Ads by Google Ads by Google

Toe sauniga tapunia Fonotele 2018 a le EFKAS

Fa'apa'ia fa'atasi ai: 16 Faife'au fa'au'u

I le toe sauniga e fa'amae'a ai galuega uma o le Fonotele 2018 a le Ekalesia Fa'apotopotoga Kerisiano i Amerika Samoa (EFKAS), lea sa tauaofia mo le 2 vaiaso atoatoa i le Laumua i Kanana Fou, sa fa'apa'iaina ma fa'au'u ai le vasega o Faife'au Samoa e to'a sefulu ma le ono.

O le sauniga mamalu sa ta'ita'ia e le susuga le Faifeau Toeaina Eveni Mamoe, e fa'aiu ai le fonotele, sa fa'aofi i ai ma le fa'au'uga lea o Faife'au, lea sa fa'atautaia e le Faife'au Toeaina Rev. Tautalatasi mai le Ekalesia i Taputimu.

O le susuga le Failautusi le tumau sa tauavea maia le tofi Failautusi seia o'o mai i le Fonotele a le EFKAS, sa ia tutula'i e tolaulauina i latou ua fa'au'uina ma o le a fa'apa'iaina fo'i e avea ma Faife'au.

O i latou nei e aofia ai: Rev. Sausau & Fanuatanu Fa'alevao; Rev. Dr. Elekosi & Falenaoti Lafitaga; Rev. So'oso'o & Diane Tuiolemotu; Rev. Malaeotofiga & Tuloto Levaula; Rev. Liava'a & Pearly Moevao; Rev. Tasele & Ana Tuigamala; Rev. Romeo & Marieta Seiuli; Rev. Stephen & Lepupa Taulealea; Rev. Uaea & Usugafono Satele; Rev. Dr Benjamin & Nunuiasolelei Laie; Rev. Felise & Avataeao Augafa; Rev. Apisaloma & Laura Toleafoa; Rev. Kitiona & Quakie Nanai; Rev. Peter Sasina & Ruta Fuala'au; Rev. Mulivai & Tuuifo Solomona ma Rev. Mathew & Mauimalo Failauga.

O le au'au o lenei tausaga i lana fonotele a le EFKAS ua fautuaina ai sui uma o le Ekalesia, "Ia tu'utu'u i le loloto le upega fagota, e maua ai i'a!" O le isi ona fa'aupuga fo'i e mafai ona fa'auiga ai lenei 'au'au matagofie, "ia tu'utu'u i le loloto le tofa, ia maua agaga!"

"Peita'i o le tu'utu'u i le loloto le upega fagota, o le fa'atonuga sa'o a Iesu ia Peteru, lea fo'i sa ia toe augani lava ia Peteru i ona toe taimi ma lea so'o, ‘Peteru, e te alofa ia te a'u?’ E fa'atolu ona Ia fesili, ina ia maua'a i le loto o Peteru, o lo ua ia aumaia ia te ia se fa'amamafa tele i lona mana'oga. "Ia e tausi i a'u mamoe, le Ekalesia lava lea!"

O nisi na o tima'iga na fa'afofogaina i le tele o fautuaga na saunoa i ai le ta'ita'i o le toe sauniga, ia tima'ia fa'atasi uma ai le vasega o Auauna a le Atua o lo ua tala fa'auto i so'o se vaipanoa ua o'o i ai le tala'iga. "Ia tautuana le ekalesia, o e ua mafuta fa'atasi ona o le finagalo o le Atua soifua."

"Ia outou o atu, ia faia le galuega e pei ona finagalo i ai le Atua, ae o lou lava loto. A lutaluta fo'i le tai o mea e tutupu mai, ia taofimau i le iumaea o le fa'atuatua e alofagia le galuega e le e ona le galuega ua tatou fatuatia ai nei. Aua ne'i lafoa'i i auupega o le taua, le afioga a le Atua i lou lima ia fai ma pelu e taufai ma'ai ona itu. I alu i luma lavea lea ua fa'asagatau, e fo'i mai fo'i i tua, e toe fa'asinosino ma a'oa'o ai i tatou le 'au faigaluega! Ia faia le finagalo o le Atua, ae le o i tatou ma o tatou mana'o!"

O ana toe upu ia ona fa'ai'uina ai lea o le sauniga mamalu i le fa'amanatuga pa'ia ina ia fa'amauina le mafutaga ma le Agaga Pa'ia ia i latou uma na auai.

O le fa'alauiloaina o tofiga mamalu o le Laulauatofi na tomuli lava i ai lea sauniga atoa. O lona fa'ai'uga na tutula'i ai le Taitaifono 2016-2018 Rev Elder Eveni Mamoe ma fa'amavae aloa'ia mai i le Ekalesia ma le Fonotele 2018, o lana fa'afetai fo'i atoa ma le fa'ato'esega i ni lape o le galuega a'o tutula'i i le faiva. Na ia vala'auina fo'i le susuga Rev. Elder Fa'aeteete Saifoloi ina ia tula'i mai e talia le tofiga ua tofia ai o ia e le Ekalesia e ala i lana Fonotele ma ana palotaga ua mae'a fa'atino i le tauaofiaga o le aso To'ona'i.

O Rev. Elder Saifoloi o lo'o avea i la'ua ma Faife'au i le Ekalesia i Amaluia ma le faletua.

I lea lava fo'i palotaga ua mae'a filifilia ai le Sui Ta'ita'ifono 2018-2020 le susuga Dr. Rev. Elder Leatulagi Fa'alevao lea o lo'o galulue ma le faletua i le Ekalesia i Amouli. O le Failautusi Tofia mo le galuega EFKAS 2018 -2020 ua tutula'i ai nei Rev. Nafatali Falealii.

Na tula'i lea o le susuga le Taitaifono ma vala'auina uma lana laulauatofi mo le EFKAS i lenei vaitausaga e aofia ai fo'i ma le Teutupe ua toe tofia ai nei le tina Tiakono Fiasili Puni Haleck mo lea lava tofi taua tele.

O i latou nei sa tutula'i ae talosia e le toe tatalo o le sauniga mamalu i le taeao lava o le Aso Sa na te'a nei. O aiga fa'amavae fo'i a le vasega o Faife'au Penisione uma, sa faia lea i maota o latou matagaluega ma sa iloga ona va'aia fo'i le fa'anoanoa o sui mamalu o Ekalesia nei, aua e mamae ma pele le mafutaga o le a motusia nei ma latou Matua Fa'aleagaga.

"E leai se faigofie o lagona, aua na ola a'e lava ua i ai matua nei i le matou ekalesia. O le olaga atoa fo'i na a'oa'o, fa'atonu ma fa'apopoto i matou uma lava fanau a matou matua, e nei matua fa'aleagaga, e le faigofie nei ituaiga o aso. E le fa'apea ua motusia i le oti, ae o le a avea lava i la'ua ma sulufa'iga ia te'i matou, po'o fea lava e manatu i la'ua e alaala tumau ai." O se tala lea ma loimata a le ali'i talavou o Salima Eucharist Reupena, o le ta'ita'i o le Autalavou, Tiakono fa'au'u ma o le sui totino o le Aufaipese a le EFKAS mai Vailoatai mai lona olaga atoa.