Ads by Google Ads by Google

Tala o le Lalolagi


O aga ia o le fa’amanuiaga o aso soifua o Falaniko Va’a ua atoa le 64 ai lenei o ona tausaga, ma le aso soifua o Joseph Falaniko ua atoa le 18 tausaga ai lenei, ae ua malolo uma i la’ua mai faiva. [ata: Leua Aiono Frost]

Pago Pago, AMERIKA SAMOA

 

LEND A HAND FOUNDATION - FOA’I SILI ONA TELE O OLOA SIIATOA MA PUSA ME’AI UA FA’AVASEGA:

 

O le taeao o le aso Faraile ua te’a i Parkland, i le lotoa a le Church for All Nations i le 111 112 Street, na matua fa’atumulia i ta’avale ua gasolo atu e piki a latou pusa mea’ai si’i atoatoa ma isi fo’i oloa ua fa’avasega i atigipusa ma tagapepa tetele ma tufatufaina atu i le mamalu lautele na oo atu, i lea nofoaga.

 

O le foa’i masani lea a le Lend a Hand Foundation, ma ua fa’atutuina loli tetele ua mae’a fa’amautu i ai pailate o pusa oloa sii atoa ma oloa eseese tau mea taumafa. I le faiga e manino lava le fa’asologa i le muamua atu i le laina, ua fa’apena lava ona faasolo mai ma e talosagaina pe tasi pe lua ni pusa mea’ai mo lau ta’avale ua mae’a fa’aavanoaina lona pusa atua poo le keli ia fa’atumu i lea ituaiga o foa’i.

 

O oloa ua ave tagapepa e aofia ai oloa o fuala’au ‘aina lea e fa’amatuu mai pa’aga faifa’ato’aga a le Lend a Hand Foundation.

 

Ua va’aia le aoga tele o nei ituaiga o tautua, i le tausiga fo’i o aiga o lo’o mana’omia le fesoasoani tau mea’ai e tausia lelei ai latou aiga. Ua fa’apea ona fa’asoa fo’i i le vasega o aiga ma la’uina i e uma lava o loo ua sulufa’i mai i Amerika ona o le vevesi o taua ma fevaevaeaiga i latou atunuu.

 

O lea lava fo’i le Fa’alapotopotoga loto alolofa ua latou fa’aalia lo latou agalelei i le aumalaga o e faigaluega i le Taylor Farms Northwest Inc. O le Taylor Farms fo’i le isi Kamupani e foa’ia mai ai mea’ai ua mae’a tuufa’atasia lelei mo le auina atu lea i e o lo’o maumausolo ma o mana’omia mea’ai mo le tausiga o latou soifua maloloina i aso ta’itasi.

 

Ua sauni fo’i le Lend a Hand ma ana pa’aga o Kalapu Teuteu Ta’avale a alo o Samoa i Uosigitone, ina ia latou fa’ao’o ni mea taumafai i le fa’aiuga o lenei vaiaso mo i latou o lo’o maumau solo.

 

FA’AMANATU ASO SOIFUA PELEGA MALILIU - FALANIKO VAA & JOSEPH FALANIKO

 

Ua mae’a fa’amanatuina le atoaga o le 64 tausaga o se tasi o tama ua loa fo’i o faigaluega mo le tatou atunuu, Falaniko Va’a mai Leone. 

 

O ia lea sa silia ma le 10 tausaga lana tautua i le NAPA, ona alu ese mai lea ina ua maua lona avanoa e faigaluega ai i le School Lunch Program ma atoa ai lona 15 tausaga ae litaea loa ma malaga mai ai i le tina ma le fanau ua mae’a fa’amautu i Washington State nei.

 

E le’i atoa le tolu tausaga talu ona malaga mai ma mafuta ma le fanau, ae maliu loa ma o le ulua’i tausaga lenei ua fa’amanatuina ai lona aso soifua ae ua malolo o ia mai ana galuega e tele sa tausia ai le fanau ma le tina o le aiga o Salasalamaua Va’a.

 

O le aso foi lea, Setema 10, 2021, ua atoa i ai le 18 o tausaga o le atalii o si ona tuafafine, na maliu lava a’o lua tausaga o lona olaga, le ali’i o Joseph Falaniko. Ua atoa la le 18 tausaga o le ali’i lea pe ana fai o soifua mai. Ua tapena paluni e fa’aleleia ma fuainumera o tausaga o lenei tama ma le atalii fo’i ua malolo. O le tapenaga sa faia lava e Salasalamaua ma le fanau, ona o le misi alofa i le tama o le aiga, ma ua maua ai fo’i le mafutaga e fa’atasi ai ma le fanau a le uso matua ua nofoia lenei lava setete. 

 

O le fa’atasiga sa usuina le pese mo i la’ua nei i o la tuugamau, ma siitia loa lea i Spanaway mo le BBQ ma le ‘aiga matagofie sa matua nofo lava le tuagane e to’atasi, Daniel Va’a e fa’ato’ato’a ona tapena mai mo le lautele e fa’atasi atu.

 

Sa oo ane fo’i Shawn Salavea ma le faletua ma le fanau, ma ua atili ai ona matua Leone loaloa lea fa’amoemoe. 

 

“O le fa’afetai i le Atua ona o le meaalofa sili mo a’u ma le fanau, e ui lava i se fa’aletonu o le tama i le va ma le Atua, ae sa ala mai ai manuia mo a’u ma le fanau. Lea ua alu, ae ua ou nofo ma manuia mo a’u. O le fa’afetai lava lena e silisili,” o se tala lea a Salasalamaua.

 

FA’AMANATU ULUAI ASO SOIFUA & PAPATISOGA O TUPUIVAO ROBERT KING - PUYALLUP, WASHINGTON:

 

Na fa’atasia nisi o aiga, uo mamae ma e masani a matua matutua a le ali’i talavou o Tupuivao Robert King, o le alo e fa’asino i le tamaitai talavou o Lealofisa Maamu King, ao le alo fo’i o se fanau e fa’asino ia Robert “Bobby” ma Lavetina A’etonu - King mai Pago Pago ma Amouli Amerika Samoa, ma Puyallup, Washington State.

 

O le aso na soifua ai o ia, ua avea fo’i ma aso ua papatisoina ai o ia i lana Ekalesia ua soifua ane ai o ia i lona aiga i le Setete o Washington, le Ekalesia Katoliko Roma a le Holy Disciples Catholic Church, i Puyallup, Washington.

 

O le susuga Patele Mathew O’Leary ma le Patele Roemary O’Brien-Wilson sa fesoasoani lea i le sauniga o lona papatisoga i le taeao o le aso Sa na tea nei i le itula e 10:30 i le taeao. O le pa’ia o aiga sa matua fa’atasia aua o le fa’amoemoe fo’i i le lumana’i ma le soifua laulelei o le fanau, ua mae’a fa’auia lea i le Atua ina ia silasila i lona soifua laulelei ma ia tausia lona tino ina ia malosi.

 

O le fa’atasiga na tomuli mai o le to’ona’i tele lea sa saunia lelei e le susuga Robert & Lavetina King i le la’ua maota i Puyallup lava. Na auva’a potopoto i ai uo mamae ma aiga i ona itu na lua, o sui mamalu fo’i o le latou ekalesia ma le anoana’i o aiga mai Amouli, o lo’o alaala i Washington State ua fa’atasia.

 

“O le vi’iga i le Atua ua ola fo’i lenei tama o Tupuivao, o le lumana’i fo’i o lenei aiga, pe afai e muamua avatu i le Atua e mua’i saili i ai mo ana fa’amanuiaga. O le lona 9 ai lenei o le fanau a fanau, ma o se fiafiaga ia tuu atu i le Atua ia tausia ma fa’asaoina lona ola ma’ale’ale mai le tele o fa’ama’i o fepesia’i, ia tumau fo’i lana puipuigamalu ia te ia. Fa’afetai i aiga ua autova’a mai, e le ona o le tamaititi ae o le mafutaga ma le fiafia fa’atasi ua atoa le tausaga o le tausiga a le Atua i lenei fo’i atalii,” o se tala lea a le tama matua Robert King.

 

O le fa’amoemoe ua avea ma se tasi o fa’atasiga fa’aleaiga ma ua fiafia fa’atasi uma fo’i ma aiga Samoa o loo latou fa’atasi i le Ekalesia Katoliko i Puyallup.