Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

MATTHEW TAFUA

 

Ua talia e le afioga i le ali’i Fa’amasino ia Fiti Sunia le talosaga na fa’aulu e le tama’ita’i loia fautua lagolago ia Anna Wells mo se avanoa e fa’aitiitia ai le tupe e tatala ai i tua Matthew Tafua mai le toese i Tafuna.

 

E $10,000 le tupe na fa’atulaga e le fa’amasinoga e tatala ai le ua molia i tua, ae i le mae’a ai o le isi ana iloiloga i le vaiaso na te’a nei, na fa’aititia ai loa i le $5,000.

 

Na taua e le loia a Tafua i le fa’amasinoga e fa’apea, afai ae tatala le ua molia i tua, o le a auai o ia i soo se taimi e valaau ai lana mataupu, o le a mautinoa foi e le mafai ona fesoota’i atu o ia i molimau a le malo.

 

Na tete’e le loia a le malo i le talosaga e fa’aitiitia le tupe e tatala ai i tua Tafua. Na taua e le loia a le malo ia Laura Garvey e fa’apea, o le tupe ua mae’a ona fa’atulaga e le fa’amasinoga, ua talafeagai lelei ma le matuia o moliaga o lo o tu’uaia ai e le malo Tafua. Na finau malosi Garvey ina ia fa’atumau le tupe i le aofaiga o lo o i ai.

 

Ae i le mae’a ai ona iloilo e le afioga i le ali’i Fa’amasino ia Sunia o talosaga a itu e lua, na ia fa’aitiitia ai loa le tupe mai le $10,000 i le $5,000. Sa ia toe fautuaina fo’i ia Tafua, afai ae mafai ona tatala o ia i tua, ia usita’i i tuutuuga uma ua mae’a ona tuuina atu e le fa’amasinoga.

 

O le aso Faraile o le vaiaso nei, Oketopa 5, 2018 lea ua fa’atulaga e faia ai le ulua’i iloiloga a Tafua.

 

O lo o tu’uaia e le malo ia Tafua i moliaga mamafa e 4, e aofia ai moliaga e 2 o le faia o fa’amaumauga tau fa’asese, atoa ai ma moliaga e 3 o le taliaina o tupe i ni auala faaalatua.

 

O ia moliaga na afua mai i le taimi a o galue o ia i le Ofisa o Ta’avale Afi a le malo i Tafuna (OMV), lea na ia tuuina atu ai ni laisene ave ta’avale pepelo ni avetaavale eseese ae totogi tupe i auala fa’aalatua.

 

Na taua e se tasi o ave ta’avale i Leoleo, e $60 sa ia totogiina ia Tafua mo lana laisene ave ta’avale pepelo, ae $60 fo’i sa totogi e lana uo ia Tafua mo lana laisene ave ta’avale.

 

NOFOVAAVAAIA LE ALI’I GAOI

 

O le ali’i e 25 tausaga le matua lea na ta’usala i moliaga o le gaoi, e mafua mai i lona gaoiina o se laptop mai se aiga i Vaitogi, ua faanofovaavaaia o ia mo le 5 tausaga i lalo o tuutuuga faapitoa e ao ona ia usita’i i ai.

 

Na ulua’i molia e le malo ia Tafilele Tei i moliaga mamafa e 2 o le gaoi ma le talepe fale i le tulaga 2. Ae i lalo o se maliliega na latou sainia ma le malo, sa ia tali ioe ai loa i le moliaga o le gaoi, ae solofua e le fa’amasinoga le moliaga na totoe ai i le tagi a le malo.

 

I le tali ioe ai o Tei i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 21 o Fepuari 2018 i Vaitogi, sa ia gaoia ai se laptop mai se fale o se aiga ma fa’atau atu i se tasi o ana uo.

 

O le vaiaso na te’a nei na tula’i ai Tei i luma o le fa’amasinoga maualuga mo le lauina o lana fa’asalaga. Ina ua maua lona avanoa mai le fa’amasinoga, sa ia fa’atoese ai i le malo o Amerika Samoa e tusa ai o lana solitulafono. Sa ia fa’atoese fo’i i lona nu’u, ekalesia, aemaise ai lona aiga ona o le solitulafono ua mafua ai ona saisaitia o ia i le toese.

 

Na taua e Tei i le fa’amasinoga lona salamo moni, ma ua ia mana’omia fo’i se avanoa e toe fo’i atu ai i lona aiga e tausi ona matua ma ona tuafafine.

 

Na tutu fa’atasi loia e finau i le fa’amasinoga ina ia fa’anofovaavaaia Tei, e aunoa ma le toe tuuina atu o se isi taimi na te tuliina i le toese, ae fa’aaoga masina na taofia ai o ia i le falepuipui e fai ma ana fa’asalaga i lenei mataupu.

 

O se tasi o tuutuuga o le nofovaavaaia a Tei, o lona tuliina lea o masina e 20 i le falepuipui, peita’i fai mai le fa’amasinoga, ua lava masina e 6 e tuli e Tei i le falepuipui. O le 14 masina o lo o totoe ai, o le a fa’amalumalu lona tuliina. E tusa ai ma fa’amaumauga a le malo, ua silia i le 6 masina talu ona taofia Tei i le toese i Tafuna, lona uiga la, ua tatalaina nei o ia i tua.

 

O le isi tuutuuga o lana nofovaavaaia, e 90 aso e tu’u atu e saili ai sana galuega tumau, pe afai ae tatala o ia i tua. Afai ae mae’a le 90 aso e le i maua sana galuega, ona toe taofia loa lea o ia i le falepuipui e tuli fa’amae’a le umi o lo o totoe o le 20 masina.

 

ALESANA VALOSAGA

 

E 12 masina lea ua faanofovaavaaia ai e le fa’amasinoga fa’aitumalo le ali’i o Alesana Valoaga, ina ua ta’usala o ia e le fa’amasinoga i moliaga mama o le fa’aoolima i le tulaga tolu. I le talia ai e le fa’amasinoga fa’aitumalo o le tali ioe a Valosaga i le faaoolima i le tulaga tolu, na solofua ai loa moliaga e 2 sa totoe ai i le tagi a le malo, le moliaga o le faatupu vevesi i nofoaga faitele ma le faaleagaina o meatotino i le tulaga 2.

 

O le mataupu e pei ona ta’usala ai Valoaga, na afua mai i se fa’alavelave na tupu i le aso 10 o Me o le tausaga nei, ina ua ulufale faamalosi Valoaga i le fale o se alii la te tuaoi e ala i lona kiki o le faitoto’a pito i tua o le fale, ma fa’aoolima ai i lea ali’i.

 

Sa ia lafo fo’i ni upu tau fa’amata’u ma folafola le fasiotiina o lea ali’i ma lona aiga. O le vevesi na tula’i mai i le tuaoi o le fanua, seia oo ai lava ina tula’i mai le fa’alavelave e pei ona ta’usala ai e le fa’amasinoga ia Valoaga.

 

Na fautuaina e le afioga i le ali’i fa’amasino ai Fiti Sunia ia Valoaga, e le tatau ona ia toe fa’atinoina lea ituaiga gaoiga matuia fa’apea. Ana faapea e matuia manu’a na a’afia ai le ali’i na manu’a, atonu e mamafa fo’i ni moliaga e molia ai e le malo ia Valoaga.

 

Ua fa’asa e le fa’amasinoga ia Valoaga ona toe alu i le fanua poo le fale o lona aiga tuaoi, fa’asa fo’i ona ia toe taumafai e fa’afeso’ota’i o ia ma lona aiga, a ia avea o ia ma tagatanu’u lelei e usita’i i tulafono a le malo i taimi uma.