O le vaiaso na te’a nei na tofu atu ai i luma o le Fa’amasinoga Maualuga le mataupu fa’asaga i ni ali’i se to’alua mai le vaega a le US Army Reserve, lea o lo o tu’uaia i lo la osofaia o le Faleoloa a le Militeli i Tafuna, le PX, ina ua faaalia e le afioga i le ali’i Fa’amasino ia Elvis P. Patea le lava ma totoe o mau sa folasia e le malo i le ulua’i iloiloga sa faia i le vaiaso na te’a nei, e tuuina atu ai lenei mataupu i luma o le Fa’amasinoga Maualuga e fa’aauau ai.

O le aso Lulu o le vaiaso na te’a nei na tutula’i ai Herman Tatupu ma Anthony Sanft i luma o le afioga i le ali’i Fa’amasino Sili lagolago ia Fiti Sunia mo le la ulua’i iloiloga. O le masina o Ianuari o le tausaga fou 2020 lea ua fa’atulaga e faia ai le ulua’i iloiloga o lenei mataupu i luma o le Fa’amasinoga Maualuga.

O le tofu atu o le mataupu faasaga ia Tatupu ma Sanft i luma o le Fa’amasinoga Maualuga, na faia lea ina ua mae’a le ulua’i iloiloga sa faia i le aso Lua o le vaiaso na te’a nei i luma o le Fa’amasinoga Faaitumalo, lea na iloilo ai e le afioga i le Faamasino ia Patea mau a le malo sa folasia, pe lava ma totoe e lagolago ai le latou tagi fa’asaga i ali’i nei e to’alua.

O le ali’i loia fautua lagolago ia Bob Stuart sa tula’i mo Tatupu ma Sanft i le ulua’i iloiloga lea, ae o le tama’ita’i loia sili lagolago ia Dunn na tula’i mo le malo.

E 2 tasi eseese o lo o tu’uaia ai e le malo ia Tatupu ma Sanft. I le tagi muamua, o loo tau fai molia ai i laua i le moliaga o le gaoi. I le tagi lona lua, o lo o tau fai molia ai i laua i le moliaga o le umia fa’asolitulafono o vaega o le pauta fa’asaina o le aisa.

E ta’i $5,000 le tupe na faatulaga e le Fa’amasinoga e tatala ai i laua ta’ito’atasi mai le mataupu e tasi, lona uiga i se isi faaupuga, e ta’i $10,000 lea ua fa’atulaga e tatala ai le tagata e to’atasi i tua.

O lo’o tatala Tatupu i tua i le mae’a ai lea ona ia totogi le tupe fa’atulaga e le fa’amasinoga, ae o Sanft o lo o taofia pea i le toese i Tafuna e fa’atalitali ai taualumaga o lana mataupu.

E lua molimau na valaau e le malo i le taimi o le iloiloga i le vaiaso na te’a nei. O le tama’ita’i Leoleo ia Hilda Leomiti na valaau mo le iloiloga o le mataupu e fa’atatau i oloa na gaoia mai i le Faleoloa o le PX i Tafuna, ae o le tama’ita’i Leoleo Suesue ia Det. Samantha Lam Yuen na valaau e molimau mo le mataupu e fa’atatau i fualaau fa’asaina sa maua i totonu o le ta’avale rental lea sa fealua’i ai Sanft.

MOLIAGA O LE GAOI

Sa molimau Leomiti e fa’apea, o lenei mataupu na tofu atu i le Ofisa o Leoleo i Tafuna i le masina o Novema na te’a nei, ina ua talosagaina e le Pule o le Ofisa o le PX se fesoasoani a Leoleo, e fa’atatau i ni oloa sa masalomia le ave faagaoi ese mai e ni ali’i talavou se to’alua.

Na tuuina atu e le Pule o le PX ni ata video sa pu’eina e masini pu’eata a le faleoloa i Leoleo, e fesoasoani ai i le latou suesuega. I se tasi o ata video e pei ona taua e Leomiti, o lo o vaaia ai le susuga a Tutupu o loo ulufale atu i le PX, ma aga’i sa’o loa i le vaega o lo o i ai oloa e alu i le uila.

Na vaaia i totonu o le video lea na tago o Tatupu i se atigi pusa ma aveese mai i luga o le fata o loo teu ai oloa e alu i le uila, ona ia nana lea o le atigi pusa lea i lalo o ona lima ae ufi i le ie lavalava o loo fafa i lona ua, ma ia savali loa aga’i i fafo. E lei totogiina e Tatupu se tupe i luma o le cashier mo le oloa o loo i totonu o le atigi pusa sa alu ma ia.

O le oloa sa i totonu o le atigi pusa lea na alu ma Tatupu, o se sipika, lea na ia alu ma fa’atau atu i se faleoloa Kolea i Atu’u, ma ia fai i le pule o le faleoloa, ua ia mana’o e fa’atau ese atu lana sipika sa fa’atau mai i Hawaii i se tasi o ana malaga.

Mo le susuga a Sanft, sa taua fo’i e Leomiti lona iloiloina o le isi ata video sa tuuina atu e le PX ia te ia, ma ia maitauina ai gaioiga sa faia e le susuga a Sanft, e ala i lona aveesea mai o se atigi pusa mai luga o le fata o loo i ai oloa e alu i le uila i totonu o le faleoloa, ma nana i lalo o lona lima, ona ia savali lea i le pito i tua o le faleoloa ma tuu ai.

E leai se fa’amaoniga e iloa ai na totogi e Sanft se tupe i le cashier mo le atigi pusa sa ia gaoia.

Na fesili le ali’i loia ia Stuart ia Leomiti, pe sa i ai se faamaoniga mai le PX e iloa ai, o oloa o lo o tu’uaia na gaoia e Tatupu ma Sanft, o meatotino ia a le PX. Na faamaonia e Leomiti, o oloa na aveese mai i le PX o lo o pipi’i ai lava pepa e faamaonia ai o oloa mai le PX.

MATAUPU I FUALAAU FA’ASAINA

O le aso 12 o Novema pe tusa o le itula e 2:55 i le aoauli, na logoina ai Leoleo o lo o tiute i luga o le alatele i Tafuna, ina ia taofia le ta’avale rental lanu uliuli o lo o fealua’i i luga o le alatele, ma le numera 536D, ona o lo o masalomia o le ta’avale lea o lo o feoa’i ai ni ali’i se to’alua o lo o masalomia i le faalavelave lea na osofa’i ma gaoia ai le faleoloa o le PX.

Na taofi e Leoleo le ta’avale i luga o le alatele ma iloa ai, e to’atolu ni ali’i o lo o i ai i totonu, o i latou nei e aofia ai Tatupu, Sanft, ma se tasi o ali’i na mulimuli ane toe tatala i tua e Leoleo ina ua mae’a ona fesiligia.

Ina ua taofi e Leoleo le ta’avale, sa faia loa se suega i le tino o le ali’i o Tatupu, ma maua ai se paipa tioata e fa’aaoga e ula ai le pauta o le aisa. I totonu o lea paipa sa maua ai i totonu se vaega o le pauta pa’epa’e o le aisa. Sa faia i ai se suega ma faamaonia ai, o vaega ia o le pauta faasaina o le aisa.

Sa saili fo’i e Leoleo totonu o le ta’avale sa feoa’i ai Tatupu ma Sanft. E tusa ai ma ripoti na maua e Leoleo, o le ta’avale rental lea na rent mai e Sanft i lalo o lona igoa.

Na saili e Leoleo totonu o le ta’avale ma maua ai vaega o le pauta faasaina o le aisa, atoa ai ma nisi o oloa o lo o pipi’i ai pepa faamaonia, o oloa ia na aumai i le faleoloa o le PX. Na maua e Leoleo se paipa o lo o i ai vaega o le pauta faasaina o le aisa, faapea ai fo’i ma se tama’i pepa iila o lo o i ai fo’i vaega o le pauta fa’asaina o le aisa. Sa faia i ai se suega ma faamaonia ai o vaega ia o fualaau fa’asaina.