Ads by Google Ads by Google

Tala I Vaifanua


O le va’aiga i le taumafaiga e fa’amae’a ona ta’alao ese le la’au e tulata i le toega o le sima o le a sasa’a i le aso ananafi i le auala agai i totonu o Coconut Point i Nu’uuli. [ata: Leua Aiono Frost].

TOETOE MAE’A GALUEGA SILVA CONSTRUCTION I LE A’AI O NUUULI

 

Ona ua matauina le tele o feuiuia’iga i totonu o le afio’aga o Nuuuli, i le a’ai agai i Coconut Point, ona o le taumafaiga ia le toe faaletonu le alatele fou o lo’o taumafai ona fausia ia mae’a, ae ua va’aia loa le o’o mai o le galueaina o le alatele lea i le magatolu mai le alatele e aga’i atu i Leone i sisifo ma Fagatogo i sasa’e.

 

“O lo ua toe tasi pe lua ni matou sasa’aga o le sima ona mae’a loa lea o le alatele, ua soso’o atu ai le ala o le afioaga o Nuuuli i totonu o le a’ai i le alatele o le Malo mai Fagatogo i Leone,”  se tala lea a se tasi o le pulega o le galuega a le Silva Construction o lo’o fa’akonekarate mo lenei galuega.

 

O le paluga o le sima, o lo’o fa’atautaia lea e le McConnell Dowell, ma ua iloga fo’i ua masani i latou na ma le paluga ina ia mautu le malo lelei o le fausaga o le alatele ua fa’asima atoa nei.

 

O le tala e tusa ma le taimi atofa o le galuega lenei, e ao ina mae’a lelei a’o le’i mae’a le masina o Oketopa 2019, ma o se fiafiaga la o le Silva Construction, ona e ui ina timuga tele nisi vaitau o le taimi atoa na faia ai le galuega, ae mautinoa ua suipi i latou i le taimi.

 

“E mautinoa lava ua mae’a le galuega i lona taimi na fa’atulaga i le Konekarate, o se mea lelei lea, aua e agaga i matou ina ia maua lava lea taimi, e taua fo’i le galue ma le fa’amaoni, ia fausia lelei alatele aua femalaga’iga a le mamalu o le atunu’u ae maise lava le afioaga,” o se isi lea tala fiafia mai le Silva Construction.

 

I le taimi nei, ua matua faigata lava feoaiga i Nuuuli, ona ua fa’aalatua le feoai ai o ta’avale afi i totonu o le afio’aga, a’o tapena le latou alatele i totonu o le nu’u. E ui ina omoomo na alatua, ae ua onosa’ia lava le mamalu o le afio’aga, aua e maea loa le latou ala sima lea ua toeititi uma, ona fa’afiafiaina lava fo’i lea o tagata feoa’i ta’avale uma.

 

E ese mai lea galuega o lo’o latou fa’afoea nei mo le afio’aga o Nuuuli, ae ua fa’aauau pea ona latou fonofonoa le alatele atoa lava o le atunu’u. So’o se vaipanoa o va’aia ai nisi o galulue e fa’atutumu pu ma omoomo i le alatele, ia e mautinoa, o le vaega lea a le Silva Construction o lo’o latou faia lea auaunaga. Ua mae’a mai le alatele i le fagaloa, e aofia ai Pago Pago, ae ua i ai nei i Futiga e aga’i atu i Leone.

 

Ua fa’ailoa fo’i e le o aofia i a latou galuega fa’atutumu omoomo ma pupu o le alatele le alatele o Malaeloa ma Taputimu. O alatele na ua ese lava le tauofoga o lo’o ua fa’atautaia nei, mo le galueaina o alatele o na afio’aga e le Matagaluega o Galuega Lautele a le tatou Malo.

 

AMATA ONA TOE MAUA LAISENE AVETA’AVALE

 

Ua toe amata nei ona taua’aoina mai Laisene Aveta’avale I le Ofisa o Ta’avale Afi [OMV] a le Matagaluega o Leoleo i Tafuna. 

 

Ua fa’ailoa e le Komesina o Leoleo, Le’i Sonny Thompson ia i latou o lo’o umia pea lisiti o latou laisene ave ta’avale i le taimi nei, ina ia o’o ane loa i le OMV mo le taua’aoina atu o lou Laisene.

 

Mo i latou uma o le a malaga i fafo i se taimi e le o toe mamao, e fautuaina lava i latou ina ia tapena mai uma lipoti e ao ina fa’amaonia ai le pu’eina o sou laisene fou, ina ia mafai loa ona taua’aoina lou laisene ae le’i malaga.

 

TAGATA FAIGALEUGA OFISA O LE KOVANA

 

O le tupe fa’asoasoa a le Ofisa o le Kovana mo le Tausaga Tupe 2020 e $4.9miliona ma e tusa ma le 70 tagata faiglauega. Ma e $3.1miliona o le a fa’aalu lea mo tagata faigaluega tumau, ae na’o le 419,000, o lo’o fa’atulaga o tagata fa’akonekarate. E $187,000 e fa’aaoga lea mo mea uma e fa’aaoga i le fa’atautaiga o tiute o le aufaigaluega, ma isi mea uma ua fa’aalu ai le $352,000.

 

O totogi o le Kovana ma le sui Kovana e pei ona fa’atulaga i le tulafono e $85,000. mo le Kovana, ae $75,000 mo le sui kovana.

 

O le totogi ua fa’atulaga mo le FY2020 mo le Pule o le Aufaigaluega a le Ofisa o le Kovana e $75,000 e tutusa ai i latou ma Loia Fautua a le Kovana ma le Fesoasoani Sili a le Kovana, lea e tula’i ai Iulogologo Joseph Pereira i le lenei vaitaimi.

 

O le fesoasoani a le Pule o le Aufaigaluega a le Ofisa o le Kovana ua fa’atulaga le totogi i le $70,000 ma le fesaosaoni a le Lutena kovana, Pule o le Oifsa o le Kovana  fa’apea ma le Ofisa Sinia o le Ofisa o le Kovana, ua tula’i mai totogi i le $85,000.

 

O le aufaigaluega totogi i le ta’i $60,000 ua aofia ai le Teutupe a le Ofisa o le Kovana ma le sui e vaaia le fa’asoaga o le Tupe CIP/ Polokalama Fa’apitoa a le Kovana. Totogi o le Failautusi a le Kovana e $55,000, ae o le Fesoasoani faa’pitoa a le Lutena Kovana e $50,000.

 

Failautusi a le Lt. Kovana, Sooupu a le EOB Manu’a ma le Faufautua Fa’ale-aganu’u ma le itu faaleagaga mo le tausaga fa’aletupe fou 2020, e ta’i $45,000.

 

E to’afitu isi tagata faigaluega a le Ofisa o le Kovana ua lisia mai i le ta’i $40,000 e aofia ai le Fautua i tulaga Tau le Aiaiga Fa’ale-Aganu’u, 2 sui fesoasoani i le Lutena Kovana, sui e feagai ma Suesuega a le Immigration; Sui e va’aia le Uepesite a le Malo; ma sui e to’alua e fesoasoani i Polokalama Fa’apitoa a le Kovana ma le fesoasoani i le pulega o le Ofisa o le Kovana.

 

O le Sui e nafa ma le va’ava’aiga o ta’avale a le malo i luga o le alatele, ua lisia le totogi e $35,000. ao le sui e fesoasoani i le Financial Officer e $38,000. fa’apena fo’i ma le totogi o le isi fesaosoani o lisia mai ai, i lea lava tofiga.

 

O le totogi sili ona maulalo ua lisia mai o le tama’ita’i tali telefoni ma fa’afeiloa’ia le mamalu e gasolo atu i le Ofisa e na’o le $16,000. lona totogi ua talosagaina.