Ads by Google Ads by Google

Tatala i tua le ali’i na ta’usala i lona umia faasolitulafono o fualaau faasaina


[ata: SN]
ausage@samoanews.com

Pago Pago, AMERIKA SAMOA - 

 

O le vaiaso na te’a nei na tatala ai i tua e le Faamasinoga Maualuga mai le Toese i Tafuna se ali’i e 46 tausaga le matua, ina ua manatu le Faamasinoga ua lava vaiaso e 6 lea na taofia ai o ia i le Toese a o faatalitali ai se faaiuga o lana mataupu, e fai ma ana faasalaga i lenei mataupu.

 

O se avanoa lelei lea ua maua e le susuga a Faamamafa Rhode mai le Faamasinoga Maualuga, pe a faatusatusa i le faasalaga faa falepuipui e 5 tausaga e mafai ona faasala ai o ia i le Toese, ina ua mae’a ona ta’usala o ia i le solitulafono o le umia faasolitulafono o vaega o le pauta faasaina o le aisa.

 

O le vaiaso na te’a nei na tula’i ai Rhode i luma o le Faamasinoga Maualuga mo le tuuina atu o lana faasalaga, e tusa ai o le solitulafono lea ua ta’usala ai o ia e le Faamasinoga.

 

Na ulua’i tu’uaia Rhode e le malo i le moliaga o le umia faasolitulafono o vaega o le pauta faasaina o le aisa. A e i lalo o se maliliega na sainia e le malo ma Rhode, lea fo’i na talia e le Faamasinoga Maualuga i le masina na te’a nei, na malie ai Rhode e tali ioe i le solitulafono o le umia faasolitulafono o vaega o le pauta faasaina o le aisa, lea e mafai ona faasala ai se tasi i le Toese mo le umi e oo atu i le 5 tausaga, pe faasala fo’i i le salatupe e oo atu i le $5,000, poo le faasala fo’i i faasalaga uma ia e 2.

 

I le tali ioe ai o Rhode i le moliaga e pei ona ta’usala ao ia e le Faamasinoga Maualuga, na ia ta’utino ai e faapea, i le 2 tausaga talu ai, i le aso 25 o Setema 2018, na ia umia faasolitulafono ai vaega o le pauta faasaina o le aisa. Na ta’utino atili le ua molia e faapea, i le aso e pei ona taua, na taofi ai e Leoleo lana ta’avale i luga o le alatele, ona o lona le usitaia o tulafono i le alatele.

 

Ina ua saili e Leoleo lana ta’avale, na maua i ai se paipa tioata o lo o i ai vaega o le pauta faasaina o le aisa. Na tautino atili le ua molia e faapea, o lana gaioiga sa faia i lea aso, sa le tusa lea ma ala o le tulafono.

 

O le masina o Iuni o le tausaga nei na faatoa molia ai e le malo ia Rhode e tusa ai o lenei solitulafono, ae i le mae’a ai o le 6 vaiaso talu ona taofia o ia i le Toese e faatalitali ai se faaiuga o lana mataupu, na talia ai loa e le Faamasinoga le talosaga a le itu tete’e mo se avanoa e tatala ai le ua molia i tua e faatali ai le taimi e lau ai lana faasalaga.

 

Ina ua maua lona avanoa mai le Fa’amasinoga Maualuga, na faatoese ai loa Rhode e tusa ai o lana solitulafono ma ia talosagaina ai se isi avanoa mo ia e faaauau ai pea lana tausiga i lana fanau laiti e to’a 3.

 

Na taua e Rhode ma ona loimata e faapea, e tasi le masina talu ona taofia o ia e Leoleo ae maua atu le tala faanoanoa ua maliu lona to’alua. O se tulaga sa matua mafatia ai lona loto ona o le motusia faafuase’i o le mafutaga ma lona to’alua, atoa ai ma lona tuua lea o ia ma lana fanau ae alu e leai se tala e fai atu.

 

Na tuuaia a le ua molia o ia ma le sese o lana filifiliga sa faia, o le mafua’aga lea o le tutupu o nei mea leaga i lona aiga, aemaise ai lava le motusia o le mafutaga ma lona to’alua. 

 

Sa ia taua i le Faamasinoga lona aoaoina o se lesona taua mai totonu o le Toese, ma ua ia lagona ai le leaga o le tagofia o fualaau faasaina. A o i ai i le Toese, sa ia molimauina ai le to’atele o tupulaga talavou o loo tuli a latou faasalaga i totonu. Sa ia faapea ane i lona loto, ua tele nei aso o le olaga ua ma’imau i le Toese, ae ua leai se taimi e tausi ai lona aiga.

 

Sa ia ta’utino i le Faamasinoga Maualuga, afai ae maua sona avanoa, na te le toe tagofia ni fualaau faasaina pe na te toe solia fo’i se isi lava tulafono a le malo.

 

Na talosaga lana loia ia Rob McNeill i le Faamasinoga mo se faasalaga faanofovaavaaia mo le ua molia. Na taua e McNeill e faapea, e tele tausaga o galue malosi Rhode e tausi lona to’alua ma lana fanau, o ia fo’i o se Tama e loto alofa i lona aiga, e faamoemoeina fo’i o ia e lona aiga i mea uma lava. 

 

E le o ia o se tagata e inupia pe tagofia fualaau faasaina ae sa galue malosi pea mo le tausiga o lona to’alua ma le la fanau laiti e to’a 3. 

 

Ae o le taimi lava na sese ai le filifiliga a lenei ali’i ina ua mafuta atu i ana uo o loo latou tagofia fualaau faasaina ma le ‘ava malosi, o iina loa lea na amata ai loa ona faaletonu lona olaga, seia oo lava i lona fealua’i i totonu o lana ta’avale ma fualaau faasaina.

 

Na lagolago e le loia a le malo ia Laura Garvey le talosaga a le itu tete’e, ma ia finauina ai fo’i le Faamasinoga mo se faasalaga nofovaavaaia mo lenei ali’i. Na talitonu le Faamasinoga, ua salamo moni le ua molia e tusa ai o lana solitulafono sa faia. 

 

A o le i tuuina mai le faaiuga a le Faamasinoga, na taua e le afioga i le ali’i Faamasino Sili lagolago ia Fiti Sunia le lagona e le Faamasioga o le talosaga atu a le ua molia ma loimata mo se isi avanoa o ia.

 

Ae o le mataupu e pei ona ta’usala ai o ia, na mafua mai ina ua sese lana filifiliga sa faia i le 2 tausaga talu ai, ina ua maua e Leoleo se paipa tioata o lo o i ai vaega o le pauta faasaina o le aisa i totonu o lana ta’avale. 

 

Na taua e Sunia e faapea, o se tasi lea o auala ua maitauina e le Faamasinoga i le taimi nei, o le auala lea ua to’atele tagata ua aafia ai i le tulafono, ona e avea le taofia e Leoleo o taavale i le le usitaia o tulafono tau le alatele ma itu e maua atu ai ma isi solitulafono e pei o le umia faasolitulafono o fualaau faasaina.

 

Na taua e le Faamasinoga e faapea, atonu ua avea le maliu o le faletua o le ua molia ao i ai o ia i le Toese ua fai ai ma ana faasalaga i lenei mataupu, peita’i e le o le faasalaga tonu lea o lo o faataoto mai e le Tulafono. O lo o talanoa mai le Tulafono i le faasalaga faa falepuipui.

 

Na taua e le Faamasinoga e faapea, e tau feololo mai pe ana faapea o se tamaitiiti talavou lea na tagi ma loimata ma faatoese i le Faamasinoga e tusa ai o lana solitulafono, atoa ai ma le talosagaina o se isi avanoa o ia, ae o le itu e le o nofo lelei ai i le Faamasinoga le tagi talatala a le ua molia mo se avanoa, e le gata o ia o se tagata matua ua to’a 3 le fanau, ae ua toeitiiti oo ona tausaga e 50 a o le nei lava e le o saga tonu lona mafaufau i le mea tonu ma le sa’o e tatau ona faia.

 

E 5 tausaga na manatu le Faamasinoga e loka ai Rhode i le Toese, peita’i ua faamalumalu lona tuliina o lea faasalaga, ae o le a nofovaavaaia ai o ia i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tulia o masina e 20 i le Toese i Tafuna, ae faitau ati ma vaiaso e 6 lea ua mae’a ona ia tulia. O le umi o lo o totoe ai o lana faasalaga faa falepuipui, o le a taofi lona tuliina.

 

Ua faatonu e le Faamasinoga le ua molia, e le faatagaina ona ia toe tagofia le ‘ava malosi poo fualaau fa’asaina, a ia avea o ia o se tagatanu’u e tausisi i tulafono a le malo i taimi uma. E $2,500 le salatupe lea ua faatonu e le Faamasinoga ia Rhode na te totogia.

 

Na faamamafa e Sunia ia Rhode, ia tausisi i lana folafolaga lea ua tuuina atu i le Faamasinoga, na te le toe solia se tulafono a le malo. Afai ae le savali ai, o le a le toe maua loa se isi avanoa mo ia.