Ads by Google Ads by Google

Talia talosaga a se tama’ita’i pagota ina ia vave tatala o ia i tua


[ata: foa'i]
ausage@samoanews.com

Ua talia e le Fa’amasinoga Maualuga le talosaga sa tuuina atu e se tama’ita’i pagota o lo o tuli lana fa’asalaga fa’a falepuipui e 28 masina, mo se avanoa e vave ai ona tatala o ia i tua se’i alu e tausi ona matua ua matutua.

 

O le vaiaso na te’a nei na tuuina atu ai e le afioga i le ali’i Fa’amasino ia Fiti Sunia lana poloaiga, e tatala ai i tua Nicole T. Maxey mai le toese i Tafuna, i le mae’a ai lea ona ia tuliina o le silia i le tausaga o lana fa’asalaga fa’a falepuipui.

 

O le ali’i loia tu maoti ia David Vargas na tula’i mo Maxey ae o le tama’ita’i loia sili lagolago ia Christy Dunn na tula’i mo le malo.

 

O afioga i ali’i Fa’amasino Lagolago ia Satele Lilio ma Suapaia Pereira na lagolago ia Sunia i le tuuina mai o lenei fa’aiuga.

 

Ina ua valaau le mataupu a Maxey i le vaiaso na te’a nei, na fa’ailoa ai e Vargas le auai o matua a le ua molia i totonu o le potu fa’amasino, mo le lagolagoina o le talosaga a le ua molia.

 

Na talosaga Vargas i le fa’amasinoga mo se avanoa e toe faia ai se teuteuga i tuutuuga o le faasalaga faanofovaavaaia a Maxey, ina ia mafai ai ona vave tatala o ia i tua e alu e tausi ona matua ua matutua ma ua gasegase fo’i, aemaise lava i si ona Tama.

 

Saunoa Vargas e fa’apea, o matua a Maxey, o i laua lava ia sa aafia i le solitulafono a le ua molia, ina ua ia gaoi mai tupe mai le pisinisi a le latou aiga ae fa’aaoga mo ia lava i se auala fa’asolitulafono.

 

Na taua fo’i e Vargas le manana’o o matua a Maxey ina ia toe fo’i atu le ua molia i le aiga, e le gata e fesoasoani ia te i laua ma tausi i laua, ae fesoasoani fo’i i le pisinisi a le aiga.

 

Ina ua maua le avanoa a Maxey mai le fa’amasinoga, na taua e Maxey e fa’apea, na matua aafia ma maasiasi lona aiga i lana solitulafono sa faia, peita’i o le umi lea na taofia ai o ia i le toese, ua ia a’oa’oina mai ai se lesona aoga mo lona olaga i le lumana’i.

 

Sa ia taua fo’i e fa’apea, e le tau faailoaina lana solitulafono, aua ua manino ma silafia e le fa’amasinoga. Sa ia gaoi mai tupe mai le pisinisi a ona matua, ae sa ia fa’aaoga fo’i tupe na gaoi mai e fa’atau ai fualaau fa’asaina.

 

Sa ia taua atili le tele o mea leaga na oo ia te ia ina ua ia tagofia fualaau fa’asaina, e le o se tulaga fo’i e fai ma alofaga lea itu ia te ia, pau lona talitonuga, ua avea lana solitulafono ua ia a’oa’oina ai se isi lesona taua mo lona olaga i le lumana’i.

 

Sa ia fa’afetaia fo’i ona matua i le fa’aauau pea lea o le la alolofa ia te ia, ma asi atu o ia i le falepuipui, talu mai lava i le ulua’i taimi na loka ai o ia seia oo mai lava i le taimi nei.

 

“Ou te le ‘alo mai la’u gaioiga sa faia, ua ou soli le tulafono ma ua ou lagona fo’i lo’u salamo ma lo’u sese. Faamolemole lau afioga i le ali’i Fa’amasino, se avanoa mo a’u se’i o’u toe fo’i atu ai i tua e tausi o’u matua ua matutua ma gasegase, ma se’i fai so’u aoga mo i laua ao maua pea lo la soifua ma le malosi,” o le talosaga lea a Maxey i le fa’amasinoga.

 

I le mae’a ai ona fa’afofoga o le fa’amasinoga i le folasaga a Vargas ma Maxey, na tolopo ai loa e Sunia le tuuina atu o se faaiuga a le fa’amasinoga mo le isi 24 itula, ma toe faaauau ai loa le mataupu seia aulia le aso Faraile o le vaiaso lava na te’a nei.

 

Ina ua toe valaau le mataupu i le taeao o le aso Faraile na te’a nei, na tuuina mai ai loa e le afioga a Sunia le faaiuga a le fa’amasinoga.

 

Saunoa Sunia e fa’apea, i le mae’a ai ona iloilo e le fa’amasinoga o mau uma e uiga i lenei mataupu, na manatu ai loa le fa’amasinoga e talia le talosaga a Maxey.

 

“E tasi lava le mafua’aga ua ala ai ona manatu le fa’amasinoga e talia le talosaga a Maxey, ona o lea ua talosaga mai e fia alu i tua e tausi ona matua ua matutua ma ua gasegase foi, aemaise lava i lona Tama,” o le saunoaga lea a Sunia.

 

“Ae fia fa’ailoa atu e le fa’amasinoga ia Maxey, e ui o lea ua talia lau talosaga, ae le aveesea ai le matuia o le gaioiga sa e faia, e ala i lou gaoi mai o tupe mai ou matua ae fa’aaoga e fa’atau ai fualaau fa’asaina, ma outou mafuta fa’atasi ai ma nisi o au uo e aofia ai alii o lo o tagofia fualaau faasaina,” o le saunoaga lea a Sunia.

 

E 12 masina lea ua mae’a ona tuli e Maxey i le toese. O masina e 16 o lo o totoe ai o lana fa’asalaga faanofovaavaaia e 28 masina sa faatonuina o ia e le fa’amasinoga e tuli i le toese, o le a faamalumalu lona tuliina i le taimi nei, ae o le a tatala loa i tua Maxey e alu e tausi ona matua.

 

“O le fautuaga malosi lenei mo oe, aua e te faia se mea e to’atama’i ai le Fa’amasinoga ia te ia. O tuutuuga uma o lau nofovaavaaia sa tuuina atu i le tausaga na te’a nei ina ua tuuina atu lau fa’asalaga, o lo o tumau pea lona malosi, e tatau fo’i ona e amanaia nei tuutuuga uma,” o le fautuaga lea a Sunia ia Maxey.

 

E tasi le isi tuutuuga na faaopoopo e le fa’amasinoga e tatau ia Maxey ona usita’i i ai, o le tuuina atu lea o lona tino e faia ai ni suega e se sui o le Ofisa Faanofovaavaaia poo se Leoleo fo’i o le malo, i soo se taimi e fa’atonuina ai o ia. Ia mautinoa fo’i na te tausisia uma isi tuutuuga o loo totoe ai o lana nofo vaavaaia.

 

O Maxey, sa galue muamua o ia i le kamupani a le CSL Cargo Services, ao le i tula’i mai le fa’alavelave e pei ona ta’usala ai o ia.

 

Na molia Maxey i le moliaga o le gaoi ma le faia o faamaumauga tau fa’atasi, e mafua mai i le fa’alavelave lea na ia gaioia ai siaki o le pisinisi a ona matua ma saini faamalosi le saini a lona Tama, ona ia alu lea ua tala siaki ae fa’aaoga tupe mo ia lava.

 

I lalo o le maliliega na sainia e Maxey ma le malo, sa ia tali ioe ai i le moliaga o le faia o fa’amaumauga tau fa’atasi. Na ioe le ua molia e fa’apea, i se taimi o le masina o Aperila 23, 2017, sa ia gaoia mai ai ni tupe mai le pisinisi a ona matua e ala i lona sainia o le saini a lona Tama, ma ia talaina ai siaki e 3 i le aofa’i e $650, $650 ma le $375.

 

O siaki nei e pei ona taua i fa’amaumauga a le fa’amasinoga, na tusia ai e Maxey lona igoa, ae saini faamalosi ai le saini a lona Tama.