Pago Pago, AMERIKA SAMOA - 

FA’AAUAU TAUTUA TAUSALA AMERIKA SAMOA OO I LE TAUSAGA 2021

O le tamaitai Tausala Lalelei o Amerika Samoa, Epifania Petelo, o le a fa’aauau lana tautua i le tatou Malo, e ala i lea tofiga taua, se’ia oo i le taimi e fa’atautaia ai le sailiga o se tausala lalelei o le atunuu e tula’i mai i lea tofiga taua i le 2021-2022.

Ua le na’o le tatou malo ua faia lea suiga tele i le fa’agasologa o lea tofiga taua mo talavou tamaitai, ua le fa’ataunuuina fo’i se sailiga o se tasi e tula’i mai mo le tofiga Tausala Lalelei o Samoa, ma ua fa’apena fo’i ona le faia ai ma se tauvaga Tausala Lalelei mo le Pasefika.

I le taimi nei o lo’o fa’aauau lava tiute fa’a-Tausala Lalelei o Amerika Samoa, fa’atasi ai ma tiute fo’i ua lautogia ai o ia i le Ofisa o Turisi a le tatou Malo, lea ua avea ai Minnie Tuia Tuana’itau ma latou fa’atonusili. Ua i ai polokalama fa’asolo mo ia e fa’alauiloa atili ai le aoga o lea fo’i Ofisa e fa’alauiloa le tatou atunuu ma ana measina e ofoina atu i le lalolagi o e fia maimoa ai.

O lo ua aofia fa’atasi le tatou Tausala Lalelei Epifania Petalo i le savaliga fa’aaloalo ua tuufa’atasia e igoa o le “Savali mo Lou Ola”. O se savaliga e faailoa tau ai i le fanau talavou e aoga tele lou soifua, aua le maumauina i so’o se mea o lenei olaga. Ua tapena fo’i lea fa’amoemoe ina ia fa’aitiitia ma taofia le pule i le soifua i le atunuu. Na faia fo’i se fa’asalalauga faalaua’itele o lea fa’amoemoe ma sa fa;ataunuuina lea savaliga matagofie mo i latou uma ua auau faatasi i lea fa’amoemoe lelei i le aso Toona’i na te’a nei. O nisi iloga sa auai, o le tina Peresetene fo’i o le MASI Meafou Imo ma le to’atele o le tupulaga talavou.

LEAI NI VAILA’AU TOGAFITIGA O MEAOLA I LE FALEMAI O MEAOLA

Mai le taeao o le aso Tofi na te’a nei, e tusa ma le 162 o i latou ua i ai a latou fagafao tausia lelei i o latou aiga ua mae’a oo atu i le Ofisa o le Foma’i Manu i Tafuna ma fesiligia se fesoasoani ina ia mafai ona togafitia a latou fagafao, i o latou tui puipuia ma isi tautua sa masani ona ofoina atu mo se totogi mo i latou e le tatou foma’i manu. Peita’i ua te’ena uma i latou, aua ua leai se sapalai o vaila’au ma nei tautuaina uma ua toe mafai ona okaina mai.

Ua le gata i lea ae ua i ai se fa’aaliga ua fa’apipi’a i le faitoto’a o lea Ofisa o le Foma’i Manu e fa’ailoa atu ai i le lautele lea tulaga ma ua fa’ailoa ane a i ai ni fa’asea, ia sailia ni tali mai le Ofisa o Fa’ato’aga mai le fa’atonu sili poo le sui faatonu o lea matagaluega.

“O i matou e le o se nofoaga e tausia faapitoa ai outou Fagafao, Fa’amolemole aua le Tuu Faua Mai outou Fagafao!”

Ua faailoa mai se fa’asea a se tasi o tama na oo ane ma lana fagafao o le Taifau, ma ua matua le malie lava lona loto, aua ua leai se aoga na alu atu mamao ai, ae ua leai se fesoasoani ua ia maua mo lana fagafao, ua leai ni vaila’au na masani ona auai e ia e tausia fa’apitoa ai lana fagafao.

“Ua matua faailoa atu lava, ua le toe i ai ma se sapalai o vaila’au ma tui e masani ona faia mo meaola tausia lelei i totonu o aiga, ua i’u lava ina uma lelei le sapalai a’o tu’itu’i atu pea i le a’ai o finagalo o le afioga le Fa’atonu o Fa’ato’aga ina ia amana’ia mai le tagitagi atu ua tatau ona toe aumaia se oka, ae o le oka fo’i e tatau ona faia e se tasi o foma’i manu ua mae’a laisene mai e le Malo tele. Lea la ua matua leai lava se mea e mafai ona toe faia aua e le o laisene le ali’i foma’i manu o i ai nei a le tatou malo i le Malo Tele,” o se tala lea a Tarasawa lea e faigaluega i le Ofisa o le Fomai Manu i Tafuna.

“Ina ia mafai la ona maua mai vaila’au uma nei ma tui o meaola, e tatau ona fa’afaigaluega mai se tasi o foma’i manu mai le Iunaite Setete o Amerika, e mafai ona ia okaina maia nei vaila’au ma taotoina meaola ia le toe toloa’i. E tatau lava ona tatou tausia lelei meaola, leaga o lo’o feso’ota’i na’ua tagata ma meaola i le olaga i totonu o tatou aiga. E i ai fa’ama’i e mafai ona a’afia ai tagata pe a oo ina lutia ai meaola i na fa’ama’i,” o se isi lea toe fa’apupulaga atili a Tarasawa.

Ua faifaitetele fo’i le mana’omia ina aumaia se foma’i manu, aua o lea ua toe pipisi mai nei le ma’i leaga o le Leptospirosis, lea e feavea’ia e manu ma e ono o’o mai ai i tagata. Ona o lenei fo’i ua tulaueleele i vaitau timuga, e le fa’aitiitia ai le sosolo ma pepesi o lea fa’ama’i mai meaola i tagata.

TUPE LUSI ‘MEA TOSO VA’A’ - KUATA TOLU TAUSAGA FA’ALETUPE 2020:

Ua faailoa le aotelega o le tupe lusi a le Mea Toso Va’a, lea lava e le’i mae’a ona fa’aleleia mo galuega toe lipea o va’a, ua oo atu i le $155,272. i le kuata lona tolu lenei o le tausaga fa’aletupe 2020.

O le ala lusi lava o lenei aotelega o le seleni, ona ua le toe galueaina nisi o galuega sa mata’ina ona fa’atino e le aufaigaluega i lea lava vaega o le tatou Malo.

Ona ua le toe aoga le filifili malosi lea e toso maia va’a tetele e fa’ae’e i le nofoaga e mafai ai ona faia galuega lipea i latou tino po’o totoga fo’i o va’a folau, va’a fagota ma va’a faila.

Na motusia lava le fa’aaogaina o lea filifili tele o le mea toso va’a ia Oketopa 2019 ma ua mae’a fa’ailoa mai le i ai o le seleni ua faamatuu mai e le DOI mo le toe fa’aleleia o le Mea Toso Va’a, ae le’i mae’a lava na galuega i le taimi nei.

Mai ia Oketopa na taofia ai le toe fa’aaogaina ma taumafai ai ona toe fa’aleleia le filifili tele lea e sisi ai i luga va’a e fia lipea. Ua na’o le 27,639 le aotelega o le seleni ua mafai ona maua mai le Mea Toso Va’a i le kuata lona tolu, ae sa fuafua e mafai ona latou maua mai le $400,000.

Peita’i, sa fa’aaogaina le $116,641 e le aufaigaluega ma le pulega i le Kuata tolu fo’i o lenei tausaga faaletupe e ala i totogi o le to’a 28 o tagata faigaluega, $18,134 na faaaogaina mo mea e fa’aleleia ai isi mea o le galuega e ese mai le filifili o mana’omia ona fa’aleleia, ma sapalai eseese na fa’aalu ai le $2,619 i galuega fa’akonekerate i lea lava kuata.

O lo ua fa’aauau pea lava ona faia galuega lipea mo le Mea Toso Va’a e o’o ia Tesema.

I le Lipoti a le Mea Toso Va’a mo le kuata lona tolu o lo’o fa’ailoa ai, “O le filifili lea e tosoina i luga va’a, o le tautua lea e sili ona moomia i taimi uma mo le fa’atinoga o galuega a le latou Mea Toso Va’a, a le migoi lea filifili, e le mafai uma ona fa’atino galuega lipea o va’a uma e aga’i atu mo le latou tautua.”

Ua iloga fo’i ona faigata ona maua le seleni mai le Mea Toso Va’a lava latou e totogia ai o latou tagata faigaluega, peita’i mai le tele o tausaga sa matua sili mamao le seleni sa maua e i latou mai le latou galuega nai tupe sa latou fa’aaluina a’o gaoioi le filifili tele lea o le mea toso va’a.

Ua fa’ailoa mai fo’i se tala fiafia, ua amata ona laina atu va’a ma fa’amauina o latou suafa mo galuega lipea i le taimi lava e amatalia ai ona tatala latou galuega pe a mae’a ona pasia lelei le galuega o lo’o faia nei i le filifili o le mea toso va’a. O lona uiga ua toe lauolaola mai lea tautua pe a oo ina mae’a faia ma pasia le galuega lipea o faia nei.