Ads by Google Ads by Google

Molia ni ali’i se to’alua i le umia faasolitulafono o fualaau fa’asaina

ausage@samoanews.com

O le masina na te’a nei na pu’e faapagota ai e Leoleo ni ali’i se to’alua ona o tu’uaiga i lo la umia faasolitulafono lea o fualaau fa’asaina e le tusa ai ma le tulafono.

 

O Poulima Ulia ma Sefulu Tagaloa na pu’e faapagota ina ua faataunuu e Leoleo Suesue le poloaiga a le Faamasinoga e sailia ai fale, ta’avale ma soo se meatotino a Ulia ma Tagaloa, ina ua masalomia  i laua i le umia faapea ai ma le faatau ese atu o fualaau faasaina i ni isi o tagata o le atunuu.

 

O le amataga o le masina na te’a nei o Mati na tutulai ai i laua nei i luma o le Fa’amasinoga Faaitumalo, ae o le 2 vaiaso talu ai ona tofu atu ai le la mataupu i luma o le Fa’amasinoga Maualuga, ma faatulaga ai loa le masina fou o Me e faia ai le ulua’i iloiloga o le la mataupu.

 

O lo o tu’uaia e le malo Ulia i moliaga e 3, lea e aofia ai le moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta o le aisa ma le faamoemoe e tulei ma faatau atu i isi tagata; faapea ai ma le moliaga o le umia faasolitulafono o vaega o le laau faasaina o le mariuana; o solitulafono mamafa uma nei e mafai ona faasala ai se tasi i le toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000.

 

O Tagaloa o lo o molia i le moliaga mamafa o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese maile 5 e oo atui le 10 tausaga, pe faasala i le salatupe e oo atu i le $20,000, poo le faasala foi i faasalaga uma ia e lua.

 

E $25,000 lea ua faatulaga e le alii Faamasino ia Elvis P. Patea e tatala ai i tua Ulia, ae $5,000 mo Tagaloa.

 

TAGI FAASAGA IA ULIA

 

O le taeao o le aso 16 o Fepuari 2020 e pei ona taua e le malo i le latou tagi na aga’i atu ai se vaega toatele o Leoleo e faataunuu le poloaiga a le Fa’amasinoga e saili ai fale, ta’avale ma meatotino a Ulia ma Tagaloa, ina ua masalomia lo la auai i gaioiga o le umia o fualaau faasaina faapea ai ma le faatauina atu i isi tagata.

 

O Ulia e nofo i Malaeimi ae o Tagaloa e nofo i Leone e pei ona taua e le malo i le latou tagi. A o agai atu Leoleo i Malaeimi, na latou vaaia le ta’avale a Ulia o lo o paka i luma o se faleoloa i Malaeimi, ma faia ai loa le faaiuga e siaki le ta’avale.

 

Ma na maua ai ni alii se to’alua i totonu, o le alii ave ta’avale, lea na iloa mulimuli ane, o Ulia, ma le isi alii sa nofo i le nofoa o le pasese. Ina ua mae’a ona faailoa e Leoleo ia Ulia le mafuaaga o le siaki o lana ta’avale, na faatino ai loa fo’i e Leoleo le gaioiga o le sailia lea o tino o i laua nei pe maua ai ni fualaau faasaina poo ni a’upega.

 

A o siaki e Leoleo le tino o Ulia, sa talosaga Ulia i le Leoleo ina ia fesoasoani atu ia te ia ae a uma ona ia fesoasoani atu fo’i lea ia te ia. Na maua e Leoleo se taga pepa iila o lo o i ai vaega o le pauta faasaina o le aisa i le taga o le ofuvae a Ulia sa faia. E le i maua ni fualaau faasaina i le tino o le alii sa to’alua ma Ulia i totonu o le ta’avale.

 

Ina ua maea ona siaki le ta’avale ma alii e to’alua na malaga atu i le ta’avale, na faatonuina loa i laua ina ia aga’i atu ma Leoleo i le Ofisa o Leoleo i Tafuna mo isi suesuega atili. A o le i aga’i atu Leoleo ma i laua nei i le Ofisa o Leoleo i Tafuna, na saili e Leoleo totonu o le ta’avale a Ulia ma maua ai se ato aoga uliuli i le nofoa pito i tua o le pikiapu.

 

I totonu o lea ato uliuli sa maua ai e Leoleo fualaau fa’asaina, le ituaiga o le aisa ma le mariuana. Sa maua ai fo’i le anoanoa’i o mea e fa’aaoga e i latou o lo o tuleiina atu fualaau faasaina i tagata lautele e pei o pepa iila, o staw ua maea ona ta tipi tulimanu, atoa ai ma afi penisini, o ni paipa tioata se 2 e ula ai le aisa sa taatitia i totonu o le ato, faapea ai ma se tinoitupe e $1,289.

 

Ina ua taunu’u i le Ofisa o Leoleo i Tafuna, sa talosaga Ulia i le alii Leoleo e fesoasoani atu ia te ia, ae a maea ona ia fesoasoani atu foi lea ia te ia.

 

Ina ua fesiligia e Leoleo ia Ulia i fualaau faasaina sa maua i totonu o le ta’avale, sa ata le alii ma faapea atu i Leoleo, o “o fualaau faasaina lava sa i ai i totonu o le ato i le taimi na ou faaaogaina ai le ta’avale.”

 

A o le i tatalaina i tua e Leoleo le alii sa to’alua ma Ulia i totonu o le ta’avale e toe fo’i atu i lona aiga ina ua leai ni fualaau faasaina na maua ia te ia, na malie lea alii e tali i fesili a Leoleo e tusa ai o le taimi na la tietie ai ma Ulia i totonu o le ta’avale.

 

Na taua e le ali’i lea i Leoleo e fa’apea, o ia sa i lona fale i Leone ae na te’i ina ua alu atu Ulia e piki mai o ia na te faia le ta’avale o le Tina a Ulia i Malaeimi. Ina ua oso i totonu o le ta’avale, sa ia faalogoina le malosi o le manogi mariuana i totonu o le ta’avale. Sa ia fesili ia Ulia poo a ia mariuana e manogi malosi atu, ae na tali Ulia, o mariuana e ave ma tagata o lo  o galulue i lana ma’umaga.

 

A o le i taofia e Leoleo le ta’avale a Ulia ma le ali’i na la to’alua, na faailoa e le ali’i lea i Leoleo, o laua na faatoa fo’i mai i Iliili na la o ma Ulia e momoli aisa ma le isi alii na faatau e $200. Sa ia taua atili fo’i i Leoleo lona vaaia o fualaau faasaina i totonu o le ta’avale i le taimi na tu ai i le faleoloa i Malaeimi.

 

O le tele o taimi na te faia ai ta’avale a le aiga o Ulia, e masani lava ona tuu atu e Ulia pepa iila o lo o i ai fualaau faasaina ia te ia, peita’i na te teena ma fai i ai, o ia e le tago i fualaau faasaina, ae na te mana’omia le tupe e tausi ai lona to’alua ma lana fanau.

 

TAGI FAASAGA IA TAGALOA

 

O le afiafi o le aso lava lea ina ua maea ona pu’e faapagota e Leoleo ia Ulia, na taofi ai loa e Leoleo le ta’avale a Tagaloa i luga o le auala ma faailoa i ai le poloaiga a le Fa’amasinoga e saili ai lana ta’avale, o lona fale ma ana meatotino.

 

Na saili e Leoleo le tino o Tagaloa ma maua ai pepa iila laiti e 2. O le isi pepa o loo i ai sikaleti mariuana e 3 ae o le isi pepa o lo o i ai vaega o le pauta faasaina o le aisa.

 

Na faailoa e Tagaloa i Leoleo, o fualaau faasaina na maua ia te ia sa ia faatau mai i se tasi o ana uo ma le faamoemoe e ula ma faaaoga mo ia lava.

 

Ina ua fesiligia e Leoleo ia Tagaloa pe masani ia Ulia, na tali Tagaloa, e le masani tele ia Ulia ae sa ia faalogo e faatau atu e Ulia fualaau faasaina i le toatele o tagata. O nisi o taimi e faaaoga ai e Ulia lona fale i Malaeimi e tulei mai ai fualaau faasaina, ae o isi foi taimi e faaaoga ai e Ulia lana ta’avale.

 

O le tausaga lenei e maea ai le nofovaavaaia a Tagaloa e 5 tausaga, ina ua ta’usala o ia e le Fa’amasinoga Maualuga i le 2016 i le umia faasolitulafono o fualaau faasaina. E 20 masina na faasala ai Tagaloa i le Toese, o se tasi lea o tuutuuga o lana nofovaavaaia.