O le aso 12 o Setema 2019 lea ua fa’atulaga e lau ai le fa’asalaga a se tasi o tama’ita’i sa galue i le kamupani o le Western Union, ina ua talia e le Fa’amasinoga Maualuga lana tali ioe i le moliaga sa tu’uaia ai o ia e le malo.

O Lagavale Sasa, poo Lana fo’i e pei ona iloa ai o ia e le to’atele, o ia lea e to’alua i ai tama’ita’i sa galulue i le Western Union na molia i lo la ave fa’agaoi o se vaega tupe mai le kamupani i le tausaga e 2016.

O le vaiaso na te’a nei na tula’i ai Sasa i luma o le Fa’amasinoga mo le fofogaina o le latou malilie ua mae’a ona sainia ma le malo, lea fo’i ua talia e le fa’amasinoga..

Na ulua’i tu’uaia e le malo ia Sasa i moliaga mamafa e 4 e aofia ai moliaga e 2 o le gaoi, atoa ai ma moliaga e 2 o le ave fa’agaoi o ni meatotino sa tuuina atu i lalo o lana vaavaaiga.

Ae i lalo o le maliliega na sainia e Sasa ma le malo, ua malie ai le malo latou te toe faia se teuteuga i le tagi sa latou fa’aulu, ma suia ai le moliaga e tali ioe ai Sasa, mai le gaoi i le moliaga o le taupulepule fa’atasi lea ma se isi tagata e fa’atino le solitulafono o le gaoi, o le vaega D lea o solitulafono mamafa, lea meai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

I le tali ioe ai o Sasa, sa ia ta’utino ai e fa’apea, i le aso 14 o Iulai o le tausaga e 2016 ao galue i le Western Union, sa ia fesoasoani ai i le tama’ita’i o Judy Leilua Tautalaga i le faia lea o gaioiga eseese uma ina ia mafai ai ona la ave faagaoi se vaega tupe mai le Western Union.

I le faaiuga o lea gaioiga e pei ona taua i le maliliega, na ta’utino ai Sasa i lona ave faagaoi o se vaega tupe e tusa ma le $10,000 mai le Western Union.

O lenei mataupu alia’e ina ua fesiligia e se ali’i Asia le lala o le Western Union i Nuuuli, i lana tupe e $7,000 na alu atu e lafo i Saina i le masina o Me 2016, peita’i na fiu lona aiga i Saina e fa’atali le tupe e leai se mea na maua.

Na taua e Sasa i Leoleo ina ua fesiligia o ia e fa’apea, e fa’alua ona ia faia gaioiga e gaoia mai ai se vaega tupe, ma le fa’amoemoe e fa’atumu ai le tupe lea sa gaoi e Tautalaga i le 30 aso talu ai. Na taua atili e Sasa e fa’apea, e ui ua faamalolo Tautalaga mai le galuega ona o le tupe sa ia gaioia, ae sa fa’aauau pea ona ia fesootai atu ia te ia ma talosagaina sana fesoasoani, i se auala e mafai ai ona toe faatumu tupe sa ia gaoia.

I suesuega a Leoleo na mafai ai ona maua le tulaga lea, e 2 gaioiga eseese sa faia e Sasa ma mafai ai ona gaoia le ta’i $7,000 mai le gaioiga e tasi, i le aso 10 & 14 Iuni 2016. I le mataupu a Tautalaga, e 3 gaioiga eseese sa ia faia, ma mafai ai ona ia gaoia le ta’i $7,000 mai le gaioiga e tasi, mai le aso 25 & 31 Me, atoa ai ma le aso 2 Iuni 2016.

Na taua e le ali’i Saina i Leoleo e fa’apea, sa alu i le Western Union i Nuuuli e lafo lana $7,000 i Saina i le so 25 Me 2016. O Sasa sa fesoasoani i le ali’i Saina i le fa’agaioiina o lana mataupu.

Ina ua mae’a ona totogi le tupe ma tu’u atu e Sasa le lisiti i le Saina e fa’amaonia ai le aofa’i o lana tupe ua uma ona totogi atu, sa fai ai loa Sasa i le Saina, fa’atoa kilia lana tupe i totonu o le masina atoa. Na toe alu le Saina i le Western Union ina ua tuana’i le masina, ae na toe fa’ailoa i ai e Sasa e i ai le fa’aletonu o lo o tupu ua mafua ai ona le kilia lana tupe, ae toe fa’atali mo le isi masina atoa atonu e oo atu i ai ua kilia lana tupe, ma mafai ai loa ona maua e lona aiga i Saina.

Na taua e le isi tagata Asia o lo o a’afia fo’i i lenei mataupu i Leoleo e fa’apea, o le aso 9 & 10 Iuni 2016 na alu ai e lafo lana tupe i Saina. E ta’i $7,000 le aofa’i o le tupe sa ia lafo i Saina i aso eseese ia e lua. Ina ua uma ona lafo le tupe ma tuu atu e Sasa le lisiti ia te ia, sa fai atu Sasa ia te ia, e alu atu i le isi masina atoa e toe siaki atu pe ua kilia lana tupe.

Ina ua oo i le aso 20 Iuni 2016 na fa’atonu ai e Sasa le ali’i Asia e toe alu atu ai, na toe alu ai loa o ia i le Western Union e toe siaki lana tupe, peita’i sa faailoa i ai e Sasa e toe alu atu i le aso 30 Iuni 2016, e lei kilia lava lana tupe.

I le aso 23 o Iuni, na toe alu ai loa le ali’i Asia lea i le Western Union e toe lafo le isi ana tupe, peita’i e alu atu e le o faigaluega Sasa, ma maua ai loa ma le avanoa la te talanoa ai ma le Pule, ma ia fesiligia loa i ana tupe ua silia i le masina o lafo ae lei maua lava e lona aiga i Saina.

O iina na faatoa iloa ai loa e le Pule le fa’aletonu o lo o tula’i mai, ma amata ai loa ona suesueina lenei mataupu.

E $10,000 le tupe na ta’utino Sasa sa ia gaioia, ae $14,000 le tupe na ta’utino Tautalaga sa ia gaoia.

O le masina o Me o le tausaga na te’a nei, na fa’asala ai e le Fa’amasinoga ia Tautalaga, e nofosala i le toese mo le umi e 28 masina, o se tasi lea o tuutuuga o lana nofovaavaaia e 7 tausaga, ina ua ta’usala o ia i le moliaga mamafa o le gaoi.

Peita’i, e na o le 12 masina na fa’atonu e le Fa’amasinoga ia Tautalaga na te tuliina, ae o le umi o lo o totoe ai i lana fa’asalaga fa’a falepuipui e 28 masina, o le a fa’amalumalu lona tuliina, fuafua lava i lona usitaia o poloaiga o lana nofovaavaaia, e aofia ai le aua lea ne’i ona toe solia se tulafono, atoa ai ma lona toe totogiina o le $14,000 sa ia gaoia mai i le Western Union.