Ads by Google Ads by Google

Tala I Vaifanua


O se va'aiga i le vasega o Leoleo ma le latou fa'auluuluga, Komesina o Leoleo, Le'i Sonny Thompson, lea ua toe manatu ia maua nisi e fa'aopoopo i le aufaigaluega,ina ia malupuipuia le atunu'u, ona tagatanu'u, i latou uma o galulue ma nonofo ai, ae maise pisnisi, aseta ma mea totino ma lona talafatai. [ata: Leua Aiono Frost]

SUEGA TUSITUSI - MO I LATOU FIA AVEA MA LEOLEO

 

O i latou uma ua mae'a ona talsoaga ma pasia e le Matagaluega o Tagata Faigaluega a le Malo ina ia sauni e avea ma Leoleo o le Malo, ua fa'alauiloa e le Komesina o Leoleo, Le'i Sonny Thompson, ua tatau ona mae'a su'ea le su'ega tusitusi a i latou e fia ulufale i le isi vasega fou mo Leoleo le aso ananafi, Aperila 22. Sa faia lea su'ega i le potu fono o le Matagaluega o Tina & Tupulaga i Pago Pago.

 

E 223 i latou ua mae'a fa'amaonia mai e le Matagaluega o Tagata Faigaluega, sa talosaga e fia avea ma Leoleo.  E le'i fa'alauiloa aloa'ia mai se aofa'iga o i latou olo'o tausailia e aofia i lenei vasega fou o leoleo, ae ua mae'a fa'ailoa mai, o vasega fa'apitoa mo lenei tausaga e amatalia lea i le fa'aiuga o Me 2019.

 

Na fa'amaonia le tulaga le lava o leoleo i le teritori, i le saunoaga fa'apitoa a Le’i i le tatalaga o le latou Ofisa Autu Fou i le taulaga, lea sa ia fa'apea ai, "O le taimi nei, o lo'o fa'agaoioia le Matagaluega lenei i le na'o le 47 - 48% o le aotelega o le aufaigaluega sa tatau ona fa'agaoioia ai i lona atoaga o le auaunaga. Peita'i e ao ina fa'aatoa pe latalata fo'i i ai le aotelega o leoleo galulue, ina ia mautinoa ua malu puipuia le faigamalo fa'atasi ma le aotelega ole atunu'u mai le teleo fa'aletonu e ono tutupu mai ma sofa'i ai le nofo filemu, ma le saogalemu o le atunu'u atoa ma ona tagatanu'u."

 

Sa fa'aleo fo’i e Le’i le manaoga tupito o ali'i ma tama'ita'i leoleo, ina ia si'itia le totogi o leoleo ia talafeagai ma le latou galuega, o le puipuia o le atunu'u ae maise fo'i, ia taumafai mai le malo e totogia ovataimi o nai leoleo o loo tiute lava ma le le leoa, i taimi uma o Fu'a ma isi mea uma e fa'atino a le Malo i itula ua mae'a ai taimi faigaluega masani.

 

O le to'atele o nisi leoleo, ua fa'amavae ma ua malaga atu i fafo e faigaluega ai, ona o le faigata lava o le fa'asoa e le lava ona tausia ai latou aiga. O nisi ua toe suia galuega aua e sili atu latou totogi e maua i nisi matagaluega nai lo le avea ma leoleo.

 

O le manatu fa'aalia o le afioga le Komesina sa fa'atutu tonu lava i le ta'ita'iga o le Malo, i lana afioga le  Sui Kovana Lemanu Peleti Mauga, ma le Faigamalo.

 

JASON KIM - AVEA MA PULESILI O LE STAR KIST SAMOA

 

O le vaiaso ua te’a na fa'alauiloa e le Star Kist Samoa fuafuaga e suia le ta’ita’i o le kamupani. Lea o le a mavae atu le susuga Sangdong Kwon lea sa avea ma pulesili talu mai le 2014. Ma o le a suia le pulesili i le susuga ia Jason Kim, amata ia Me 1, 2019.

 

O le tautua a Kim sa mua'i avea o ia ma Deputy General i le StarKist Samoa atoa, ma o lana tautua lea ua atoa ai le 27 tausaga o lo'o galue ai pea.

 

O Kwon, o le a toe taliu o ia i le Dongwon, o le kamupani e pulea le StarKist.

 

Saunoa ia Andrew Choe, Peresetene/CEO o le StarKist, "O Mr Kwon ua iloga lana tautua matavela i le StarKist Samoa i nei tausaga e lima na galue ai i le tatou Kamupani ma e tatau fo'i ona avatu fa'amanuiaga mo ia, o le fa'afetai fo'i mo lana tautua, a'o toe taliu atu i Dongwon."

 

AMTALIA VAIASO FA'APITOA STEAM -  ASO MO LE  LALOLAGI

 

E masani i tatou uma i le fa'amanatuina o le aso e tasi e avea ma aso fa'apitoa o le STEAM, peita'i, o lenei tausaga ua galulue fa'atasi le fanau a'oga ma faia'oga ina ia fa'asolo lea fa'ataua mo le Science, Technology, Engineering, Arts & Mathematics mo le vaiaso atoa lenei.

 

Ua fa'atulaga le amataga o le fa'amoemoe mo le STEAM e tatala i galuega fa'atino e fa'ataua ai le tatou Lalolagi, o se aso taua tele fo'i i le Iunaite Setete ma ona Teritori, fa'apea ma atunu'u uma o le lalolagi atoa.

 

Ua fa'atulaga la aso ta'itasi o lenei vaiaso atoa, e faia ai mea eseese e le fanau i a'oga ta'itasi. E aia folasaga i totonu o potu a'oga, polokalama mo faia'oga, asiasiga a fanau a'oga, fa'atauvaga a fanau a'oga i mataupu ua lisia i le STEAM, ae maise o le tauvaga a fanau a'oga i le ituaiga masini e mafai ona fa'asavali i lalo o le vai ma tapu'e ai ata o le alititai. O lea ituaiga o poloketi sa malaga mai ai se tasi o a'oga mai Amerika i le tausaga talu ai, ma fa'amaimoa le to'atele o fanau a'oga maualuluga, i la latou poloketi na manumalo i le tauvaga aa'oga maualuluga uma a le Iunaite Setete.

 

TOE MANATUA NISI NA MALILIU FU'A 198 0NA PA'U AI LE VA'ALELE

 

I le Sisigafua Amerika Samoa i le tausaga 1980, na tupu ai se fa'aletonu, ma sa to'atele i latou na ufitia i le ao pogisa o fa'anoanoaga, ona o le va'alele ale militeri na pa'u ma pa, a'o fa'atoulu mai ali'i fitafita i parasuti ina ia avea ma mata'aga o lea sisigafu'a.

 

Ua tutula'i le Ma'a Fa'amanatu i nei sui uma na maliliu i le tumutumu mauga o le Maugao Ali'i. Peita'i i lenei tausaga, ua fa'amanatu mai ai e le aiga pese o se tasi o i latou na maliliu ai, lea nofo fa'anoanoa, ma ua latou fa'ailoa, "O lo'o matou manatua pea le Sisigafu'a a Amerika Samoa 1980, na maliu fa'afuase'i ai lo matou tuagane pele, Tom Montis, na'o le 20 ona tausaga, a'o se ali'i avonics technician, sa i ai i luga o lea va'alele a le Militeri na pa'u ma mu i Utulei, Pago Pago, Amerika Samoa. O lenei fo'i aso, ua fa'amanatuina ai e i matou lona ola."

 

O le ama'ita'i na fa'ailoa lenei fe'au fa'anoanoa o le tuafafine o le ali'i Fitafita, Chris Del Viscio Montis, ma sa ia fa'aaogaina mai ala o feso'ota'iga a le Facebook. O le aofaiga o i latou na maliliu i lea fa'alavelave e to'a fitu.

 

O le va'alele lea a le Militeri sa fa'amautu i le Mofett Field Naval Station, Kalefonia. Na fa'afaigaluegaina na te fa'apa'u'u maia le to'aono o ali'i fitafita i Parasuti i le Malaeoletalu i Fagatogo a'o faia fiafiaga uma o le Sisigafu'a o lene tausaga 1980. O le to'atolu o ali'i i parasuti na fa'apau'u muamua e le'i maliliu ae na fesasia'i le ogaeleele e tulaueleele i ai ina ia fa'apa'u'u mai. Peita'i o isi e to'atolu, lea sa aofia ia i latou ua pa le va'alele ina ua pa'u i le faletalimalo i Utulei, a'o i ai pea i totonu o le va'alele. O le Uaea o le Cable Car po'o le Ato na lavea ai le siusiu o le va'alele, na mafua ai ona pa'u ma tifa atu ai aga'i i le faletalimalo.

 

I lenei tausaga, na poloa'ia ai e le afioga le Sui Kovana Lemanu Peleti Mauga, le Ofisa o Turisi a le tatou Malo, ina ia latou tapena ma fa'atulaga se sauniga i le nofoaga o lo'o ua i ai le ma'a fa'amanatu mo nei sui e to'afitu, e taualoa ai le latou sao mo le Sisigafua a Amerika Samoa, peita'i ua amia ai ma o latou soifua.