Ads by Google Ads by Google

Taofi le ta’avale i le solitulafono i luga o le alatele ae maua ai fualaau faasaina


[ata: SN]
ausage@samoanews.com

Pago Pago, AMERIKA SAMOA - 

 

Ua molia nei e le malo le ave ta’avale o le pikiapu lea na latou taofia i se vaega o Malaloa i le vaiaso na te’a nei, ona o lona le usitaia o tulafono tau taavale afi i luga o le alatele, ae maua ai fualaau fa’asaina i le tino o le ave ta’avale.

 

O le taeao o le aso Tofi o le vaiaso na te’a nei na tula’i ai loa le ave ta’avale i luma o le Faamasinoga Faaitumalo, o ia lea o Sauipuapuaga Lemusu.

 

Ua molia e le malo ia Lemusu i le moliaga e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, pe faasala foi i faasalaga uma ia e 2.

 

E $5,000 le vaega tupe lea ua faatulaga e totogi ona faatoa mafai lea ona tatala i tua Lemusu mai le Toese i Tafuna. 

 

O le aso Tofi o le vaiaso nei, Iuni aso 2 i le itula e 1:00 i le afiafi, lea ua fa’atulaga e faia ai le ulua’i iloiloga o lenei mataupu.

 

TAGI A LE MALO

 

E pei ona taua e le malo i le latou tagi e fa’apea, o le tagi faasaga ia Lemusu na alia’e mai i se faalavelave na tula’i mai i le afiafi o le aso Lulu o le vaiaso na te’a nei, Iuni aso 22, 2020 pe tusa o le itula e 6:04 i le afiafi, ina ua vaaia e ni alii Leoleo se to’alua sa tiute i luga o le alatele a le malo i se vaega o Malaloa se ta’avale o lo o aga’i mai i luga o le alatele e tasi le moli o loo ola i le pito i luma. 

 

Talu ai puipuiga o le saogalemu i luga o le alatele na manatu ai loa ali’i Leoleo nei e to’alua e taofi le ta’avale ma fesiligia le ave ta’avale. Na taofi e Leoleo le ta’avale i luma tonu lava o le Pamu Kesi a le Tools Shop i Malaloa ma iloa ai, o le ave ta’avale o le ta’avale lea, o le susuga lea ia Sauipuapuaga Lemusu, o ia fo’i lea ua molia i lenei mataupu. 

 

Na aga’i atu Leoleo ma faamatala ia Lemusu le mafua’aga ua taofia ai lana ta’avale, ona o lona le usitaia o tulafono tau ta’avale afi, e mafua mai i le tasi o le moli pito i luma o lana ta’avale o loo ola. ina ua fesiligia Lemusu i lona laisene ave ta’avale, na fai le au molia i Leoleo, e leai sona laisene ave ta’avale o ia te ia. E leai fo’i se isi lava ituaiga pepa faamaonia na tuu atu e Lemusu i Leoleo e faamaonia ai o ia.

 

Talu ai le faigata i Leoleo ona faamaonia poo ai tonu le ua molia, na fautuaina ai loa o ia e Leoleo, o le a taofia lana ta’avale i le Ofisa o Leoleo i Fagatogo, ae se’i faafesootai nisi o lona aiga pe maua mai ai se pepa faamaonia e faamaonia ai lona tagata.

 

A o le i auina atu le ta’avale a Lemusu, faatasi ai ma Lemusu i le Ofisa o Leoleo i Fagatogo, na muamua siaki e Leoleo le tino o le ua molia faapea ai ma lana ta’avale, ina ia mautinoa e le o i ai ni aupega poo nisi mea faasaina. 

 

Ina ua saili e Leoleo le taga o le ofu a Lemusu sa faia, na maua i ai se paipa tioata o loo tumu i vaega o le pauta faasaina o le aisa. Na fesili Leoleo ia Lemusu poo le a lea paipa tioata ma mea papa’e o loo i ai i totonu, ae na faamanino e Lemusu, o le paipa e ula ai lana aisa. Sa ia faamaonia fo’i i Leoleo, o pauta papa’e o loo i totonu o le paipa tioata, o vaega ia o le pauta faasaina o le aisa.

 

O le mae’a ai ona maua o fualaau faasaina i le tino o Lemusu, na loka ai loa e Leoleo ona lima ma ta’ita’i atu o ia e nofo i le nofoa o le pasese a lana ta’avale, ae ave e le ali’i Leoleo lana ta’avale ma latou aga’i atu i le Ofisa o Leoleo i Fagatogo.

 

A o aga’i atu le ta’avale a Lemusu ma le Leoleo, na faateia le Leoleo ina ua talanoa atu Lemusu ia te ia, e faatatau i isi fualaau faasaina o loo i totonu o le taga o lona ofu o loo faia. Na fesili le Leoleo sa faafoea le ta’avale a Lemusu ia Lemusu, poo a ituaiga fualaau fa’asaina o loo ia te ia, ae na tali le ua molia, o straws e 2 o loo tumu i vaega o le pauta paepae o le aisa.

 

Na laga e Leoleo le taga o le ofu a Lemusu sa faia ma maua mai ai straws e 2 ua uma ona ta tipi tulimanu, ae o loo tumu i vaega o le pauta faasaina o le aisa. Na faia se suega faapitoa i vaega o le pauta paepae sa i totonu o straws nei e 2 faapea ai ma le paipa tioata ma faamaonia ai, o vaega ia o le pauta faasaina o le aisa.

 

A o le i fesiligia e Leoleo ia Lemusu e tusa ai o lenei mataupu, na muamua faitau i ai ona aia tatau faaletulafono, ma faaalia ai e Lemusu lona malamalama atoatoa i ona aia tatau, ae ua ia manatu fo’i e talanoa ma tali fesili e uiga i lenei mataupu. 

 

Sa ia taua i Leoleo ina ua fesiligia o ia e fa’apea, o fualaau faasaina na maua ia te ia, na faatau mai i se alii e faigaluega i le Ofisa o le EMS i Faga’aalu i le tau e $50 i straws e 2, tusa lea e $25 i le straw e tasi. 

 

Na taua atili e Lemusu i Leoleo e fa’apea, o le alii lea lava e masani ona faatau mai ai ana fualaau fa’asaina, pe a ma le faa 2 i le vaiaso. O fualaau faasaina a le alii lea e faatau sa’o mai lava i totonu o le Ofisa o le EMS.

 

OSOFAIGA FAASAGA I LE EMS

 

O le mae’a ai ona maua e Leoleo o faamatalaga mai ia Lemusu, na latou talosagaina ai loa se faatanaga mai le Fa’amasinoga e su’e ai le ofisa o le alii lea o loo faigaluega i le EMS poo i ai ni fualaau faasaina.

 

O le afiafi o le aso Tofi o le vaiaso na te’a nei na maua ai e Leoleo le poloaiga a le Fa’amasinoga e faatino ai le osofaiga, ma latou aga’i atu ai loa i le nofoaga o le EMS pe tusa o le itula e 4pm i le afiafi o le aso Faraile na te’a nei, Iuni aso 26, 2020 mo le faatinoina o le latou suesuega. 

 

E leai ni fualaau faasaina na maua i le osofaiga, se’i vagana ai se tinoitupe e lata i le $1,000 na maua e Leoleo i le latou osofaiga.