e galue ma maua ai sona totogi, ae o masina o lo o totoe o lana fa’asalaga fa’a falepuipui e 28 masina o lo o totoe ai, o le a taofi le tuliina, fuafua lava i lona usitaia o tuutuuga o lana nofovaavaaia e 7 tausaga.

 

E 60 aso lea ua tu’u atu e le fa’amasinoga maualuga ia Iakopo e saili ai sana galuega tumau, pe a tatala o ia i tua mai le toese i le tausaga fou.

 

“Afai e mae’a aso e 60 ua tuu atu e saili ai sau galuega ae le maua, ua lava lena e ta’u mai ai i le fa’amasinoga e te le manatu mamao i poloaiga ua mae’a ona tu’uina atu, lona uiga, o le a toe poloaina loa oe e te toe fo’i i totonu o le toese mo le tuli faamae’aina o masina o lo o totoe o lau fa’asalaga, lona uiga la Iakopo, e taua tele le saili o sau galuega ia maua”, o le fautuaga lea a le afioga i le ali’i fa’amasino sili ia Kruse ia Iakopo.

 

O Iakopo na ta’usala e le fa’amasinoga maualuga i le moliaga mamafa o le talepe fale i le tulaga lua, e mafua mai i le fa’alavelave lea na la osofaia ai ma se isi ali’i potu e 2 o le fale talimalo o le Sadies by the Sea i Utulei sa nonofo aumau ai ni tagata mai fafo se to’alua, ma la gaoia ai le tele o meatotino.

 

Na taua e Kruse le taliaina e le fa’amasinoga o le fautuaga a le Ofisa Fa’anofovaavaaia, e aua le vave tatalaina Iakopo i tua mai le toese, ae tu’u se’i mae’a aso fiafia lea o le a sosoo nei, lea e tumu tumu ai tagata mai fafo i fale talimalo, ona fa’atoa toe tatala lea i tua, ina ne’i toe a’afia fo’i o ia i ni isi solitulafono.