Pago Pago - AMERIKA SAMOA

TAU LEAI NI TAUMAFA – AE SIITIA TAU O FUAMOA

I se ripoti mai i le Ofisa o Fefaatauaiga, ua ta’ua ai le tau leai o nisi o taumafa talu mai le masina ua tuanai, faapea ma le si’itia o le tau o fuamoa, ona o le faama’i o le ‘bird flu’ lea o lo’o tula’i mai nei i Amerika.

O se toe faamanatu lea i le mamalu o le atunu’u, i le tele o faafitauli o lo’o tula’i mai, e mafai ai ona fa’aauau pea le siitaga o tau o oloa.

O Mati 2023 sa faapea ona si’i maualuga ai foi tau o fuamoa, lea sa masani ona $2.38 ae ua $3.19 i le taimi nei.  O isi taumafa ua va’aia foi le si’itia o tau, e aofia ai fa’i, pata, sosisi, siusiu pipi, apa inu, mayonnaise, saimini (ramen) ma falaoa.

Ae o taumafa ua pa’u a latou tau, e aofia ai susu, i’a, ribs, aisikulimi, vae moa, alaisa, suka, taro, tuna ma pisupo.

Se’ia vagana ai le tau o vai taumafa, o lo’o tumau pea i lona tau masani.

E 14 faleoloa o le atunu’u, ua filifilia e le Ofisa o Fefa’ataua’iga, e aofia i a latou su’esu’ega, e mataituina ai tulaga o tau o taumafa m isi oloa.

Mo nisi faamatala e tusa ai ma tulaga o tau o oloa, e mafai ona valaau le numera telefoni a le DOC 633-0120 po o le imeli atu foi i le americansamoastatistics@doc.as.gov.

AUAI ATU FANAU TALAVOU A AMERIKA SAMOA I LE FONO FAAVAOMALO A LE 4-H

E to’a 13 totino o le faalapotopotoga a fanau talavou o le 4-H a Amerika Samoa (American Samoa 4-H Youth Council), sa maua le avanoa e auai atu i se fonotaga faavaomalo, na faataunu’uina i le laumua i Uasigitone, DC, ia Aperila 19-24, 2024. 

O lenei fonotaga faavaomalo e faia i tausaga taitasi, ma o se avanoa e mafai ona potopoto ai fanau talavou o lo’o auai i lenei faalapotopotoga o le 4-H, ma fetufaa’i i mataupu fa’alemalo, e a’oa’o ai foi fanau talavou i tulaga fa’aleta’ita’i ma o latou mauaina ai foi ni avanoa tau galuega.

O i latou sa faamanuiaina i lenei tausaga, mo le auai atu i lenei fonotaga faavaomalo, na aofia ai Fuarosa Molesi, Heavenlee Ames, Renee Dunson, Ngaire Cendrowski, Tuluiga Siaki, Lemafoe Muliipu, Ida Tatupu, Maria Dolorosa Talatau, Asifoaeuta K. Lagai, Iosefa Luamanu, Esene Su’a, Shelton Ume, ma Faagutu Salanoa. 

E to’atolu i latou sa faamanuiaina i ni sikolasipi e malaga ma auai atu i lenei fonotaga, e aunoa ma le totogia o se tupe. 

Na malaga faatasi nei fanau talavou ma nisi o taitai mai i le Kolisi a Amerika Samoa (ASCC), na aofia ai Tialavea Molly Asifoa-Lagai, Toepo Leiataua, Aliimau Petaia, Mele Faiai ma Pasia Setu.

ALOAIA E LE NHD FAIAOGA FILIFILIA O LENEI TAUSAGA

O lenei tausaga a’oga ua faapea ona filifilia ai e a’oga a Amerika Samoa ia tamaitai faiaoga o Ms. Vi Harrington, mai i le aoga tulaga muamua a Tafuna, e avea ma sui o A’oga Tulaga Muamua (junior division) faapea ma Ms. Rhoda Tuia, mai i le a’oga maualuga a Samoana, e avea ma sui o a’oga maualuluga (senior division), e faitauina ma nisi o faiaoga e to’a 100 mai totonu o a’oga e 50 i Setete ma Teritori o Amerika, faapea a’oga i Europa ma Asia, i se tauvaga fa’afaiaoga o lo’o fa’atautaia e le faalapotopotoga a le “National History Day”, e saili ai le tasi o le a filifilia e avea ma ‘Faiaoga o le Tausaga 2024’.

O le faiaoga o le a filifilia, o le a faamanuiaina o ia i se tinoitupe e $10,000.

O faiaoga uma e to’a 102, o le a mauaina se tinoitupe e ta’i $500.

Ua fa’alauiloa mai e le Faatonusili o le ‘National History Day’, o Dr. Cathy Gorn, o lenei tausaga, e faamanatuina ai le 50 tausaga o lenei polokalama.  Ma o faiaoga um aua filifilia mai i a latou a’oga, o faiaoga ua fa’aalia tulaga sili atu i totonu o le aoaoina o tala faasolopito.

O le aso 13 o Iuni, o le a faapea ona fa’alauiloaina mai ai faiaoga e to’alua ua manumalo, mai i aoga tulaga muamua (junior division) ma a’oga maualuluga (senior division).