Ads by Google Ads by Google

Tala I Vaifanua


[ata: SN]

240 SUEGA LEAI SE TASI MAUA I LE COVID-19

 

I le lipoti na fa’ailoa mai e le fa’atonu o le Matagaluega o le Soifua Maloloina, Motusa Tuileama Nua i le fonotaga i le aso Sa na te’a nei, ua ia fa’alauiloa mai ai, “Ua mae’a faia suega e 240 i totonu o le tatou Malo nei, ae leai ma se tasi o na suega ua fa’amaonia mai ai le maua o se tasi i le COVID-19.”

 

E to’a 51 i latou o sui o galuluega e ta’imua mai ina ia fesoasoani i sailiga ma  togafitiga o i latou e tau masalomia ua atagia mai ai auga o le Coronavirus, peita’i ua le maua ai lava se tasi ua a’afia i le  Covid-19.

 

Ua faia le fa’aiuga a le Matagaluega o le Soifua Maloloina, ina ia latou fa’atinoa suega nei i le 2% o le aotelega o le faitau aofai o le atunuu ae maise lava ia i latou ua mautinoa i fa’amaumauga, e ono vave a’afia lava ona o latou gasegase o talavai ai.

 

O i latou nei o le pikia mai i le vasega o i latou e gasolo atu i a latou talavai masani fa’alemasina  i le falema’i tele i Faga’alu ma isi fo’i falema’i fa’aitumalo ma falema’i mo talavai Fa’amama Toto.

 

O i latou o le a faia tui i le vasega o e ta’imua mai i galuega fa’aola i totonu o le atunuu, ua aofia ai le vasega o Leoleo galulue, tinei afi ma isi sui mai matagaluega ta’itasi o lo’o galulue e ta’imua mai i galuega e puipui mai le lautele i le pesia i le fa’ama’i pipisi lenei.

 

Ua fa’amautu mai e le saunoaga a le Fa’atonu o le Soifua Maloloina, le mae’a tapena ai o le 240 moega mo nisi e ao ina suesueina fa’apitoa ma taofia mo le 14 aso. O le TAOA fo’i i Pago Pago o le a fa’atulaga ai le 20 moega ma le Sadies by the Sea, o le isi 80 moega.

 

Ua fa’ailoa mai fo’i e le CEO o le falema’i LBJ Medical Center i Faga’alu, ua  fa’ato’a maua mai nei totoga sa mana’omia mo le Masini Suesue ai le COVID-19, le ituaiga lea o le ABI 7500Real Time Machine,  ma o le a mae’a lelei fo’i ona fa’amautu ma le nofoaga fa’apitoa e fa’atulaga ai le masini lea, e faia ai suega fa’apitoa mo le COVID-19 i le atunuu. O le taimi nei o lo’o fa’aaogaina lava le potu suesue i Tafuna mo suega o faia nei e fa’aaogaina ai masini fou e lua o le Abbot NOW ma e maua mai le tali o suega e faia ai i le 20 minute.

 

I le maea ai ona fa’apipi’i o totoga nei o masini suesue fa’atasi ai ma le mae’a lelei ona fausia o le masini lea mo suega o le COVID-19. I le taimi foi lenei ua i ai le 38 o masini fa’amanava i le Okesene i le falemai i Faga’alu, ae o lo’o tatalia le isi 10 na oka i fafo ma ua mautu mai fo’i le i ai o le 80 vaila’au e togafitia lenei fa’ama’i i le tatou falema’i tele.

 

SOSO’O FO’I LE FA’ASA A HAWAII MO LE ISI 14 ASO

 

O le saunoaga a le alii Kovana o Hawaii, David Ige, ua fa’alauiloa atu ai i le mamalu o le setete i Hawaii, ua toe soso’o fo’i le fa’asa mo le latou setete, ma e fa’aauau lava ona fa’atautaia le suesuega ma nofo puipuia o tagata ulufale atu i le setete mo le 14 aso, ae le o tatalaina i tua e o i latou aiga. O lea tulaga  o le a aofia ai i latou uma e to’ai taunuu i Hawaii seia oo ia Iuni 30, 2020.

 

Na amata mai lenei fa’asa i le amataga o Mati 2020, ina ia mafai ona taofiofi le pipisi solo o le fa’ama’i Covid -19.  

 

Ua ia fa’ailoa fo’i, o le a toe fa’alauiloa aloa’ia mai lea fa’aiuga fa’alauaitele i se isi fa’asalalauga e le o toe mamao, ae o lo ua galulue i latou ma le nofoa a pulenuu o le setete e to’afa, ina ia tapena mai ala eseese e mafai ona tau tuumamaina ai i tagata lautele ma le vasega o aufaipisinisi lenei fa’asa o lo ua fa’aauau pea. O ni suiga e toe taumafai ai ona sologa lelei le olaga o tagata ma faipisinisi ma le fa’atautaiga o le Malo o lea setete, e toe tau fa’afo’i ai le atunuu i le mea sa i ai a’o le’i lutia le folauga i le Covid-19.

 

O lea suiga teisi i le fa’atautaiga o le fa’asa, o le a toe fofoga mai i nai aso o lumana’i nei.