Ua nofovaavaaia nei mo le 2 tausaga le ali’i lea na ta’usala e le Faamasinoga i lona faia o sauaga fa’asaga i lana uo tamaitai, ina ua talia e le Fa’amasinoga fautuaga ma talosaga a Loia, ina ia fa’asala lenei ali’i i se fa’asalaga nofovaavaaia.

E ui o lea ua nofovaavaaia le susuga a Ethan Mauga, peita’i e mamafa ma tu’u sa’o fautuaga ua mae’a ona tuuina atu e le Fa’amasinoga na te usitaia, a o i ai o ia i lalo o le vaavavaaiga a le Fa’amasinoga.

O le vaiaso na te’a nei na tula’i ai Mauga i luma o le Fa’amasinoga Maualuga mo le tuuina atu o lana fa’asalaga. O le ali’i Loia Fautua lagolago ia Ryan Anderson na tula’i mo Mauga, ae o le Tamaitai Loia Sili lagolago ia Kristine Soule na tula’i mo le itu a le malo.

E ui i le tele ai o solitulafono sa tu’uaia ai Mauga, peita’i o le maliliega lea na latou sainia i le masina na te’a nei, lea fo’i na talia e le Fa’amasinoga, ua tali ioe ai Mauga i solitulafono eseese e tolu.

O ia solitulafono e aofia ai le faatupu vevesi i nofoaga faitele ma le le usita’i lea i le poloaiga a le Fa’amasinoga.

Na valaau e le itu tete’e le tama’ita’i na aafia i lenei mataupu. I lana molimau i luma o le Fa’amasinoga, sa ia talosaga ai i le Fa’amasinoga mo se avanoa e aveese ai lana poloaiga lea e fa’asa ai ona fesoota’i atu Mauga ia te ia, ae maua ai le avanoa e toe fo’i atu ai o ia i lo la aiga, e fesoasoani i le tausiga o lana fanau, ona o loo pisi fo’i o ia i le tausiga o si ona Tama o lo o ma’i.

Na talosaga Anderson i le Fa’amasinoga e fa’asala le ua molia i se fa’asalaga faanofovaavaaia. Na finau Anderson o Mauga, o se tasi o tagata nofosala e agava’a ona faasala i le faasalaga faanofovaavaaia.

O lea talosaga na tete’e i ai le loia a le malo. Na taua e Soule e fa’apea, e tatau lava ona i ai se fa’asalaga faa falepuipui e tuuina atu i le ali’i ua molia, ina ia fai ma aoaoga lana solitulafono sa faia.

Na taua e Soule i le Fa’amasinoga, e le o se taimi muamua lenei ua ta’usala ai le ua molia i le solitulafono lenei o le faia o sauaga fa’asaga i lana uo teine. I le tausaga na te’a nei, e fa’atolu ona molia e le malo ia Mauga i le faia o sauaga faasaga i le tama’ita’i na a’afia.

E ese mai ai i mataupu ia e 3, e i ai le isi mataupu na molia ai fo’i le ua molia i ni nai tausaga muamua atu, o le mataupu lava fo’i e faatatau i le faia o sauaga faasaga i lana uo tama’ita’i.

A o le i tuuina mai le faaiuga a le Fa’amasinoga, na toe faatepa e le afioga i le ali’i Fa’amasino Sili lagolago ia Fiti Sunia mau faamaonia e faatatau i le mataupu lea ua nofosala ai le ua molia.

Sunoa le afioga a Sunia e fa’apea, na ulua’i molia e le malo le ua molia i luma o le Fa’amasinoga Maualuga i le moliaga o le faia o sauaga faasaga i lana uo tama’ita’i. I le aso na tula’i ai o ia i luma o le Fa’amasinoga, na faia ai le faaiuga e tatala o ia i tua e aunoa ma se tupe e totogi, i lalo o tuutuuga e ao ona usita’i i ai.

O ni isi o ia tuutuuga e aofia ai le le mafai lea ona ia taumafai e faafesoota’i lana uo tama’ita’i na a’afia i soo se auala.

Tuana’i masina e fa talu ona tatala i tua le ua molia, ae toe loka o ia ma molia i isi solitulafono eseese, e aofia ai le faia o sauaga faasaga i lana uo tama’ita’i. Na toe tatala i tua le ua molia ina ua mae’a ona ia totogi le tupe e $200 sa faatulaga e le Fa’amasinoga, e fa’atali ai taualumaga o lana mataupu.

Ae ina ua tuana’i masina e 5, sa toe molia ai loa fo’i e le malo le ua molia i tu’uaiga lava ia e tasi, o le faia lea o sauaga fa’asaga i lana uo tama’ita’i.

E ese mai i ana solitulafono i luma o le Fa’amasinoga Maualuga, na taua fo’i e le afioga a Sunia le i ai o solitulafono na ta’usala ai le ua molia i luma o le Fa’amasinoga Faaitumalo.

O faamaumauga uma e pei ona taua e le Fa’amasinoga, na mafai ona iloilo e ali’i Fa’amasino ina ia mafai ai ona faia sa latou faaiuga i le ituaiga tagata e i ai le ua molia.

“O le maea ai ona matou iloiloina o faamaumauga uma a le ua molia, ua manino ai loa le Fa’amasinoga, o lenei alii o se tagata e matua aafia lava i le faalavelave o le faia o sauaga faasaga i tama’ita’i ma fanau i totonu o aiga,” o le saunoaga lea a Sunia.

“Ua leva ona faia e le ua molia lenei solitulafono, ma ua oo i le taimi ua tula’i mai ai le Fa’amasinoga e saili se auala e foia ma faamuta ai loa lenei amio.”

I le tulai mai ai o lenei mataupu, na saunoa ai loa Sunia e fa’apea, o le isi lenei faafitauli ua mafua ai ona tutupu pea ituaiga solitulafono nei, ona ua avea le umia e tagata o lo o i ai le malosi ma tauaoloa i le atunuu o tulaga maualuluga ma auala ua latou soona faia ai sauaga le tatau i tagata vaivai ma le taualoa.

O le tagata maualalo ma le le taualoa lea na faia i ai e le alii ua nofosala nei uiga le manuia e pei ona saunoa Sunia, o lea ua sau i le Fa’amasinoga ma talosaga mo se avanoa e toe fo’i atu ai le ua molia i le fale e fesoasoani ia te ia i le tausiga o le aiga ma lana fanau.

Mo le solitulafono o le faatupu vevesi i nofoaga faitele e aafia ai sauaga i totonu o aiga, e 15 aso i le falepuipui lea ua faasala ai le ua molia, ma le salatupe e $300

Mo le solitulafono o le faatupu vevesi i totonu o le aiga, e 6 masina i le falepuipui ma le salatupe e $500 lea ua faasala ai le ua molia.

Mo le solitulafono o le le usitaia o le poloaiga a le Faamasinoga, e tasi le tausaga i le toese ma le salatupe e $1,000 lea ua faasala ai le ua molia i le toese. O ia faasalaga uma e tuli eseese, lona uiga, e 18 masina ma aso e 15 lea ua faasala ai Mauga i le falepuipui.

Ua faamalumalu e le Fa’amasinoga le tuliina o lea faasalaga, ae ua nofovaavaaia le ua molia mo le 24 masina i lalo o tuutuuga e ao ona ia usita’i i ai. O nisi o ia tuutuuga e aofia ai lona tuli o aso e 90 i le toese, e aofia ai aso e 78 lea ua mae’a ona ia tuliina i le falepuipu ao faatali ai se faaiuga o lana mataupu.

Ua poloaina fo’i le uamolia e totogi le salatupe e $1,000