Ads by Google Ads by Google

Tala otooto mai le Fa’amasinoga

ausage@samoanews.com

MATTHEW BARJA

 

O le ali’i e 19 tausaga le matua lea na tu’uaia e le malo fa’atasi ma ni ali’i se to’alua e talavou i lalo o le tulafono, i lo latou talepeina lea o le Faleaoga a le Aoga Maualuga a Tafuna i le fa’aiuga o le tausaga na te’a nei atoa ai ma le amataga o le tausaga lenei 2016, ua ia sauni e tu’uina atu lana tali ioe i le fa’amasinoga i le moliaga mamafa o le gaoi.

 

E 7 moliaga mamafa o lo o tu’uaia ai e le malo le ali’i o Matthew Barja, o ia moliaga e aofia ai moliaga e 3 o le talepe fale i le tulaga muamua, ma moliaga e 4 o le gaoi. I lalo o le maliliega lea ua mae’a ona sainia e le malo ma Barja, ma ua taoto atu fo’i i luma o le fa’amasinoga mo sana fa’aiuga, ua malie ai Barja e tali ioe i le moliaga o le gaoi, ma le fa’amoemoe e talosaga le malo i le fa’amasinoga maualuga e solofua isi moliaga e 6 o lo o totoe ai i le pepa o tagi sa latou fa’aulu faasaga i le ali’i ua molia.

 

E pei ona taua i fa’amaumauga o le maliliega a Barja ma le malo, lea fo’i na faitauina i luma o le fa’amasinoga maualuga i le aso Faraile o le vaiaso nei, o lo o ta’utino ai le ua molia e fa’apea, i le va o le aso 30 Novema e oo atu i le aso 7 ma le 8 o Tesema 2015, fa’apea ai ma le aso 1 ma le 2 o Ianuari 2016, sa latou aga’i atu ai ma ni ali’i se to’alua e laiti i lalo o le tulafono ma talepe le nofoaga o le aoga maualuga a Tafuna, ma latou gaoia ai ni meaaoga mai totonu o le Ofisa a le aoga, e pei o se ato sa i ai iPad e 45, fa’apea ai ma se laptop sa i totonu o le Ofisa o le vaega a le JROTC.

 

Na ta’utino atili Barja i totonu o le maliliega e fa’apea, sa alu ma le isi iPad e tasi na latou gaoia mai, lea e silia i le $100 lona tau pe a fa’atupeina.

 

Na ta’utino atili fo’i Barja e fa’apea, o le gaioiga sa ia faia i lea aso, sa faia lea e aunoa ma se fa’atanaga mai le aoga, ae sa fa’atinoina lava ona o le manatu ina ia ave fa’agaoi meatotino a le aoga, ina ia le mafai ai e le aoga ona latou toe mauaina ia mea totino.

 

Ua malilie itu e lua e finau i le fa’amasinoga mo se fa’asalaga fa’anofovaavaaia mo le ua molia, peita’i ua malie le ua molia, tusa lava pe finau loia mo se fa’asalaga fa’anofovaavaaia, e pule le fa’amasinoga pe talia pe teena. Ua ia malamalama atili fo’i, e le mafai ona toe suia lana tali ioe ua mae’a ona tu’uina atu i le fa’amasinoga.

 

O se tasi o itu na naunau le fa’amasinoga e fia malamalama atili i ai, a o fa’agasolo le fesiligiaina o Barja e tusa ai o tuutuuga o le latou maliliega ma le malo, o le tau o le iPad e tasi, ina ia fuafua i ai se fa’aiuga a le fa’amasinoga i le ituaiga fa’asalaga e tatau ona tu’uina atu i le ua molia, peita’i na taua e le loia a le malo ia Bob Pickett e fa’apea, e le o mautinoa lelei pe fia le tau o le iPad, ae o lo o manino i le fa’asalaga o le moliaga o le gaoi lea ua tali ioe i ai le ua molia, e mafai ona fa’asala o ia i se fa’asalaga tupe e ono o o atu i le $20,000 le maualuga.

 

O le atugalu o le fa’amasinoga ina ne’i apili e le itu tete’e fa’apea ai ma le ua molia se fa’aiuga e ono tuuina atu, na fautuaina ai loa e le afioga i le ali’i fa’amasino sili ia Michael Kruse le toe taoto atu o le maliliega e toe iloilo atili i ai itu e lua, ma fautua atu i le tau o le masini e tasi na ave fa’agaoi ese mai i le aoga.

 

Ua toe taofia nei Barja i le toese i Tafuna e fa’atali ai le aso 25 Novema lea ua toe tolopo i ai lana mataupu.

 

TALIGALU AH SIU

 

O le aso 24 Novema lea ua fa’atulaga e le fa’amasinoga e fa’ataunu’u aloaia ai le ulua’i iloiloga o le mataupu a Taligalu Ah Siu, lea ua tu’uaia i lona le usitaia o tuutuuga o lana nofovaavaaia.

 

Na taua e le loia a Ah Siu ia Michael White i luma o le fa’amasinoga i le taeao nei e fa’apea, o le mataupu e pei ona toe tu’uaia ai le ua molia, na alia’e mai i le 3 vaiaso talu ai i le taimi ao i ai o ia i Amerika mo sina malologa puupuu, peita’i o fa’amatalaga ua ia maua, o le mataupu fou lea ua tu’uaia ai Ah Siu i lona le usitaia o tuutuuga o lana nofovaavaaia, na mafua mai ina ua le auai o i ai le aso na valaau ai lana mataupu.

 

Na fa’amanino atili e White e fa’apea, na mafua ona le auai Ah Siu i lana iloiloga sa fa’atulaga i le aso lea, ona sa lei mafai e Leoleo o le toese ona pikiina mai o ia mai le toese i Tafuna, ma aumai i le fa’amasinoga mo lana iloiloga.

 

Na taua atili e White lona finauina o le fa’amasinoga ina ia le nofosala Ah Siu i tu’uaiga fou o lona le tausisia lea o tuutuuga o lana nofovaavaaia, lea e aofia ai le tuutuuga e tatau ai ona auai i soo se taimi e valaau ai lana mataupu, ona o le taimi lea sa taofia ai o ia i le toese i Tafuna.

 

Ua toe taofia nei Ah Siu i le toese i Tafuna e fa’atali ai le aso 24 Novema lea ua fa’atulaga e le fa’amasinoga e toe valaau ai lana mataupu. O Ah Siu o lo o tu’uaia i lona fa’aaoga fa’asolitulafono o vailaau oona e a’afia ai lona soifua maloloina, e mafua mai i le fa’alavelave lea na ia fa’aaogaina ai penisini o ta’avale e sogisogi ai.

 

O le matuia o ia tu’uaiga, o le alu ea o le ua molia ma pamu ese mai penisini o ta’avale a tagata o lo o tutu i luma o latou fale, ma mafua ai loa ona saili e le to’atele o tagata o le nu’u o ia e fasi, ma logo ai loa Leoleo mo se fesoasoani.

 

O lo o taofia pea Ah Siu i le toese i Tafuna e faatali ai le aso lea ua fa’atulaga e toe valaau ai lana mataupu.

 

TINI MALEU

 

Ua fautuaina e le fa’amasinoga fa’aitumalo le ali’i o Tini Maleu, ina ia filifili o ia pe usita’i i poloaiga a le fa’amasinoga lea ua toe tu’uina atu ia te ia, po o le tu’uina atu o ia i le falepuipui mo se taimi umi, i lona le usitaia lea o poloaiga a le fa’amasinoga.

 

O le amataga o le tausaga nei na ta’usala ai e le fa’amasinoga fa’aitumalo ia Maleu i le moliaga o le fa’ao’olima i le tulaga tolu, e mafua mai i le fa’alavelave lea na ia fa’aoolima ai i se ali’i na latou inupia fa’atasi, ma fa’anofovaavaaia ai loa o ia e le fa’amasinoga mo le 12 masina i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le fa’asa ona ia toe tagofia o le ‘ava malosi, fa’asa ona ia toe soli o se tulafono a le malo, a ia avea o ia o se tagatanu’u e tausisi ma usita’i i tulafono uma al e malo, ae i le masina o Oketopa na te’a nei, na molia ai e le malo ia Maleu i le moliaga o le fa’atupu vevesi i nofoaga faitele, e mafua mai i le fa’alavelave lea na ia ‘ona atu ai ma taumafai e fa’aleaga le pa a se tasi o aiga o le nu’u.

 

Na fa’atoese Maleu e tusa ai o lana solitulafono sa faia, peita’i na fa’ailoa i ai e le afioga i le ali’i fa’amasino ia Fiti A Sunia e fa’apea, o le a faanofovaavaaia o ia mo le 24 masina i lalo o poloaiga e ao ona ia usita’i i ai, e aofia ai ma le fa’aaoga lea o aso e 28 lea ua mae’a ona ia tuliina i le toese e fai ma sana fa’asalaga, ae afai loa na te toe solia se isi tulafono, o le a ia tuliina fa’amae’a loa aso e 38 o lo o totoe mai lana fa’asalaga e tatau ona tuli.

 

Ua poloaina fo’i o ia e totogi le salatupe e $100, ma ia auai i aoaoga e fesoasoani ai i le tulaga o le ita ma a’afiaga o le ‘ava malosi.