Ads by Google Ads by Google

Ioe se alii sa maua i lana ato i le malae va’alele vaega o le mariuana


[ata: SN]
ausage@samoanews.com

O le ali’i lea na tu’uaia e le malo i lona taumafai lea e aumai fa’asolitulafono i le atunu’u se vaega laititi o le laau fa’asaina o le mariuana, e mafua mai ina ua maua i totonu o lana ato i le malae va’alele se paipa e fai i le foil o loo i ai lau mariuana, ua ia ta’utino i le fa’amasinoga maualuga e fa’amaonia tu’uaiga fa’asaga ia te ia.

 

Na ulua’i tu’uaia e le malo le ali’i o Iosefo N. Sagote i le moliaga mamafa o lona umia fa’asolitulafono o vaega o le laau fa’asaina o le mariuana, o se solitulafono mamafa e mafai ona fa’asala ai o ia i le toese mo le umi e le itiiti ifo i le 5 tausaga, ae le mafai ona sili atu i le 10 tausaga, poo le salatupe e le itiiti ifo i le $5,000, ae le mafai ona sili atu i le $20,000, poo faasalaga uma fo’i ia e lua.

 

Sa tu’uaia fo’i o ia i le moliaga mama o lona taumafai lea e faaulufale faasolitulafono mai i le teritori vaega o le laau fa’asaina o le mariuana, o se solitulafono e mafai ona fa’asala ai o ia i le toese mo le umi e le silia i le tasi le tausaga, poo le salatupe e le silia i le $1,000, poo le fa’asala fo’i i fa’asalaga uma ia e lua.

 

I lalo o se maliliega na sainia e Sagote ma le malo, lea fo’i ua talia e le fa’amasinoga maualuga, ua ia malie ai e tali ioe i le moliaga muamua lea ua toe teuteu e le malo, le solitulafono o lona umia faasolitulafono lea o vaega o le laau fa’asaina o le mariuana.

 

I le tali ioe ai o le ua molia, sa ia ta’utino ai e fa’apea, i se taimi o le masina o Ianuari o le tausaga nei, sa ia umia faasolitulafono ai se vaega itiiti o le laau faasaina o le mariuana i totonu o lana ato pa’u, a o aga’i mai i le malae va’alele i Tafuna.

 

O se tasi o tuutuuga o le maliliega a Sagote ma le malo, o le malie lea o le malo e faasala o ia i se fa’asalaga faanofovaavaaia, e aunoa ma lona tuliina o se fa’asalaga faa falepuipui i le toese i Tafuna.

 

I faamaumauga a le fa’amasinoga o loo taua ai e fa’apea, o le aso 19 Ianuari 2018 na malaga mai ai Sagote i le malae va’alele i Tafuna. A o fa’agasolo siaki masani a le Ofisa o Tiute, na fa’afuase’i ai ona faailoa e le ta’ifau a le K-9 a le Ofisa o Tiute se faailoilo e ta’u atu ai i ali’i Ofisa, o lo o masalomia le i ai o fualaau fa’asaina i le ato a le ua molia.

 

Na saili e ali’i Ofisa o le Tiute le ato a le ua molia, ma maua ai se paipa e ula ai le fualaau o le mariuana. I totonu o lea paipa o loo i ai vaega laiti o le mariuana.

 

Sa faia se suega i mariuana na maua ma faamaonia ai, vaega moni lava ia o le laau fa’asaina o le mariuana.

 

E $2,000 le tupe na totogi e Sagote e tatala ai o ia i tua, i lalo o tuutuuga e le tatau ona ia toe umia pe fa’aaoga fualaau faasaina poo le ‘ava malosi.

 

O le aso 29 Iuni 2018 na toe tula’i ai Sagote i luma o le fa’amasinoga maualuga mo le isi ana iloiloga. O le mae’a ai o lana iloiloga i le aso lea, na faia ai loa se suega faapitoa i lona tino e se sui o le Ofisa Faanofovaavaaia e siaki ai poo ia usitaia le poloaiga e fa’asa ai ona ia toe tagofia fualaau fa’asaina.

 

I lea suega, sa faamaonia ai le maua o le vailaau o loo maua i le mariuana i lona tino, na toe taofia ai loa o ia i le falepuipui i Tafuna, e fa’atali ai le iloiloga e faamaonia ai lona soli o le poloaiga a le fa’amasinoga.

 

Na fa’ailoa e le loia a Sagote ia Marcellus T. Uiagalelei i le afioga i le Fa’amasino Sili ia Michael Kruse i le vaiaso nei e fa’apea, ua mae’a ona faia se maliliega i le va o lana itu ma le malo, ina ia fa’aleaoga le mataupu lea ua soli ai e Sagote le poloaiga a le fa’amasinoga, ona o lea ua sauni o ia e tali ioe i le moliaga e pei ona ta’usala ai o ia e le fa’amasinoga.

 

O loo tumau pea tuutuuga o loo tatala ai Sagote i tua e fa’atali ai le aso 5 Oketopa lea ua fa’atulaga e lau ai lana fa’asalaga.