Ads by Google Ads by Google

Tau faaola le isi i le Falema’i ae molia le isi i le faaoolima

ausage@samoanews.com

Na faai’u puta le tafaoga a ni ali’i se to’atolu i le 2 vaiaso talu ai ina ua faanatinati le isi i le Falema’i i Faga’alu ona o manu’a tuga na aafia ai lona itu, ae taofia le isi i le Toese i Tafuna ona o tu’uaiga i lona fa’aaoga o se aupega maai e faaoo ai manua tuga i le alii na aafia.

 

E pei ona taua e le malo i le latou tagi e fa’apea, e 35 tausaga o se Tama e to’afa ona alo na taofia i le potu tigaina i le falema’i i Fagaalu, le ICU (Intensive Care Unit), ona o manuaga tuga na aafia ai lona itu ma lona tauau.

 

Na taofia e Leoleo ia Pepa Taito ma Laufala Sio i le mae’a ai o lenei fa’alavelave, ma tutulai ai i laua nei i luma o le Fa’amasinoga Faaitumalo i le vaiaso na te’a nei. Na toe tatala i tua ia Taito ina ua valaau lana mataupu i luma o le afioga i le alii Faamasino ia Elvis P. Patea, ina ua faailoa e le Loia a le malo le leai o ni moliaga latou te faila faasaga ia te ia.

 

Ae o Sio, na toe tolopo lana mataupu seia aulia le taeao o le aso Lua o le vaiaso na te’a nei, lea na faamoemoe le malo e faila ai moliaga faaopoopo faasaga ia te ia.

 

Ina ua toe valaau le mataupu a Sio i luma o le Faamasinoga Faaitumalo, na faailoa ai loa e le Loia a le malo ia Jason Mitchell le maea lea ona latou faila o moliaga faaopoopo faasaga ia te ia.

 

O ia moliaga e aofia ai le solitulafono o le faaoolima i le tulaga lua, o le vaega D lea o solitulafono mamafa; tasi le moliaga o le umia faasolitulafono o vaega o le pauta o le aisa, o se solitulafono mamafa e mafai ona faasala ai se tasi i le toese mo le umi e oo atu i le 10 tausaga, pe faasala foi i le salatupe e mafai ona oo atu i le $20,000; faapea ai ma moliaga mama e 2 o le faatupu vevesi i nofoaga faitele atoa ai ma le gaoi, o le vaega A lea o solitulafono mamafa, lea e mafai ona faasala ai se tasi i le toese mo le umi e oo atu i le tasi le tausaga, pe faasala i le salatupe e oo atu i le $1,000, pe faasala foi i faasalaga uma ia e lua.

 

E $10,000 lea ua faatulaga e le fa’amasinoga e totogi ona faatoa mafai lea ona tatala Sio i tua mai le Toese.

 

O le aoauli o le aso Faraile o le vaiaso nei ua faamoemoe e faia ai le ulua’i iloiloga o leneimataupu.

 

TAGI A LE MALO

 

O lenei mataupu na tofu atu i le Ofisa o Leoleo i Fagatogo ina ua telefoni i ai se Tama ma talosaga i ai mo se fesoasoani, ina ua vaaia ni alii se to’atolu o lo o fufusu i luma o se Faleoloa i Aua pe tusa o le itula e 9:47 i le taeao o le aso 15 o Fepuari.

 

Na faailoa e le Tama i Leoleo, o lona atalii lea ua tamoe e vaovao le fusuaga, ae o lo o ia vaaia se tasi o alii o loo uu i lona lima se naifi, e foliga mai sa ia faaaoga lea naifi e faaoo ai manu’a i se tasi o alii o loo punou i luma o le faleoloa ma uu lona itu.

 

E le i umi se taimi ae taunuu le taavale a Leoleo, ae mulimuli atu ai i tua ma le taavale a le EMS ma ofo atu loa le fesoasoani muamua mo le alii na manu’a.

 

I le mae’a ai ona tuu faatasia e Leoleo o faamatalaga uma mai molimau sa i ai i le taimi o le faalavelave, na taofia faapagota ai loa Taito ma Sio, ae o le taimi lea ua maea ona momoli atu e le ta’avale a le EMS le tino o le alii na manu’a i le Falemai i Fagaalu mo togafitiga.

 

E to’atolu molimau na fesiligia e Leoleo e tusa ai o lenei faalavelave, o ia molimau e aofia ai le Tama ma lona atalii na faafesootaia le Ofisa o Leoleo, faapea ai ma se Tina talavou sa tutu ai i luma o le Faleoloa i le taimi tonu na tula’i mai ai lenei fa’alavelave.

 

Na taua e le Tama matua i Leoleo e fa’apea, na tu faafuase’i le la taavale i luga o le alatele ina ua la vaaia ni alii se to’atolu o loo fufusu i le ogatotonu o le auala. Na faatafa i tua le la taavale ona ia fai lea i lona atalii sa faafoeina le taavale e paka le taavale ae tamoe e vaovao le fusuaga. O le taimi foi lea na ia tago ai loa i le telefoni ma faafesootai le Ofisa o Leoleo i Fagatogo mo se fesoasoani.

 

A o ia talanoa i le telefoni, sa ia vaaia se tasi o alii ua ia tui le isi alii i se naifi ma palasi ai i lalo le alii na manu’a. Na taua e le molimau, na ia vaaia, e faalua ona tui e le alii sa i ai le naifi le alii na aafia, o le tui i lona itu ma le isi tui i lona tauau.

 

Ina ua fesiligia le alii o le Tama na muamua taunuu i le vaega tonu na tulai mai ai le faalavelave na taua ai e le alii lea e faapea, e fetaui lava lona taunuu atu ae tui loa e Taito ia Sio ma tifa ai Sio i le isi itu. Na tago Sio i totonu o lana ato o loo asoa i lona ua ma sei mai le naifi o loo iai ma tui ai loa le tagata sa pipii atu i lona papatua, ma lona manatu o Taito lea, peita’i, e le o Taito lea na manu’a, o le isi alii e to’atolu ai i latou na aafia i lenei faalavelave.

 

Na taua atili e le molimau, e faalua ona tui e Sio le alii na aafia i le naifi, na tui muamua lona manava toe tui ma lona tauau.

 

Ina ua fesiligia e Leoleo ia Sio e uiga i lenei mataupu, na ia faamaonia ai lona faaaoga o se naifi e faaoo ai manua i le alii na aafia. Sa ia faailoa i Leoleo, o le alii na aafia, o lana uo mamae, peita’i na ia faia lenei gaioiga ona o lona manatu ua o atu Taito ma le alii ua manu’a e fasi o ia, e mafua mai i se feeseeseaiga na tula’i mai i le latou inugapia sa faia i luma o le Faleoloa.

 

Ina ua fesiligia e Leoleo le alii na aafia, na ia faamaonia ai faamatalaga uma e uiga i le faalavelave na tula’i mai. Sa ia taua i Leoleo e fa’apea, na ita Sio ina ua ia fautua atu i ai e lava loa lana inu ae vili se taxi e alu ai i le fale ai o faatali mai lona to’alua ma lana fanau mo se tupe e faatau ai se mea’ai o le aso Sa.

 

Na avea le ita o Sio ma itu na tu’i ai loa e Sio lona gutu. Na tulai Sio i luga ma teva ese, ae mulimuli atu i ai Taito ma tu’i loa Sio.

 

Na tago Sio i lana ato ma aumai ai le naifi ma sasau loa ma le tui, o le manatu o Sio, o Taito lea o loo tu i ona tua, ae le iloa o ia (le alii na aafia).

 

Na taua atili e le alii na aafia i Leoleo, na te lei faaoolima ia Sio, a o lea ua aafia ai fua o ia i lenei faalavelave.

 

MOLIAGA MUAMUA

 

E pei ona taua i faamaumauga a le Faamasinoga, o le tausaga e 2012 na nofovaavaaia ai Sio i luma o le Faamasinoga Maualuga mo le 5 tausaga, ina ua ta’usala o ia i le moliaga mamafa o le faaoolima i le tulaga lua. O nisi o tuutuuga o lana nofovaavaaia e aofia ai lona tulia o le faasalaga faa falepuipui e 20 masina i le Toese.