Ads by Google Ads by Google

Fa’aalia to’atele au palota fiafia ina ua fa’atino lo latou aia palota ai


Ni isi o Tamali’i mai le afioaga o Pago Pago i le taimi na fa’atinoina ai la latou aia i lalo o le tulafono e palota ai i sailiga tofi a le atunu’u i le aso 8 Novema na te’a nei. [ata AF]
ausage@samoanews.com

Na fa’aalia e le to’atele o tagatanu’u o Tutuila ma Manu’a na maua le avanoa e fa’atino ai lo latou aia i lalo o le tulafono e palota ai, o latou lagona fiafia ina ua fa’atino so latou sao i sailiga tofi a le atunu’u mo lenei tausaga, e ala i lana faiga palota tele sa fa’ataunu’uina i le aso Lua o le vaiaso nei, Novema 8 2016.

 

E ui o le to’atele o i latou na fesiligia e le Samoa News e le i finagalo e fa’aalia ni o latou finagalo e fa’atatau i le taua o le avea o i latou ma tagata palota, peita’i na taua e se vaega to’aititi le taua o le fai o so latou sao i le sailiina o tofi a le atunu’u.

 

“E taua le avanoa ua ou maua i lenei tausaga e fa’aleo ai lo’u aia tatau ou te palota ai mo le sui ua ou filifilia e tatau ona avea ma ta’ita’i o le atunu’u”, o le saunoaga lea a le susuga a Malaki Viliamu, o se ali’i e 42 tausaga mai le afioaga o Pago Pago.

 

Ina ua fesiligia po o ai le sui ua ia filifilia e palota ai, na soisoi le susuga a Viliamu ma fai mai, “ou te le mana’o e fa’ailoa la’u palota, pau lo’u lagona e fia fa’ailoa atu, o le sui ua ou filifilia e ala i la’u palota, o le sui lena ua ou talitonu e tatau mo le tofi, e le gata i le tofi faipule o le afioaga, o le sui i le konekeresi, atoa ai ma ta’ita’i mo le faigamalo a Amerika Samoa”, o le saunoaga lea a Viliamu.

 

Ae mo le Tina matua ia Siniva Filemu, 56 tausaga o Aua, sa ia taua lona lagona fiafia ina ua mafai ona maua le avanoa e palota ai mo ni isi e avea ma ta’ita’i o le atunu’u i le lumana’i.

 

“Ua ou filifilia Faoa ma Sanitoa e avea ma ta’ita’i o le malo mo le atunu’u i le lumana’i, ae mo le sui i le konekeresi, ou te lagolagoina Aumua Amata, o ia o le Tina ua lava lona tomai ma le masani e fa’atino ai galuega lelei mo le atunu’u, ae mo lo’u nu’u i Aua, ua ou manatu e tatau ona fai se suiga, ua tatau ona tula’i mai se sui fou e alofa i le afioaga”, o le saunoaga lea a Filemu, e ui na te le i fa’alauiloaina le sui sa ia palota i ai mo lona afioaga i Aua.

 

E to’alua isi Tina talavou mai le fale palota i Fagatogo na la fa’aalia i le Samoa News o la agaga fiafia ina ua maua le avanoa e fa’aleo ai le la palota i lenei tausaga.

 

O i laua uma sa palota mo le paga a Lolo ma Lemanu mo le tofi kovana ma le lutena kovana, o Aumua Amata mo le tofi i Uosigitone, ae o Vailiuama Steve Leasiolagi mo le tofi faipule o le latou afioaga i Pago Pago.

 

Na taua e Tina ia e fa’apea, ua mafua ona la filifilia se sui fou mo le afioaga, se’i fai fo’i se isi suiga i le atina’eina o le afioaga. La te le i fa’ailoaina mai po o a suiga fou i atina’e o lo o la naunau i ai e fa’atino o le afioaga.

 

E le gata o le atunu’u palota sa maua le avanoa e fesiligia ai e le Samoa News, ae na maua fo’i le avanoa e fesiligia ai ni isi o le mamalu o le atunu’u e le o maua le avanoa e palota ai, ae o lo o molimauina le malosi o le lagolago i taumafaiga a le tele o sui tauva.

 

Na taua e le Tama matua ia A’emalo Livisitone, 52 tausaga mai Palauli, Savai’i ae ua silia i le 24 tausaga o aumau ma lona aiga i Utulei e fa’apea, e ui e le o ia o se tagata palota, ae lagona lava lona fiafia e tu’u atu lana lagolago i soo se taumafaiga a sui tauva o lo o palota i ai lona to’alua ma lana fanau e to’a 4.

 

“E ui e le o a’u o se tagata palota, ae o la’u lagolago e le fesiligia i soo se taimi e faia ai sailiga tofi a Amerika Samoa, o lo’u talitonuga, e le sili le ta’i nai lo le tapua’i, o le sao fo’i lena a Tumua ma Pule, o le lagolago i soo se taumafaiga a sui tauva, o ai lava e manumalo, e ave lava i ai le lagolago”, o le saunoaga lea a Livisitone i le Samoa News.