Ads by Google Ads by Google

Pasia e le Fono tofiga a le Kovana mo le Teutupe ma le Faatonu o le Ofisa a le Paketi


Le Teutupe a le malo o Amerika Samoa, le Tofa i le Tootoo ia Malemo Tausaga [ata AF]

Le Faatonusili o le Ofisa o le Paketi a le malo, le Faletua ia Catherine Saelua [ata AF]
ausage@samoanews.com

Pago Pago, AMERIKA SAMOA

Ua faamaonia e le Fono Faitulafono isi tofiga e lua a le  Kovana Sili, e avea ai le Tofa Malemo Tausaga e fai ma Teutupe a le malo, ae avea Catherine Saelua ma Faatonusili o le Ofisa o le Paketi a le malo.

I le Senate, e 18-0 le palota na pasia ai Saelua ae 17-1 na pasia ai le tofa Malemo. I le Maota o Sui, e 17-1 le palota na pasia ai Malemo ae 16-2 le palota na pasia ai Saelua.

A o le i pasia i laua nei avea ma sui o le Kapeneta a le Kovana, na faataunuu i luma o le Maota o Sui iloiloga e fesiligia ai o la agavaa.

ILOILOGA MO MALEMO

O le Iloiloga e fesiligia ai agavaa o le Fetalaiga a Malemo na faataunu’uina lea i luma o le Komiti o le Sailiga o le Tamaoaiga o le malo, i lalo o le ta’ita’iga a le afioga i le ali’i Faipulea ia Lavea Fatulegaee P. Mauga o le Ta’ita’i Komiti.

Na taua e le toatele o Faipule i le taimi o le iloiloga le leai o ni fesili e faatatau i le tautua ma agava’a o le tofa a Malemo, ona o ia o se tasi o taitai ua loa lana tautua i le malo, ekalesia, faapea ai afioaga ma le aiga. 

Na talosaga le afioga i le ali’i Faipule ia Avagafono Vaimaga Maiava ia Malemo ina ia alofa i tagata faigaluega ma ia fai le mea moni mo le manuia o le atunu’u. Sa ia taua e faapea, o Malemo, o se taitai e galue faamaoni toe loto alofa i tagata.

Saunoa le afioga i le ali’i Faipule ia Ape Mike Asifoa e faapea, e i ai le talitonuga o auga tupulaga i aso nei, o le vaitau lenei ua tatau ai ona tutula’i mai tupulaga talavou e fai ma ta’ita’i o le malo aemaise lava i matagaluega eseese, ona o le tomai ma le iloa ua latou maua, peita’i i le mae’a ai ona ia faitauina o agava’a ma le soifua galue o Malemo, na ia manatu ai, e taua tele le i ai o le au matutua aemaise ai i latou ua afu le tautua e fesoasoani e faatonutonu le faatinoina o galuega. Sa ia taua lona talitonuga o Malemo i lenei tofiga, o ia fo’i o se auauna ua lava lona tomai e faatino ai galuega mo le manuia o le itu tau tupe a le malo.

Na talosaga le afioga i le ali’i Faipule ia Vailiuama Steve Leasiolagi, i le molimau, ina ia toe silasila ane i le mataupu e faatatau i alauni a Faipule e $30,000, lea o lo o fa’aauau pea ona tipi mai ai lafoga ma isi tupe mai le malo Feterale.

Saunoa Vailiuama e faapea, o le tupe lea, e le faatulagaina o se tupe maua a Faipule ma Senatoa, ae o le alauni e faaopoopo i o latou totogi. Na pau le maualuga o le totogi o Faipule ma Senatoa o le $25,000, peita’i o le tulaga ua maitauina, e le gata ua tipi mai ai saofaga mai le feterale i le totogi ae oo lava foi i le tupe mo le alauni ua tipi mai ai fo’i saofaga a le malo tele.

Na talosagaina fo’i e Vailiuama le Teutupe mo ripoti i le fa’aaogaina o le silia i le $164 miliona lea na maua mai e Amerika Samoa mai le malo tele e fesoasoani ai i le puipuiga o le faama’i o le COVID-19.

Na lagolagoina e Lavea le finagalo na fa’aalia e Vailiuama. Saunoa Lavea e faapea, o loo fa’aauau ona tipi a latou saofaga mai le malo tele mo le tupe o le alauni, a o se faaiuga ua le tusa ma le tulafono.

Na talosagaina fo’i e Lavea ia Malemo mo le tuuina atu o ripoti e faatatau i tupe o loo maua mai e le malo i vaa la’u oloa ma va’a suau’u o loo ulufale mai i le atunu’u i masina ta’itasi. 

Na faafetaia e le Tofa a Malemo le tofa sasa’a a le Maota e tusa ai o le iloiloga. Sa ia faailoa i luma o le Maota ni isi o tala fiafia e faatatau i tupe fai meaalofa mai le malo tele (stimulus), lea e agavaa ai tagata tipi lafoga i le ta’i $600 a le tagata e toatasi. Saunoa Malemo e faapea, o le vaiaso na te’a nei na tau aao ai e lona Ofisa se fa’aaliga mai le Ofisa o Lafoga a le Malo Tele (IRS), i le talia aloaia lea o le talosaga, ma latou tauaaoina ai loa le vaega tupe e tusa ma le $26 miliona.

O lo o galulue le Ofisa o le Tupe a le malo mo le faagasoloina o tulaga uma e uiga i lenei mataupu, ma le faamoemoe o se taimi i le isi 2 vaiaso o loo lumana’i nei e amata ai loa ona tufatufa atu nei faamanuiaga i le atunu’u.

ILOILOGA A SAELUA

O le vaiaso fo’i na te’a nei na faatauuuina ai i le iloiloga a le Faletua ia Catherine Saelua i luma o le Komiti o le Paketi ma le Tupe Faasoasoa a le Maota o Sui, i lalo o le ta’ita’iga a le afioga i le Taitaifono ia Vailiuama Steven Leasiolagi.

O le toatele o Faipule sa latou ta’ua le agavaa o Saelua e toe avea ma Faatonusili o le Ofisa o le Paketi a le malo, le Ofisa sa ia tautua ai mo le 8 tausaga ua tuana’i atu i lalo o le faigamalo a Lolo ma Lemanu. 

Na fesili Vailoata E. Amituana’i ia Saelua, pe na alu atu ma avatu ni ana Sui Faatonu e pei ona faia e isi fo’i Faatonusili filifilia. Na tali le molimau, e leai.

Na taua e le afioga a Lavea Fatulegaee P. Mauga e faapea, soo se tasi lava e filifilia e le Kovana i se tofiga maualuga a le malo, e mafua mai ina ua silafia e le Kovana ua lava ma totoe le agava’a o lea tagata na te tauaveina ai se tofiga. E talitonu Lavea, ua lava le tomai ma le agava’a o Saelua na te faatinoina ai lenei galuega.

E le i fesiligia e le afioga i le ali’i Faipule ia Manumaua Wayne Wilson le molimau. Sa ia taua e faapea, o le tele o tausagag o le tautua a lenei Taitai, ua moni ai muagagana a le atunu’u, “o le ala i le pule o le tautua”.

Na talosaga le afioga i le ali’i faipule ia Avagafono Vaimaga Maiava i le molimau, e silasila toto’a i le tulaga o loo i ai le Vaega o le Fuimu i lalo o le Ofisa o Leoleo i le taimi nei. I lona talitonuga, ua tele tausaga o fetaia’i pea le Ofisa o le Fuimu ma le faafitauli o le le lava o tagata faigaluega.

Sa ia talosaga ia Saelua e silasila toto’a i le paketi a lenei ofisa, pe lei oo i se taimi e faia ai loa se Aoga Faapitoa mo ni ali’i ma ni tamaitai Fuimu e pei fo’i ona faia i le Ofisa o Leoleo.

Saunoa le afioga i le ali’i faipule ia Ape Mike Asifoa, o Saelua, o le isi lea taitai e to’atele talavou tamaitai ma Tina e vaai maualuga i ai.

Saunoa le Sui Fofoga Fetalai e faapea, o Saelua o se tamaitai o lona aiga. Sa ia faailoa ia Saelua e faapea, o lagona o nisi o le atunu’u fai mai, “ua leaga le malo.”

O se tasi o tulaga na taua e le Sui Fofoga Fetalai ia Fetu Fetui Jr e mafua ai ona tiga lona mafaufau i le malo, o le avatu o mea a le Fono Faitulafono ae fia pule ai le Fono. Na taua e Fetui le tatau o le malamalama i le Faavae ma le eseesega o malosiaga i Vaega e 3 o le Faigamalo a Amerika Samoa o lo o i ai nei.

“Pau lava le mea a le malo e fai pe a avatu ni mataupu a le Fono Faitulafono, o le vaai poo lava se tupe ona fai lea. Afai e lava tupe a le Fono, e leai se mea e taofia ai fua, peita’i o le mea lea ua tupu, a avatu mataupu a le Fono ae fia pule ai le malo.” o le saunoaga lea a le Sui Fofoga Fetalai.

Saunoa atili Fetui e faapea, afai ae toe tula’i mai lenei faafitauli i le lumana’i, o le a faauluina loa se pili e aveese ai o ia mai le tofi Faatonusili.

Na lagolagoina e le afioga i le ali’i Faipule ia Faimealelei Anthony Fu’e Allen le finagalo o Fetui Jr.

Saunoa Faimealelei e faapea, o le toatele o Faatonu o loo i ai nei, na ona uma lava ona faamaonia o i latou e le Fono, ae toe alu atu le Faipule i le isi taimi, ua leai ma se faatalofa mai i le faipule, ae faatoa toe manatua lava Faipule ina ua toe li li mai i luma o le maota.

Na faailoa e Andra Tereise Samoa i luma o le Maota, o le faletua ia Saelua, o se Tina e faamaoni toe mafuta i le Atua mo soo sana faaiuga fai. O ia o se Tina ua loa lana tautua i le tofiga, ma talitonuina fo’i e le malo lana auaunaga.

Na faafetaia e Saelua afioga i Faipule e tusa ai o le talitonuina o ia i lenei tofiga taua a le malo.