Ads by Google Ads by Google

Tala I Vaifanua

MATAGOFIE FA’AFIAFIAGA A FEPULEA’I TOFIGA & STALLONE

 

“O lenei olaga, e ao ina faatulaga se taimi e fa’afiafia ai lou agaga ma lou loto ina ia le savali ma le faanoanoa, ma o’otia ai lou tagata atoa,” o se tala fiafia lea a Fepuleai Tofiga i le Samoa News ma lana fa’aaliga na faatautaia lea i le Kolisi Tu’ufa’atasi i le aso Faraile ma le aso To’ona’i.

 

E to’atele i latou na auai, ma o i latou ua fiafia i ana fa’afiafiaga, o ana fa’aupuga, ae maise o ona uiga malie e fa’anofo filemu ai lagona tiga, ae fa’aosofia lagona fiafia i so’o se isi e maimoa ma fa’alogologo ia te ia.

 

“O fa’aupuga suamalie ma le susua a lenei tagata o Tofiga se, e uma vave ai lava lota le fiafia, ae ata ma fa’amalie ai le loto i mea e tiga ai,” o se tala lea a se tasi na soso’o ma’ua nofoa a’o maimoaina fo’i le taumafaiga a nei atali’i lauiloa o Samoa. O le la’ua ata tifaga o le “Take Home Pay” e fa’atatau i le tala o le auuso na malaga i Niu SIla e piki le aniani, ma maua mai ai se tupe e fausia ai se latou fale ma ni mea aoga mo le latou aiga. Sola le uso la’ititi ma gaoi le fa’aputuga o la’ua totogi, ma ua alu e fa’aalu le aoga, ae matua misi atoa le fia fo’i mai o le uso matua ma le leai o se mea i le aiga o fa’atali atu.

 

O le ala lea o le sailia e le uso matua o le la’ititi, ma ua i’u ane ai ia Tofiga, e na te fesoasoani i le sailiga o le uso fa’amaumau oa. E tatau ona maimoaina lea ata a’o maua fo’i le avanoa.

 

AMATALIA LIKI VOLLEYBALL FA’AVAOMALO MOSO’OI

 

Ua fa’ailoa mai nei e le failautusi a le American Samoa Volleyball Association, Pona Sitagata, o le a amatalia ta’aloga faitaulia mo le Liki Volleyball Fa’avaomalo o le Vaiaso o le Moso’oi 2019, i le aso Tofi ma le aso Faraile ae fa’amae’a i ta’aloga o le sailiga o le Siamupini i lenei tausaga I le aso To’onai. O nei ta’aloga e faia i le Kanana Fou Gymnasium.

 

O ‘au masi’i mai Samoa o le ‘au malolosi a le afio’aga o Lona mai Fagaloa, Samoa.

 

Peita’i o le Ta’amilosaga Volleyball lava lea e fa’asolo e sailia ai le ‘au siamupini 2019 ma e umia fo’i le Talita i vaega ta’itasi o le Ta’amilosaga, e fa’ato’a fa’amae’a ona fa’agasolo a latou toe ta’aloga e saiia ai siamupini pe a mae’a le Liki o le Moso’oi lea o le a fa’ataunu’u i le fa’aiuga o lenei vaiaso.

 

Ua fa’atulaga fo’i le fonotaga e faia i le 12:00 i le aoauli o le aso Tofi a le Asosi Volleyball ma e tatau lava ona auai sui mamalu o Au Volleyball ta’itasi i lea fonotaga. Ua fa’atulaga le Liki volleyball lenei i le vaega o Ali’i, Tama’ita’i ma Kuini, ae o le a leai se vaega U20 e fa’atautaia i lenei tausaga.

 

2 AUFAIGALUEGA OFISA KOVANA FAAMAVAE ONA O NISI TIUTE

 

E to’alua sui i le aufaigaluega a le Ofisa o Kovana ua fa’amavae ona ua i ai nisi o la’ua galuega. O i laua ia o le sui faufautua a le afioga le Kovana i mataupu tau Faaleagaga - Tiakono Malaki Timu, ma le sui loia faufautua ia Alema Leota, lea ua fa’ailoa mai ua masi’i atu ma si ona aiga e alaala tumau i Utah.

 

O Malaki ua si’itia i lona tofi fa’alelotu i le Ekalesia Katoliko i Iliili.  O Leota sa mua’i fa’afaigaluega o se fesoasoani i le Loia Sili. Sa avea foi o ia ma totino o le komiti fa’afoe a le ASTCA.