Ua talosagaina e se Tina mai Filipaina se fautuaga fa’a loia, e fesoasoani ai i le finauina o le mataupu lea ua a’afia ai o ia, e mafua mai ina ua tulaga fa’aletonu ona pepa nofomau e fa’ataga ai ona nofo ma galue pea i Amerika Samoa.

Na fa’amaonia mai e le ali’i loia ia Richard deSaulles mai le Ofisa Loia a le RDA Law Firm, le mae’a lea ona feso’ota’i atu i le Tina mai Filipino ia Joselyn M. Intila ia te ia, ma talosagaina lana fesoasoani e avea ai o ia ma ana loia.

“O lea ua avea nei a’u ma loia a Intila e finauina le mataupu e tusa o lona aumau ai i Amerika Samoa. Talu ai le tulaga o lea mataupu, ua le mafai ai ona fa’ataunu’uina le isi vaega o le tulafono o femalagaaiga, lea e tuua ai e Intila le teritori ona o tulaga fa’aletonu i ona pepa nofomau,” o le saunoaga lea a deSaulles i le Samoa News.

Sa ia fa’amaonia mai fo’i i le Samoa News, le i ai lea o se suesuega o loo fa’atautaia e le Matagaluega o Puipuiga Faalotoifale a le malo, fa’asaga i le sponsor a le Tina mai Filipino, faatasi ai ma le kamupani sa galue muamua ai o ia.

O le sponsor a Intila, o le afioga i le tama’ita’i faipule ia Vui Florence Saulo, o ia fo’i lea o le pule o le kamupani sa galue ai Intila, le kamupani a le FSA Land Development, lea e puleaina le Fale Su’isu’i o le Siniva & Armelia’s Sewing Shop.

Ina ua mae’a le aoga o le pepa e fa’aauau ai pea ona nofo ma galue Intila i le atunu’u i le aso 31 Me 2018, na talosagaina ai loa e lana sponsor le Pulesili o le Ofisa o Femalagaaiga, atoa ai ma le Fa’atonusili o le Komiti Fa’afoe, ina ia fa’afo’i loa o ia i lona atunu’u, ma fa’asa ona toe ulufale mai mo le umi e 10 tausaga.

Na maua e le Samoa News kopi o tusi e lua sa tuuina atu e Vui i le Pulesili o le Ofisa o Femalagaaiga, afioga Peseta Dennis Fuimaono, atoa ai ma le tusi i le Taitaifono o le Komiti Fa’afoe, afioga Fanene Edda Wyberski.

I le tusi sa tuuina atu ia Peseta, o loo fa’amanino ai e Vui le tatau lea ona fa’amalosia o tulafono tau femalagaaiga fa’asaga ia Intila, ona o lea ua mae’a le aoga o lona pepa e nofomau ai i le atunu’u, ma ua le mafai fo’i ona toe fa’afou.

O lo o fa’amanino ai fo’i e Vui i lana tusi ia Peseta le mafua’aga ua ia manatu ai ua soli e Intila tulafono tau femalagaaiga. O ni isi o ia mafua’aga e aofia ai lona faigaluega i le isi kamupani e ese mai i lana kamupani, e aunoa ma se fa’atanaga a le Komiti Fa’afoe o Femalagaaiga, atoa ai ma le i ai pea lea i Amerika Samoa e ui ua le toe aoga lona pepa nofomau.

Ae i le tusi a Vui sa tuuina atu ia Fanene, o lo o ia fa’amanino auiliili ai le mafua’aga ua ala ai ona fa’aletonu le fa’afouina o le pepa nofo mau a Intila.

Na taua e Vui e faapea, o le tausaga e 2008 na aumai ai e lana kamupani ia Intila ma latou galulue i Amerika Samoa. O ia o se tagata faigaluega faamoemoeina toe faamaoni. E pei ona faia e le kamupani i ana tagata faigaluega uma lava, e fesoasonai le kamupani i le tele o taimi e manaomia ai e Intila se fesoasoani tau tupe.

I le tausaga ua mavae, na ia maitauina ai sina suiga laititi i le mafutaga ma Intila, e foliga mai ua i ai se isi tagata faipisinisi ua manatu o ia e alu e galue ai. Sa faailoa atu fo’i e Intila ia te ia le taumafai o se tasi o ulugalii faipisinisi e fa’atosina atu o ia ina ia galue mo le la pisinisi, peita’i sa ia fai i ai e leai.

Ae i se taimi e le i mamao atu nei, sa maitauina ai loa se tulaga e ese i le vaai, o le manava lea o Intila mai lana galuega, ae o mai le ulugalii Samoa e fai fo’i le la Fale Su’isu’i ma piki atu o ia e faigaluega mo le la pisinisi.

Na faailoa e Vui i lana tusi ia Fanene e fa’apea, o le tiutie o pisinisi i le atunu’u, o le atina’eina lea o le ola manuia o tagata faigaluega. E tatau fo’i i le Komiti Fa’afoe ona fa’amalosia tulafono e puipuia ai pisinisi mai le a’afia o tulaga fa’apenei.

O le ulugali’i faipisinisi o loo taua o la suafa i le tusi a Vui, o le susuga a Joseph ma lona faletua ia Leuila Ioane, o i laua fo’i ia e ana le pisinisi o le Off the Rock Designs.

Na teena e lenei ulugali’i tu’uaiga e faapea, sa la taumafai e aveese atu Intila mai le kamupani a Vui ina ia galue mo le la kamupani.

“E le sa’o tu’uaiga fa’asaga ia te i maua. Ua na o ni tuuaiga e faaleaga ai o maua igoa ta’uleleia. Ma te lei taumafai e ave ese mai Intila ina ia galue i le ma pisinisi,” o le molimau lea a lea ulugali’i.