Ads by Google Ads by Google

Tatala i tua le ali’i na ia faaoo manu’a i lona nephew e 11 tausaga

ausage@samoanews.com

O le ali’i e 29 tausaga le matua lea na ta’usala e le Fa’amasinoga Maualuga i le moliaga mamafa o lona faia o sau’aga i fanau laiti, ua tatalaina nei o ia i tua mai le Toese i Tafuna i lalo o tuutuuga faapitoa mai le Fa’amasinoga.

 

O ni isi o ia tuutuuga faapitoa, e aofia ai le tatau lea ona auai i ni aoaoga e fesoasoani ai i aafiaga o le ‘ava malosi ma le ita, ma ia aua fo’i ne’i ona toe solia se tulafono a le malo i totonu o le taimi o lana nofovaavaaia e 5 tausaga.

 

O le vaiaso nei na tula’i ai Afasene Hunkin i luma o le afioga i le ali’i Fa’amasino Sili lagolago ia Fiti Sunia mo le lauina o lana fa’asalaga.

 

O le tama’ita’i loia sili lagolago ia Christy Dunn na tula’i mo le malo, ae o le ali’i loia fautua lagolago ia Rob McNeill na tula’i mo Hunkin, lea na taofia lava i le Toese i Tafuna talu mai le taimi na loka ai o ia, ina ua le mafai ona ia totogi le tupe e $5,000 sa fa’atulaga e tatala ai o ia i tua.

 

Na ulua’i tu’uaia e le malo Hunkin i le moliaga mamafa o le sauaina o fanau laiti, atoa ai ma le moliaga mama e tasi o lona faia o gaioiga e ono lamatia ai le saogalemu o fanau laiti.

 

Ae i lalo o se maliliega na sainia e le malo ma le susuga a Hunkin, lea fo’i na talia e le Fa’amasinoga i le masina na te’a nei, na malie ai le ua molia e tali ioe i le moliaga mamafa o lona faia o sauaga faasaga i fanau laiti.

 

I le tali ioe ai o Hunkin i le moliaga, sa ia ta’utino ai e fa’apea, i se taimi o le aso 2 o Fepuari 2019, sa ia faaoo ai manu’a i lona nephew e 11 tausaga le matua, e ala i lona fa’aaoga o le pito mafolafola o le agaese e sasa ai lona papatua.

 

Ina ua maua le avanoa e faaleo ai sana fa’amatalaga, na faatoese ai loa Hunkin e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai e fai sona aoga i lona aiga, ma saili sana galuega e totogi ai lana salatupe.

 

Sa ia faailoa i le Fa’amasinoga e fa’apea, o masina e 7 na taofia ai o ia i le falepuipui, ua ia a’oa’oina mai ai se lesona taua i lona olaga, e le o se mea sa’o le soli o le tulafono, e le o se nofoaga lelei fo’i le toese mo ia.

 

Sa ia faailoa lona salamo moni e tusa ai o lana solitulafono, ma ua ia lagona fo’i le sese o le gaioiga sa ia faia.

 

Na lagolago lana loia fautua ia McNeill i le talosaga mo se faasalaga faanofovaavaaia, e aofia ai le fa’aaoga o le umi e 7 masina lea ua mae’a ona tuli e Hunkin i le toese e fai ma ana fa’asalaga i lenei mataupu.

 

Na faailoa e McNeill i le Fa’amasinoga e fa’apea, o Hunkin o se tagata e tautua aiga ma naunau ia lelei mea uma i le aiga, peita’i o le faalavelave e pei ona tula’i mai, o se gaioiga sa faia i le taimi na tagofia ai e ia le ‘ava malosi. Na talosaga McNeill i le Fa’amasinoga mo se avanoa e auai atu ai Hunkin i aoaoga e fesoasoani ai i le leaga o le ‘ava malosi faapea ai ma le fesoasoani e fa’atonutonu lagona o le ita o lo o aafia ai o ia.

 

Na faailoa fo’i e McNeill i le Fa’amasinoga e fa’apea, e le o toe nofo i Amerika Samoa le ali’i na a’afia i lenei mataupu, ae ua malaga atu nei o ia ma lona aunty ma aumau i Alaska.

 

Na lagolagoina e le loia a le malo ia Dunn le fautuaga a le Ofisa Faanofovaavaaia, i le tuuina atu lea o se fa’asalaga faanofovaavaaia mo le ua molia. Na saunoa Dunn e fa’apea, e talitonu le malo e agava’a le ua molia i se fa’asalaga faanofovaavaaia, ae tatau ona fa’atonuina o ia e auai i ni aoaoga e fesoasoani ai i faafitauli o le ‘ava malosi ma le tulaga o le ita.

 

A o le i tuuina mai le fa’asalaga a le Fa’amasinoga, na maua le avanoa e toe fa’atepa ai e le afioga i le ali’i Fa’amasino ia Sunia itu e lua e tusa ai o mau fa’amaonia i le mea tonu sa mafua ai lenei fa’alavelave.

 

E pei ona taua e Sunia, o le fa’alavelave lenei na mafua mai ina ua ulagia e le ali’i na a’afia le ua molia, ma i’u ai loa ina fa’aaoga e le ua molia le itu mafolafola o le agaese e sasa ai le papatua o le ali’i na a’afia ma manu’a tigaina ai o ia.

 

O nei gaioiga uma e pei ona saunoa le Fa’amasinoga, sa tutupu a o tagofia e le ua molia le ‘ava malosi. O ia o se tagata matua sa faalagolago i ai le ali’i na a’afia, peita’i ua avea lona ita ma itu na ia le iloa ai le faatulaga le tuaoi o le olaga ma mea e le tatau ona tutupu.

 

O le itu e laki ai e pei ona saunoa le Fa’amasinoga, e le i aafia le tino o le na manu’a i ni aafiaga e ono lamatia ai lona soifua.

 

Na faamanatu e Sunia ia McNeill e fa’apea, tusa lava pe laititi le alii na aafia atoa ai ma le la sootaga ma le ua molia, e talitonu le Fa’amasinoga, o le fa’aoolima lava o le fa’aoolima. Ae sili ai ona matuia, o le fa’aaogaina lea o se a’upega mata’utia e fa’atino ai lea solitulafono.

 

Na faatepa fo’i e le Fa’amasinoga le solitulafono o le faaoolima i le tulaga tolu sa ta’usala ai e le Fa’amasinoga Fa’aitumalo le ua molia i le silia i le 7 tausaga talu ai, peita’i o le itu e lelei ai, e leai se fesootaiga o lea solitulafono ma le faalavelave e pei ona ta’usala ai o ia.

 

E 5 tausaga ua faasala ai e le Fa’amasinoga le ua molia e nofosala ai i le toese i Tafuna, peita’i ua faamalumalu lona tuliina o lea fa’asalaga, ae ua nofovaavaaia nei o ia mo le 5 tausaga i lalo o tuutuuga e ao ona ia usita’i i ai.

 

O nisi o ia tuutuuga e aofia ai lona tuliina o masina e 20 i le Toese i Tafuna, e aofia ai ma le 7 masina lea ua mae’a ona ia tuliina. Peita’i ua manatu le Fa’amasinoga, ua lava le 7 masina ua mae’a ona tuli e le ua molia e fai ma ana fa’asalaga, o le 13 masina o loo totoe ai, o le a taofi lona tuliina i le taimi nei, se’i vagana ua toe tuuina atu se isi poloaiga a le Fa’amasinoga.

 

Ua poloaina fo’i o ia e totogi le salatupe e $2,000 i totonu o le tausaga muamua o lana nofovaavaaia.

 

O isi tuutuuga e aofia ai le asiasi i le Ofisa Faanofovaavaaia faatasi i le masina, aua ne’i ona toe solia se tulafono, ma ia auai i aoaoga e fesoasoani ai i aafiaga o le ‘ava malosi ma le tulaga o le ita, lea o le a faatulga e le Ofisa Faanofovaavaaia.