Ads by Google Ads by Google

Tala otooto o Fa’amasinoga

ausage@samoanews.com

TITIULA TAGALOA

 

O le vaiaso nei na pu’e fa’apagota ai e Leoleo se tama’ita’i ua silia i le 2 masina o tau sailia e le Fa’amasinoga Maualuga, e mafua mai i lona le oo atu i le taimi na valaau ai lana mataupu, atoa ai ma lona le usitaia o tuutuuga na tatala ai o ia i tua i le mae’a ai lea ona ia totogi o le tupe e $30,000 na fa’atulaga e le fa’amasinoga.

 

O le aso Lua o le vaiaso nei na pu’e fa’apagota ai e Leoleo ia Titiula Tagaloa i lalo o se poloaiga mai le afioga i le Fa’amasino Sili ia Michael Kruse, ma tula’i ai loa o ia i luma o le fa’amasinoga i le aso Lulu o le vaiaso nei lava.

 

O le tama’ita’i loia sili lagolago ia Christy Dunn o loo tula’i mo le malo i lenei mataupu, ae o le ali’i loia fautua ia Michael White o loo tula’i mo Tagaloa.

 

Ina ua valaau le mataupu, na fa’ailoa e White le tete’e o Tagaloa i tu’uaiga fa’asaga ia te ia, ma ia talosagaina ai loa le fa’atulagaina o se aso e faia ai le iloiloga autu o lenei mataupu.

 

A o le i tolopo le mataupu a Tagaloa, sa naunau le fa’amasinoga e fia malamalama i le tulaga tonu o le a oo i ai le tupe lea na totogi e tatala ai le ua molia i tua, lea ua fuafua le fa’amasinoga e fa’aleaoga.

 

Na fa’amanino e Kruse ia White e fa’apea, o le tupe na totogi, na auala atu i ta’avale e 4 mai aiga o Tagaloa. Ae afai e fa’aaoga e le fa’amasinoga lona malosi i lalo o le tulafono e fa’aleaoga ai tuutuuga na tatala ai Tagaloa i tua, o le mea moni, o le a le toe maua e aiga nei a latou ta’avale, ae o le a i lalo uma o le fa’amasinoga.

 

Na faailoa atili e Kruse ia White ma Dunn, e tatau ona logo aiga e ana ta’avale ia na fa’aaoga e tatala ai Tagaloa i tua, ina ia oo atu i le aso lea ua fa’atulaga e toe faia ai le iloiloga o lenei mataupu, ina ia latou silafia ai le tulaga tonu e oo i ai a latou meatotino.

 

O le masina o Setema o le tausaga na te’a nei na taofia ai e Leoleo ia Tagaloa ma molia o ia i le moliaga mamafa o le umia fa’asolitulafono o vaega o le pauta o le aisa. O ni isi o tuutuuga na tatala ai o ia i tua, ia alu e vaai le ofisa faanofovaavaaia i masina ta’itasi, ma aua ne’i ona toe tagofia fualaau oona poo le ‘ava malosi.

 

Na taua e le Ofisa Faanofovaavaaia e faapea, talu mai le taimi na tatala ai Tagaloa i tua ia Setema o le tausaga na te’a nei, e le i oo atu lava e vaai le Ofisa Faanofovaavaaia. Ona o lea tulaga, na talosagaina ai loa e le Ofisa Faanofovaavaaia se poloaiga a le fa’amasinoga e fa’aleaoga ai tuutuuga o loo tatala ai o ia i tua.

 

O le aso 6 Aperila o le tausaga nei na fa’atulaga ai le ulua’i iloiloga a Tagaloa, peitai na toe tolopo lana mataupu e toe fofogaina ia Aperila 22. I lea iloiloga, na faailoa ai e Kruse ia Tagaloa, e tatau ona toe oo ane ia Aperila 25 e iloa tonu ai le faaiuga o lana mataupu. Sa faatonuina fo’i o ia ina ia faia le suega i le aso Faraile lava lea (Aperila 22), ina ia iloa ai poo ia usitaia le tuutuuga e faasa ai ona ia tagofia fualaau fa’asaina.

 

Talu mai le aso 22 Aperila, e le i toe oo atu lava Tagaloa i le fa’amasinoga. O le suega fo’i sa faia, na fa’amaonia ai lona fa’aaogaina pea o le pauta oona o le aisa.

 

Ua taofia nei Tagaloa i le toese e aunoa ma se tupe e tatala ai o ia i tua, e fa’atali ai le aso o lana fa’amasinoga autu, lea ua fuafua e faia i le fa’aiuga o le tausaga nei.

 

LEWIS LOKENI

 

O le aso 28 Setema lea ua fa’atulaga e toe tula’i ai le ali’i o Lewis Lokeni i luma o le fa’amasinoga maualuga, i le mae’a ai lea o lona teena o tu’uaiga fa’asaga ia te ia i le vaiaso nei. Na fa’aagafua e Lokeni ona aia tatau fa’aletulafono, ma ia le manatu ai e fa’ataunu’u sana iloiloga i luma o le fa’amasinoga fa’aitumalo, ae manatu e tu’u sa’o atu loa lana mataupu i luma o le fa’amasinoga maualuga.

 

O lo o tu’uaia e le malo ia Lokeni i le moliaga o le umia fa’asolitulafono o le vaega o le laau fa’asaina o le mariuana, faapea ai ma lona faia o ni gaioiga e lamatia ai le saogalemu o fanau laiti.

 

O ia tu’uaiga na afua mai i le fa’alavelave lea na taofia ai lona atali’i e tasi le tausaga le matua i le falema’i,  ina ua ‘ona o ia i le pauta oona o le aisa. E tusa ai ma le tagi a le malo, sa ula le aisa a Lokeni i tafatafa o lona atali’i.

 

I le aso na aga’i atu ai Leoleo e pu’e fa’apagota mai Lokeni e mafua mai i le mataupu lea na a’afia ai lona atali’i, ae maua ai ia te ia mariuana.

 

E le o se taimi muamua lenei ua tula’i ai Lokeni i luma o le fa’amasinoga, ona o ni tu’uaiga fa’asaga ia te ia.

 

NOFOVAAVAAIA LE ALI’I NA FA’AOOLIMA I LONA TO’ALUA

 

O le ali’i e 37 tausaga le matua lea na ta’usala i lona fa’aoolima i lona to’alua ao matamata i ai lana fanau e to’atolu, ua ia fa’atoese i le fa’amasinoga e tusa ai o lana solitulafono sa faia.

 

O le mae’a ai ona ta’usala e le Fa’amasinoga Fa’aitumalo o le ua molia i le moliaga o le fa’aoolima i le tulaga tolu, na poloaina ai loa e le afioga i le ali’i fa’amasino ia Fiti Sunia le fa’anofovaavaaia o ia mo le 12 masina i lalo o tuutuuga e ao ona ia usita’i ia i.

 

O ni isi o ia tuutuuga e aofia ai le faasa lea ona ia toe faia ni gaioiga e fa’amata’u ai lona to’alua ma lana fanau, fa’asa ona ia toe tagofia le ‘ava malosi, a ia avea o ia ma tagatanu’u e tausi i tulafono a le malo i taimi uma. Ua poloaina fo’i o ia e totogi le salatupe e $145.