Ads by Google Ads by Google

Tala otooto o Fa’amasinoga

ausage@samoanews.com

MOLIA SE ALI’I I LONA FASI FA’AMO’AMO’A O LONA TO’ALUA

 

Na taofia e Leoleo i le vaiaso na te’a nei se ali’i e 39 tausaga le matua, ina ua ia fasi fa’amo’amo’a i lona to’alua ao matamata i ai lana fanau. Na ‘ona le ua molia i le taimi na ia fa’atinoina ai lenei solitulafono.

 

O le aso Faraile na te’a nei na tula’i ai i luma o le fa’amasinoga fa’aitumalo le ua molia, na ia teena ai moliaga mama e 2 ua tu’uaia ai o ia e le malo, le moliaga o le faaoolima i le tulaga tolu, ma le moliaga o le fa’atupu vevesi i totonu o lona aiga.

 

Na toe tatala i tua le ua molia e aunoa ma se tupe e totogi, ae talu ai tulaga fa’aletonu i ona pepa nofomau, na mafua ai loa ona faia le poloaiga ina ia tatala o ia i lalo o le vaavaaiga a le Ofisa o Femalagaaiga, se’i mae’a ona fa’afou muamua ona pepa nofomau.

 

O le fa’alavelave na tofu atu i le Ofisa o Leoleo i Tafuna ina ua logo e nisi o le aiga o le fafine Leoleo mo se fesoasoani, e mafua mai ina ua maitauina manu’a tuga i le tino o le fafine. Na taua e molimau i Leoleo e fa’apea, na fasi e le ua molia lona to’alua i le taeao o le aso Tofi, ona alu ai lea o le ua molia ua fai lana inugapia, toe fo’i atu ai loa i le afiafi ma toe fasi fo’i le fafine a o moe o ia i totonu o le fale.

 

Na taua e le ua molia i Leoleo e fa’apea, o le fa’alavelave na mafua mai ina ua maua atu lona to’alua ma se isi tamaloa i totonu o le la fale e le la fanau, ma mafua ai loa ona tula’i mai le loto tiga ia te ia.

 

Ua tuuina atu nei le mataupu a lenei ali’i e fofogaina i luma o le Fa’amasinoga o Aiga, Fualaau Fa’asaina ma le Avamalosi.

 

TAAI TAUTEFE’E

 

E 120 aso lea ua fa’asala ai e le fa’amasinoga faaitumalo le ali’i o Taai Taufete’e e taofia ai i le toese, ina ua fa’amaonia lana solitulafono a o faanofovaavaaia o ia mo isi fo’i solitulafono sa ia faia i le tausaga na te’a nei.

 

O le fa’asalaga fa’a falepuipui a Taufete’e na tuuina mai e le afioga i le ali’i Fa’amasino ia Fiti Sunia i le vaiaso na te’a nei, o le a aofia ai ma aso e 46 lea ua mae’a ona ia tuliina talu na taofia mai o ia i le toese i le aso 2 Iuni, 2018.

 

Na ta’usala Taufete’e i le moliaga o le tu fua i le fanua o le isi aiga atoa ai ma le faia o gaioiga e lamatia ai le saogalemu o fanau laiti.

 

Na fa’atoese le ua molia i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai e tausi lona aiga. Sa ia fa’atoese fo’i i aiga ma i latou uma na a’afia ona o lana solitulafono.

 

Na tutu fa’atasi loia a itu e lua ina ia faasala le ua molia i se fa’asalaga faanofovaavaaia e 18 masina, e aofia ai tuutuuga o lona auai lea i aoaoga e fesoasoani ai i le fa’afitauli o le ‘ava malosi o lo o a’afia ai o ia.

 

Saunoa Sunia e fa’apea, o le solitulafono e pei ona ta’usala muamua ai Taufete’e i le tausaga na te’a nei, na mafua mai ina ua ia fa’aleaga le faitoto’a tioata o se faleoloa. O le solitulafono lea ua ta’usala ai nei o ia, na mafua mai ina ua ia alu fua i le fanua o le isi aiga ma taumafai e fa’afefe tamaiti laiti o le aiga e aofia ai ma lona faia i ai o ni folafolaga tau fa’amata’u. O ia uma gaioiga sa faia a o ‘ona o ia.

 

Na faailoa e Sunia ia Taufete’e, afai e le mafai ona ia teena le fa’afitauli o le ‘ava malosi o lo o a’afia ai o ia, e i ai le taimi o lona olaga i le lumana’i e a’afia ai o ia i se fa’alavelave e sili atu ona matuia, e le gata e ono aafia atu ai ma se soifua o se isi tagata, ia poo le ma’imau ai fo’i o lona soifua.

 

O ni isi o tuutuuga o le nofovaavaaia a le ua molia e 24 masina, o le fa’asa lea ona ia toe tagofia le ‘ava malosi, a ia auai i aoaoga faufautua e fesoasoani ai i le fa’afitauli o le ‘ava malosi ma fualaau fa’asaina.

 

OLOALUGA VILIAMU

 

O le ali’i lea na tu’uaia e le malo i lona umia fa’asolitulafono o vaega o le fualaau fa’asaina o le aisa, ua ia ta’utino i le fa’amasinoga e fa’amaonia tu’uaiga fa’asaga ia te ia.

 

I lalo o se maliliega na sainia e Oloaluga Viliamu, 28 tausaga le matua ma le malo i le vaiaso na te’a nei, na tali ioe ai le ua molia i le moliaga lea ua toe teuteu e le malo, o le umia fa’asolitulafono lea vaega o le pauta fa’asaina o le aisa.

 

I le tali ioe ai o Viliamu i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 25 Aperila o le tausaga nei, sa ia umia faasolitulafono ai se paipa tioata o lo o i ai vaega o le pauta fa’asaina o le aisa i totonu. Sa ta’utino atili le ua molia e fa’apea, o lana gaioiga sa faia i lea aso sa le tusa lea ma ala o le tulafono.

 

O lo o taofaia pea le ua molia i le toese i Tafuna ina ua le mafai ona ia totogi le tupe e $5,000 na fa’atulaga e tatala ai o ia i tua, e fa’atali ai le aso 23 Aokuso lea ua fa’atulaga e lau ai lana fa’asalaga.

 

NOFOVAAVAAIA LE ALI’I NA FA’AOOLIMA I LE AVE TAXI

 

E 12 masina lea ua nofovaavaaia ai se ali’i e 48 tausaga le matua, e mafua mai ina ua fa’amaonia le moliaga o le faaoolima fa’asaga ia te ia, e tusa ai o le fa’alavelave lea na ia fa’aoolima ai i se ave taxii luma o se faleoloa i Tafna.

 

O se vevesi na tula’i mai i le va o le ali’i o Alfred Amituana’i ma lona faletua i luma o se faleoloa i le aso 21 Novema 2017, na mafua ai ona taumafai atu se ali’i ave taxi e taofi le ua molia mai lona pa’i atu i lona faletua, peita’i na faliu mai i tua Amituana’i ma tu’i loa le ali’i ave taxi ona o le taumafai fua e taofi o ia.

 

Na faatoese Amituana’i i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia fa’atoese fo’i i le ali’i na a’afia i lenei mataupuo.

 

O ni isi o tuutuuga o le nofovaavaaia a Amituana’i, o lona tuliina lea o aso e 30 i le toese i Tafuna, ma totogi le salatupe e $100.