Ads by Google Ads by Google

Tala I Vaifanua


O le susuga le Sui Fa'atonu o Galuega, Tuitasi Luki, lea ua ia tau'avea atoa le tulaga o galuega fausia i le atunu'u na te va'ava'aia toto'a. O ia lea o lo'o nafa fo'i ma le galuega o lo'o fa'atautaia nei mo le Fale Mata'aga i le taulaga. [ata: Leua Aiono Frost]

PESEGA VAITAU O LE KERISIMASI 2017

 

Ua mae'a ona fa'aulu aufaipese e 65 ua lautogia mo le maimoaga e pasia ai ina ia fa'afiafia i le vaitau o le Kerisimasi o lenei tausaga. O nei aufaipese ua mae'a faamauina ma ua fa'alauiloa i ai, ina ia nofo sauni  mo le pasiga a le Komiti Fa'afoe lea e asia i latou mai le aso 27 Novema se'ia o'o ia Tesema 2.

 

Na tapunia le fa'aulu o aufaipese i le aso 13 o Novema, peita'i, sa toe tatala le avanoa i nisi aufaipese na tuai fa'aulu ona sa malaga i Samoa mo fonotaga.

 

E pei ona saunoa le tofa Paogofie Fiaaoga, faatonusili o le Arts Council "E ui lava ina ua tapunia, ae na toe tatala lava aua sa matauina, e moni lava tagata, e le o'o atu nei fa'asalalauga ia i latou, ae ua masani lava latou e o mai sa'o i le Ofisa nei e fa'aulu ai latou igoa mo latou sao i lenei vaitau fiafia. O le sipili lava lea ua tatou alu ai."

 

O pesepesega o le Kerisimasi, e amata i le aso 17 Tesema i le aso 20 Tesema. O le umi e pepese ai aufaipese e ta'i 12 minute, ae tolu pese a le aufaipese.

 

O le a i ai le lisi e fa'asolo ai le pasiga o aufaipese ta'itasi ma ua fa'amuamua fo'i le itu i sisifo o le motu nei i le aso 27 Novema ma fa'asolo mai ai i le ogatotonu ae mulimuli i sasa'e. Peita'i, o le fa'asologa o aufaipese ta'itasi o le a fa'atulaga atu e le Ofisa mo le silafia o le taimi tonu e faia ai lo outou sao ma le aso patino e tapena mai ai i lou po tu'upoina.

 

Ose aofaiga sili lea ona to'atele ua tu'ufa'atasia e le Arts Council i lenei tausaga.

 

FAUSIA FALE MATA'AGA FOU I FAGATOGO

 

Ua va'aia le suaina o le fa'avae o le fale fogafale lua, o le Fale Mata’aga fou i Fagatogo, e soso’o atu ma le nofoaga fa’ataliva’a. Ua amata tusia le ata e le vaega o Tusiata Fale a le Public Works, ua latou pasia fo'i le fausaga, ma ua fa'atino fo'i e le Aufaigaluega faufale a le Public Works lenei galuega.

 

"O le fuafuaga o lea fale, ia foliga mai o se fale fa'asamoa i nisi ona totoga, e pei lona taualuga, ia fogafale lua, ia fausia fo'i i le sima aua e mautu toe taugofie, ia talafeagai ma le paketi fa'asoa, aua e le o aumaia mai fafo se vaega tupe e fausia ai, ae ua fa'atino i tupe saili mai le lotoifale le tatou lava malo,” o se tala lea a se tasi o sui totino o le Komiti Fa'afoe o le Fale Mata'aga, Tapa'au Dr. Daniel Aga.

 

"I le tulaga o lona anofale, ia mafai ona teumau i ai measina a Samoa e iloga ai lo tatou aganu'u ma tatou mea sa fa'aaoga i faiva o le gataifale atoa ai ma a tatou tiute fai i le lotoifale fa'afatuoaiga Samoa, ma le gagauina fo'i le vao mo fa'ato'aga. E le gata i lena, ae ia mafai ona fa'atino ai fa'aaliga o Tu ma Agaifanua a Samoa, atoa ma le a'oa'oina ai o le Gagana ma le atamai fa'asamoa o tupulaga faia'e o le atunu'u a taeao." O le toe soso'oga mai lea o le faamoemoe atoa ua galueaina ai lenei Maota Mo Measina Samoa.

 

Ua fa'ailoa mai, "O lenei galuega, e matua le a'afia ai lava le fale o lo'o soso'o mai i tai, ona o lo ua aofia lea fale i measina ua fa'ataua e le Historical Preservation. Afai e toe fa'aleleia le fale lea, e le a'afia lona fausaga i ni suiga po'o fa'afouga e toe faia, ae toe fa'aleleia atili ina ia fa'atumauina mo se isi vaitaimi umi o lumana'i."

 

"O le a taumafai fo'i e soso'o lelei atu lea falefou i le fale fa'atali pasese a Va'a Laiti, ma e i ai fo'i nai teuteuga o le Maota fou e fa'afoliga mai e tali tutusa ma le fale fa'atali pasese lea ua mae'a fa'atula'ia. O lona taualuga e ato fo'i i le lau, ma le laupapa e teuteu ai, e iloga mai ai foliga fa'afale Samoa,” o se isi lea fa'amatalaga o le galuega o lea fale mo Mata'aga o lo ua amatalia lona fa'avae i le taimi nei.

 

E ese mai le amatalia o le galueaina o le Maota lea, ua fa'ailoa mai, o lo ua galulue fo'i sui totino o le Komiti ina ia tausailia ala e fa'alava ai le paketi fa'asoa mo le galuega. O lo ua saili i o tatou lotoifale, ae maise fo'i ua amata ona va'ava'ai i nisi o faalapotopotoga e masani ona fiafia e fa'aleleia ma teumau oloa po'o measina a atunuu eseese, e ono maua ai fo'i se i si aiga, po'o se Kamupani mai fafo ina ia fesoasoani ma fa'auia mai ai se fesoasoani tupe, ia mae'a lelei lea galuega.

 

Ua le fa'ailoa maia se paketi fa'asoa, ae ua amata ona galulue le aufaigaluega a le Public Works i lalo o le ta'ita'iga a le tofa Tuitasi Liki, le sui fa'atonu o le Galuega Lautele, e ala i galuega o auala ma fale.

 

O lea fo'i fale, e ao ina sa'o lelei le ituaiga o moli e fa'aaogaina mo le fa'amalalamalamaina o le maota i lona anofale, atoa ai ma lona ea ia malu lelei, e le soona malulu fo'i, pe vevela ona o tulaga o oloa o le a fa'aalia ai i totonu. O na mea e tutusagalemu atoa ai fale Mata'aga uma i le lalolagi, ma e foliga mai afai ae mae'a le tatou fale mata'aga lea ,ua i ai fo'i i tatou i le laina o fale mata'aga fa'aonaponei.

 

"O le naunauta'iga, afai e maua le so'otaga ma luga o le Uafu, o lona uiga e vave lava ona asia e tagata maimoa mai fafo lea e malaga mai i Meli tetele, ma ua vave fo'i ona fa'aalia atoa lo tatou malo ma tatou tu ma aga i nai tagata ua asiasi mai,” o a Tapa’au lea.

 

"E i ai nisi o tatou tagata ma sui o Aiga Samoa o lo'o alaala tumau i fafo, ae o latou measina ua manana'o e foa'ia lea mo le Fale Mata'aga, ae ua faigata ona fa'ao'o mai, aua ua latou iloa lelei le tulaga o iai le tatou Fale Mata'aga, ua tuai tele, ma ua mana'omia ona fa'asaoina le tele o measina o lo'o fa'aalia ai."