Ads by Google Ads by Google

Fuafua tofia Komiti Faapitoa suesueina mataupu fualaau faasaina


[ata: SN]
ausage@samoanews.com

Pago Pago - AMERIKA SAMOA

 

Ua i ai se fuafuaga a le afioga i le ali’i Kovana ia Lemanu Peleti Mauga ma lana faigamalo e tofia se Komiti Suesue Faapitoa latou te taulimaina le suesueina o mataupu e faatatau i le faafitauli o fualaau faasaina i totonu o Amerika Samoa.

 

O lea Komiti Faapitoa e pei ona faamaonia e le Samana Semo Veavea, le Faatonusili o le Matagaluega o le Puipuiga Faalotoifale o Amerika Samoa, atoa ai ma le afioga i le Loia Sili ia Fainu’ulelei Falefatu Alailima Utu i luma o le Komiti o le Puipuiga o le Saogalemu Lotoifale a le Maota o Sui i le vaiaso nei, o le a aofia uma ai sui mai Matagaluega ma Ofisa a le malo o loo gafa ma le faamalosia o tulafono i soo se vaega.

 

O nisi o ia Ofisa e aofia ai le Matagaluega o Leoleo, Matagaluega o le Puipuiga o le Saogalemu Faalotoifale, Ofisa o le Tiute, ma isi uma lava Ofisa o lo o i ai lo latou malosi i lalo o le Tulafono e faamalosia ai Tulafono i le atunu’u.

 

O le aso Lua na te’a nei na valaauina ai e le Komiti o le Puipuiga o le Saogalemu Faalotoifale a le Maota o Sui se iloiloga ma Ofisa o loo gafa ma le faamalosia o Tulafono, ina ia faapupula nisi o mataupu sa fesiligia e afioga i Faipule i le vaiaso na te’a nei.

 

O nisi o ia mataupu e aofia ai fesiligia o se gaioiga a le malo e faaitiitia ai le faatiupulaia o le faafitauli o fualaau faasaina; o le mataupu i Taavale Fuimu fou na folafola e taunu’u mai i le tausaga na te’a nei; o le tulaga i le le lava o Taavale Ambulance a le EMS, faapea ai suesuega a Leoleo i nisi o mataupu e aofia ai fualaau faasaina na alia’e mai i tausaga ua mavae.

 

FAAFITAULI I FUALAAU FAASAINA

 

Saunoa le afioga i le ali’i Faipule ia Vaetasi Tuumolimoli Saena Moliga e faapea, e 2 lava auala e ulufale mai ai fualaau faasaina i le atunu’u - o le malae vaalele ma le uafu, peita’i o le itu ua maitauina, ua avea le mataupu i fualaau faasaina o se tasi o mataupu ua faigata ona foia, ma ua fesiligia ai le faamaoni o tagata faigaluega o loo galulue i vaega e pei ona ia taua.

 

O tagata faigaluega uma lava a le malo o loo galulue i vaega faapitoa ia e 2 o le uafu ma le malae vaalele, o i latou ia e muamua lava faafeiloaia tagata e ulufale mai i Amerika Samoa.

 

“O le fesili tele ua tula’i mai, o faamaoni tagata faigaluega nei i le faatinoina o latou tiute,” o le fesili lea a Vaetasi.

 

“O le popolega o lo o i ai, ina ne’i tatou masalosalovale i tagata mai fafo o i latou le faapogai o le ulufale mai o fualaau faasaina i le atunu’u, ae le iloa o tatou lava tagata le faapogai.”

 

Sa ia faailoa i molimau nisi o mataupu e aafia ai fualaau faasaina na taumafai e faaulufale faasolitulafono mai i le atunuu na taia ai le faafofoga a le Fono Faitulafono, e pei o le mataupu lata mai i TV na aumai faanana ai fualaau faasaina. E oo mai i le taimi nei e le o faalogoina lava se faamatalaga e uiga i lea mataupu.

 

Sa ia talosagaina fo’i le Loia Sili ina ia faaauau pea le polokalame o le faia lea o suiga mo tagata faigaluega uma a le malo ina ia mautinoa latou te le o faaaogaina fualaau faasaina.

 

Na taua e Samana e faapea, o loo faaauau pea ona latou galulue vava lalata ma Ofisa a le Feterale e aofia ai le FBI ma le DEA mo le suesueina o mataupu e faatatau i fualaau faasaina i Amerika Samoa. Sa ia taua fo’i se fuafuaga a le malo e tofia ai se Komiti Suesue Faapitoa e gafa ma le suesueina o le faafitauli i fualaau faasaina.

 

Na faalautele atili e le Loia Sili le saunoaga a Samana ina ia manino atili ai le Komiti. E ioe le Loia Sili, e moomia le galulue faatasi o tagata uma lava i le atunuu e aofia ai Taitai o le malo, Taitai Faaleaganu’u atoa ai afioaga, itumalo, Ekalesia ma aiga mo le faia o gaioiga uma lava e faaitiitia ai le faafitauli o fualaau faasaina.

 

Saunoa Fainu’ulelei e faapea, ua tele tausaga o pagatia Amerika Samoa i le faafitauli o fualaau faasaina, ma o se tasi lea o lu’itau o lo o ave i ai le faamamafa a le faigamalo o lo o i ai nei ina ia mafai ona tuu itiitia pe faamutaina foi lenei faafitauli i le faaiuga o lenei tausaga poo le amataga foi o le tausaga fou.

 

Na fesili le afioga i le alii faipule ia Lavea Fatulegaee Palepoi Mauga i le Sui Komesina o Leoleo poo fea ua oo i ai le suesueina o le mataupu e faatatau i fualaau faasaina na aumai faanana i totonu o ni TV na aumai i le va’alele.

 

Na saunoa le afioga a Foifua Foifua Jr, e le i oo atu i le Matagaluega o Leoleo se ripoti e faatatau i lea mataupu.

 

Na saunoa le Pulesili o le Ofisa o Tiute ia Elisara Pita Elisara e faamanino le mataupu. 

 

Sa ia taua e faapea, ua mae’a ona faatino le galuega a le Ofisa o Tiute, ma ua tauaao atu i le Vaega e Suesueina Mataupu tau i Fualaau Faasaina a le Ofisa o Leoleo. 

 

Ae talu ai o lo o faagasolo pea suesuega e iuga i lea mataupu, na taua ai e Elisara le faigata ona ia talanoa faalaua’itele e faatatau i lea mataupu.

 

Saunoa le afioga i le alii faipule ia Manavaalofa Tutuila Manase, ua silia i le 2 tausaga talu ona tapunia tuaoi o Amerika Samoa ona o puipuiga o le faama’i o le KOVITI-19, ma ua i ai fo’i ma le manatu ua tatau ona faaitiitia le faafitauli i fualaau faasaina i totonu o Amerika Samoa, peita’i o le tulaga o lo o maitauina, ua atili ai ona sasao faaafi lenei faafitauli.

 

Na fesili Manavaalofa ia Foifua pe le o i ai ni masalosaloga i le ono mafai lea ona gaosia e nisi o tagata le fualaau faasaina i totonu o le atunu’u.

 

Na taua e le Sui Komesina e faapea, i le tu’u faatasia ai o ripoti mai osofaiga uma lava na faatino e Leoleo i le tausaga na te’a nei atoa ai ma le tausaga nei, ua tau vavala mai ai se manatu faapea, e foliga mai o lo o gaosi lava i totonu o le atunu’u le fualaau faasaina.

 

I le tausaga na te’a nei e pei ona saunoa Foifua, e 69 osofaiga na mafai ona faatinoina e Leoleo i nofoaga eseese i totonu o le atunu’u ona o le taumafaiga e sailia fualaau faasaina atoa ai ma i latou o loo aafia ai.

 

Pe tusa o le 10 o nei osofaiga sa faatinoina, e le gata na maua ai fualaau faasaina ae na maua ai fo’i ma a’upega mata’utia faatasi ai ma pulufana. O le isi lea popolega tele o lo o i ai e pei ona saunoa Foifua, ina ne’i aafia atu ai se soifua o se tasi i le taimi e faatinoina ai galueag a Leoleo.

 

Na fautuaina e le afioga i le alii Faipule ia Larry Sanitoa le afioga i le Loia Sili ia mautinoa ua lava tapena lona Ofisa i tulaga o le tulafono i soo se taimi e folasia ai mataupu tau i solitulafono mamafa i luma o le Fa’amasinoga.

 

Sa ia taua e faapea, ua maitauina le tele o mataupu tau i solitulafono mamafa e avatu ma faaleaoga mai e le Faamasinoga. Sa ia taua se tasi o mataupu e faatatau i se tagata na molia sa taofia i le Falepuipui mo le silia i le 2 tausaga, ae oo atu i le taimi na faatino ai le faamasinoga, na solofua e le Fa’amasinoga i totonu o le tasi le vaiaso na faagasolo ai le iloiloga autu o lea mataupu.

 

O le popolega e pei ona saunoa Sanitoa, o lea la ua toe saoloto nei tagata ma ua toe foi atu lava i le atunuu ma toe faaauau foi lea lava olaga masani.

 

Na faamanino e le Loia Sili i le Komiti e faapea, o le mataupu sa fesiligia e Sanitoa, na faila i le 2 tausaga muamua atu ao lei tofia o ia e avea ma Loia Sili. Ae i lona faalogologo atu, o le faaletonu na mafua mai i moliga sa faila faasaga i le alii na molia. I lona talitonuga, o se tasi lea o itu taua e tatau ona tapenapena i ai Loia a le malo.

 

MALOSIAGA E TAOFIA FAAPAGOTA AI SE TAGATA SOLITUALFONO

 

O se tasi o mataupu na talanoaina i le taimi o le iloiloga, o le mataupu e faatatau i se Tulafono tau faaofi ua fuafua le malo e faaulu i se taimi la te mai, e tuu atu ai le malosiaga i isi Ofisa o le malo o lo o faamalosia le tulafono e mafai ai ona latou pu’e faapagota se tagata ua aafia i se solitulafono.

 

O lea mataupu na faamanino e le afioga i le Faatonusili o le Matagaluega o le Puipuiga Faalotoifale (DHLS) ia Samana.

 

Saunoa Samana e faapea, e i ai mataupu ua mae’a ona suesueina e lona Ofisa ma ua latou agai atu e momoli le latou ripoti i le Ofisa o le Loia Sili e tusa ai o le taunuuga o le latou suesuega sa faia, peita’i e avatu ae toe faafoi mai e le Ofisa o le Loia Sili le ripoti ma le faaupuga, e toe ave le mataupu i le Ofisa o Leoleo latou te suesueina, ona e leai so latou malosi i lalo o le Tulafono latou te pu’e faapagota ai se tagata.

 

Saunoa Samana e faapea, e taua tele le pili lea ua fuafua le faigamalo e tuuina atu i le Fono, e mafai ai e Ofisa o lo o galulue i le faamalosia o tulafono e pei o le Ofisa o Tiute atoa ai ma lona Ofisa, ona maua le avanoa e faamae’a ai galuega e pei o le suesueina o se solitulafono atoa ai ma le taofia faapagota o le tagata ua masalomia i lea solitulafono.

 

Na faamaonia e le Loia Sili le saunoaga a Samana. Saunoa Fainu’ulelei e faapea, o se tulaga taua tele le fuafuaga lea ua taumafai i ai le faigamalo, e le gata e maua ai e isi ofisa o loo latou faamalosia le tulafono le malosi e suesue ma taofia faapagota ai se tasi, ae mafai ai ona momoli atu ai ma se feau i tagata lautele, e le na o Leoleo e mafai ona taofia faapagota se tasi, e mafai foi e isi ofisa o le malo.