Ads by Google Ads by Google

Pasia e Faipule le pili e taofia ai le lafoga 2% o totogi


[ata: foa'i]
ausage@samoanews.com

Pago Pago, AMERIKA SAMOA

Ua pasia e le Maota o Sui i le aso Faraile na te’a, I se palota e 16-0, ni suiga ua latou faia i le pili a le Senate, e faaopoopo ai le 3 sene i le lafoga o le tapa’a, ma avesea atoa ai ma le lafoga o totogi e 2% o lo o ave mo le Falema’i o le LBJ i Faga’alu.

O lea pili na pasia e le Senate I lona faitauga lona tolu I le lua vaiaso ua tuana’i.

I le gagana o le pili na afua mai i le maota maualuga, o lo o taua ai le pasia o lenei tulafono i le taimi lava e pasia ai e le Fono Faitulafono ma sainia e le ali’i Kovana.

I lona faitauga faalua o lenei pili I le Aso Tofi ua tuanai, na talosaga le afioga i le ali’i faipule mai Tuala-uta, ia Larry Sanitoa i le Fofoga Fetalai, e toe silasila toto’a i le vaega o le tulafono o lo o ta’ua ai le taimi e pasia ai le pili pe a mae’a ona sainia.

Na faamanino e Sanitoa e faapea, i le Paketi o le Tausaga Tupe 2021 lea na pasia e le Fono Faitulafono ma sainia e le Kovana, o lo o taua ai le $3 miliona o lo o fuafua le Falema’i o le LBJ, latou te maua mai le lafoga o totogi e 2%, ae afai e faamuta faafuase’i le toe totogiina o le i le ogatotonu o le tausaga tupe lenei, lona uiga e na o le afa o le tupe lea e mafai ona maua, tusa lea e $1.5 miliona, ae o le isi 6 masina o loo totoe i le afa o le tausaga tupe lenei, o le a toe tau saili e le malo se tupe e fesoasoani i galuega faatino a le Falema’i, ona o lea ua taofia faafuase’i le seleni sa fuafua e le Falema’I, latou te maua.

Na talosaga Sanitoa mo se avanoa e faateletelegese ai le faamalosia o lenei tulafono i le masina o Oketopa o le tausaga nei, o le taimi lea ua mae’a ai le tausaga tupe 2021 ae amata le tausaga tupe fou.

E ui i le talosaga a Sanitoa, ae na pasia lava e le maota o sui le tulafono i le faitauga lona lua.

O le faaiuga a le maota o sui na faia lea ina ua mae’a se iloiloga ma le Teutupe a le malo ia Malemo Tausaga ma le sui faatonu o le Ofisa o le Paketi ia Aokuso Satia i le vaiaso na te’a nei, lea na faamanino ai e le tofa i le Tootoo le mafua’aga na te lagolagoina ai le tatau ona faamuta o le lafoga o totogi, e 2%.

O le iloiloga na faatautaia e le Komiti o le Sailiga o le Tamaoaiga a le Maota o Sui, i lalo o le ta’ita’iga a le Ta’ita’I Komiti ia Lavea F. P. Mauga.

Na faamanino e le afioga i le Faipule ia Vailiuama S. Leasiolagi e faapea, o se tasi o mafua’aga ua ala ai ona a’e se manatu e taofi le lafoga o totogi e 2%, ona o le tulaga lelei ua i ai le gasolo mai o tupe fesoasoani mo le faama’i o le COVID-19 mo le faigamalo a Amerika Samoa, lea fo’i ua maua ai ma le avanoa e faasafua atu ai nei alagatupe i isi lala o le malo e aofia ai ma le Falema’i.

Na faamanino atili e Vailiuama i le komiti e faapea, ina ua mana’omia e le Falema’i o le LBJ se fesoasoani tau tupe, sa latou faia ai loa se nonogatupe mai le Teugatupe a le Litaea e $3 miliona, ma faavae ai le tulafono mo le lafoga o totogi e 2%, e toe totogi ai le nonogatupe.   Ma se tu’utu’uga, e faamuta, pe a maea ona toe totogi le nonogatupe $3 miliona I le Ofisa o Litaea.

Peita’i ina ua mae’a ona totogi le nonogatupe, sa fa’aauau pea le lafoga o totogi  e 2% e le i taofia, ona sa mana’omia e le Falema’i lea vaega tupe. 

O le tuutuuga la sa i ai, o le 50% o le tupe e maua mai i lenei lafoga, e alu i le faatautaiga o galuega faatino a le LBJ, ae o le isi 50% e alu e faatupe ai le polokalame lea e auina atu ai gasegase i fafo mo togafitiga. 

Na lagolagoina e Vailiuama ma le toatele o Faipule, le taofia o lenei lafoga, ona ua fai ma avega i le toatele o tagata faigaluega. 

Na taua e ni isi o afioga i Faipule e faapea, ua tele tausaga o totogi e tagata faigaluega i le atunuu le lafoga lenei, e mafua mai ina ua le mulimulita’i le malo i le tuutuuga o le tulafono muamua, e faamuta I le taimi e mae’a ai ona totogi le nonogatupe e $3 miliona a le Litaea.

Saunoa Sanitoa e faapea, e leai lava se eseesega o le gaioiga lea laa faia i le tulafono a le Senate, i le aveesea lea o le lafoga o totogi e 2% ae sii le lafoga o le Sikaleti. Afai ae maualuga le lafoga o le Sikaleti, e ono avea lea ma auala e faaitiitia ai le Sikaleti e ulufale mai i le atunuu, ma faaitiitia ai fo’i ma le tupe o loo fuafua le malo e maua mai i le lafoga. 

Na toe saunoa le afioga i le ali’i Faipule ia Vailiuama ma ia fautuaina molimau a le malo, ina ia faamaoni le malo e totogi tupe ua mae’a ona faatulafono mo Vaega Tumaoti a le malo e pei o le Falema’i ma le Kolisi, ina ia taofia ai le toe tula’i mai o manaoga tau tupe faapenei.

Saunoa Malemo e faapea, i le tausaga tupe ua mae’a atu, e silia i le $15.6 miliona le tupe na maua e le malo o Amerika Samoa mai le lafoga o le Sikaleti, ae mo le Kuata Muamua lava ia o le Tausaga Tupe 2021, e $2.4 miliona le tupe na maua e le malo mai le lafoga o le Sikaleti.

Na faamanino atili e Malemo e faapea, ina ua ia ulufale atu i le Ofisa, sa ia suesueina ai loa tulaga o le lafoga o totogi e 2% ma maua ai, e silia i le to’a 4,000 tagata faigaluega na totogia le lafoga e 2% i le tausaga tupe na te’a nei. E 506 pisinisi na faamaoni i le totogiina o le lafoga e 2%, mai le silia i le 3,000 le aofa’i o pisinisi ua mae’a ona lesitala i totonu o le malo o Amerika Samoa.

O le faafitauli e pei ona saunoa Malemo, e le o malosi lona Ofisa i le faamalosia o le tulafono ma una’i pisinisi e totogi le lafoga. O se tasi o faafitauli, o isi pisinisi e totogi ta’i masina ae o isi pisinisi e totogi ta’i kuata.

I le gagana o le tulafono o loo taua ai e faapea, e ui ina pepesi le faama’i oti o le COVID-19 i le lalolagi, ae o loo maitauina pea tulaga manuia o Amerika Samoa, i le tapunia lea o tuaoi i lalo o le pulega a le Kovana. 

E ui fo’i i le tele mai o faamanuiaga tau tupe mo le malo, ae tatau lava ona faamaoni ma aua le faatamala tagata uma i le taumafai lea e puipuia ma le faaeteete tagata ma ia nonofo sauniuni pea i soo se taimi e tula’i mai ai se faalavelave.

O le mea lea e tatau ai lava ona mautu tapenaga uma ma ia mautinoa lelei ua faaaupegaina atoatoa le Maota Gasegase i mea uma latou te mana’omia e tausia ai pea lo latou saogalemu. E le gata i lea, e tatau fo’i ona tuuina atu ia lava ma atoatoa fesoasoani tau tupe ina ia mafai ai ona faaauau pea le siisii i luga o le falema’i ma ana auaunaga i le atunu’u.

O loo mana’omia pea lava e tatou le lava o foma’i latou te faatinoina galuega, ina ia mafai ai ona latou tuuia mai auaunaga uma e tatau mo le atunuu atoa. 

O le siitia o le lafoga o le sikaleti o le a mafai ai ona fesoasoani atili le malo ma tagatanu’u i le Falema’i i le faaleleia latili lea o la latou auaunaga i le atunu’u.