Ads by Google Ads by Google

Tala I Vaifanua


O se vaaiga i nisi o faiaoga o le Aoga Maualuga a Tafuna i le fa’atasiga i le taeao ananafi e tatala aloaia ai aoga a le malo mo le tausaga aoga fou 2017-2018. Ma e amata aoga a le fanau ia Setema 5. [ata: Leua Aiono Frost]

O se vaaiga i nisi o i latou ua maua tusi pasi mai le Vasega Kuka, Vasega Elei ma le Vasega Tui Teu a le Matagaluega o Tupulaga Talavou ma Tama'ita'i (DYWA), i le faauuga sa faia i le aso Faraile ua te’a. [ata: Leua Aiono Frost]

OFISA O AOGA & TAUTUA ESEESE - SAPAIA ‘AOGA FANAU

 

O le taeao ananafi sa poto ai le aotelega o tautua eseese faapea ma le Kovana Sili ma fa’atonusili o vaega esese o le malo, i le tatala aloaia o aoga a le malo mo le tausaga aoga fou 2017-2018. "Galulue Fa'atasi mo se Taunu'uga Manuia" le sini o le fa'amoemoe maualuga o le fa'auluuluga o le Malo e aofia ai le Matagaluega o Aoga, i le fa’atasiga i le faleta'alo i le A'oga Maualuga i Tafuna.

 

I le tula'i mai o le susuga le Faife'au, Rev. Iasepi Ulu, o le EFKAS Fagatogo, mo se upu fa'amalosi ma tatalo i le Atua ia manuia taumafaiga i lenei tausaga a'oga, na iloga fo'i ona ia tofi tofa le a'ai o finagalo i faia'oga, pulega o a'oga fa'atasi, aua sa ia fa'amautu mai le fe'au mai le Tusi Sa, "O le u'amea e fa'ama'ai e le U'amea, a ma'ai, ona gafatia lea ona fa'atino galuega uma e fa'aaoga a'i!"

 

I lana tima'i a'o le'i tatalo, sa ia faamanatu mai ai, a lelei ona fa'ama'ai le u'amea, e le toe i ai se mea e le mafaia e i latou na fa'alalo, peita'i, e tatau ona fa'atuai ona tapena fanau, ua malosi fo'i le sofa'i a le fili i lona malosi.

 

I lana saunoaga, sa mua’i fa’afetaia e le afioga le Kovana Sili, Lolo Matalasi Moliga, le vasega o e galulue punoua'i e faia tiute e le fia faia e se tasi, peita'i, a le faia e le mafai ona fa'aauau vasega a fanau.

 

"O le aso lenei, tatou te tu'uina aloaia atu ai le fa'afetai ia te outou na, e leoleo lotoa, tapena fanua, fa'amama falea'oga ma faleta'ele aua o outou e le fa'aeaina lava la outou tautua i aso uma, ae tou te gapatia ma fatuatia le leoa i taimi uma o la outou pitola'au tau'ave i a'oga uma ua a'oa'oina ai fanau a le atunu'u, fa'afetai,” o sana tala lea mo i latou ma patipatia lo latou sao.

 

Na soso'o ma le fa'afetai i Ave Pasi aua o le saogalemu o le avatu o fanau i a'oga ma toe fa'afo'i mai i o latou aiga ma matua, o lo'o i a'ao o nei sui e fa'afoea pasi a'oga.

 

Na o'o lea o lana tautalaga i le galuega fa'atino a le Au Kuka ma le 'au faigaluega uma i le polokalama o Mea Taumafa a Fanau A'oga, lea e fa'amoemoe tele i ai le soifua maloloina o fanau uma a le atunuu i a'oga uma ma e tatau lava ona mata'alia i latou, ina ia fagaina lelei fanau i aso uma.

 

"O le aoaoga o le tamaititi, o se galuega fai fa'atasi a tautua eseese ua aotelega i lona soifua a'o i ai i le vaitau o lona soifua a'oa'oina, e aofia fa'atasi ai vaega o tautua lautele a le Malo, le vasega o Pisinisi, le Nu'u o alaala ai, Matua fa'aleagaga, le Aiga i lona aotelega, Matua ma le Matagaluega o A'oga ma lona malo atoa. E moni ai o le a'oga a le tamaiti e fai fa'atasi e ia ma lona siomaga o ola a'e ai, o lona nu'u."

 

"Ua taumafai atu le malo e fa'ao'o atu lana pito la'au, lea ua aumai uma lava fa'atonusili o vaega eseese o le Malo e tatou te mafuta i lenei taeao, ia tatala le tausaga a'oga, ae ua tatou iloa lelei, e i ai lau pito la'au i le a'oga a fanau uma a le atunu'u o e tautua ai.”

 

Mo faiaoga, saunoa Lolo, “e te le o toe to'atasi i lau galuega, ua tutula'i uma atu tautua eseese ina ia fa'afaigofie lau galuega, ina ia tausoa se isi vaega o lau galuega, ina ia fa'aosofia lou lagona fia faia o lou tiute ua vala'auina ai oe, ia a'oa'o fanau a le tatou malo ia atamamai.”

 

“O tatou fanau ua i o outou a'ao, faasoa i ai ina ia latou fa'asoa atu fo'i i nisi i lo latou taimi e tula'i mai ai i nei faiva. Fai lau galuega ina ia nofouta i latou i lu'iga fa'aonoponei o lo'o olioli mai i o latou taimi.”

 

Saunoa atili le kovana, "O le Fomai e vave ona iloa le mea ua ia togafitia sese ai le ua gasegase, aua e sasi loa, va'aia loa ua talioti le tagata, e toe tatope ane nisi togafitiga e fa'asa'o ai le sasi ma o'o ai le gasegase i le ICU, a'o o tatou Faia'oga, a sese ona tatou faia o tatou faiva o le a'oa'o o le fanau, e iloga i lo latou soifua le a'oa'oina, ma amio e le tatau, ma e a'afia fo'i le olaga atoa o le tamaititi se'ia o'o lava ina tagata matua, ma fai lona aiga, ma avea ma se tasi e fa'amoemoe i ai lona aiga, malo, ekalesia ma le atunu'u.  O le ogaoga lea o le tatou matafaioi ae tu'uvaleina lo tatou faiva.”

 

I le taimi o lana tautalaga, na saunoa ai le fa’atonu o aoga, Dr. Ruth Matagi-Tofiga, ia faiaoga e faapea, "E ui ina fita le ala, ae tou te le'i fo'i pe le faia la outou matafaioi, fa'afetai atu ia outou uma lava. Sa tou le fa'atali pe fa'atalale i le pitola'au sa i o outou lima, ua outou faia ma le leai o se leo fa'asea e o'o mai, fa'afetai! E to'atele a tatou Toa i lenei matagaluega ma e tofu i latou uma ma matata eseese o lo'o fa'asaogalemu ai galuega ma le a'oa'oga o le fanau i aso ta'itasi. E amata mai Alataua se'ia pa'ia Matatula ma toe aga atu i le Manu'atele atoa, fa'afetai galulue. O outou o auauna lelei ma e fa'afetaia o outou faiva uma!"

 

12 MAUA TUSI PASI: KUKA, ELEI & TUI TEU A LE DYWA

 

O le aso Faraile ua te’a sa avea ma aso o le seleselega a le Vasega Kuka, Vasega Elei ma le Vasega Tui Teu a le Matagaluega o Tupulaga Talavou ma Tama'ita'i (DYWA).

 

O lea fa'amoemoe sa fa'atautaia mai mo le tolu masina, ma e le'i faigofie fo'i i lenei mamalu e to'a 20 i latou na amata mai o tau'avea nei Kosi, ona auai i vasega nei i aso e lua o le vaiaso mo le ta'i 4 itula.

 

O le tulaga sa i ai le vasega Kuka, ua i ai nisi ua faigaluega tumau, ua motusia ai le avanoa e fa'aalu i lenei vasega, o nisi ua malaga i fafo i vaitau nei o tu'uaga o a'goa, ae o nisi fo'i, ua pisi i isi galuega, e aofia ai le Ekalesia.

 

E to'a iva i latou ua fa'ai'uina le aoga Kuka: Aliitasi Tiapula, Autusi Tele'a, Emma Faiva, Lomalua Atu, Matalasi Tyrell, Senileva Tyrell, Sese Sauafea, Sirarotonga Farani ma Tautua Faimanu.

 

I le a'oga Tui Tei, ua maua ai le avanoa e le to'atolu o i latou e fa'amau fa'ailoga ai lo latou tomai e tuia teu. O le to'atolu lea e aofia ai: Lomalua Atu, Matalasi Tyrell ma Sese Sauafea.

 

O vasega nei e lua - kuka ma le tui teu - sa a'oa'oina lea e le faletua o Malia Masalosalo Lui.

 

O le vaega o le Elei sa a'oa'oina lea e Tou Collins ma e to'alima i latou ua fa'ai'uina mai le to'a 12 na amatalia. O i latou ua matua maimoaina a latou ie elei o nisi ua suia ai o latou laei ae o le tele o oloa sa tautauina mo le maimoaga a i latou uma na auai mo le fa'ai'uga o lenei taumafaiga.

 

O le au fa’auu o lea vasega: Sharlene Meredith, Pita Faumuina, Tautua Faimanu, Malu Sikione ma Senileva Tyrell.

 

O le fa'amalo sa saunoa i ai le sui fa'atonusili Fuiavalili Pa'u Roy Ausage ma sa ia fa'ailoa ai, "O le 'auga o lenei galuega faifaipea a le Matagaluega, ina ia fa'aauupegaina tina ma talavou o le atunu'u i tomai e aoga mo so'o se taimi e le maua ai se galuega, a'o o i ai le tomai fa'apitoa e mafai ona faliu ane i ai, saili ai se tamaoaiga tausi o lou aiga."

 

“O lea o le a toe va'ai toto'a le matagaluega pe ua lava le la'asaga muamua o le a'oa'oga Kuka, Elei ma le Tui Teu, ae si'itia i le isi la'asaga fou ina ia faalautele atili le tomai. Afai ae aotelega fa'aiuga e ao ina si'itia, ua tatau ona faia loa."