Ads by Google Ads by Google

FETUFA'IGA LONA LUA - FALE'AIGA MA SUI TAUSAMI PALENI FALEMA'I


O se va'aiga lea i le to'atele o sui o lo'o tutula'i o sui mai le tele o Fale'aiga a vala'aulia ina ia faatasi atu i le Semina mo Mea'ai Paleni, ina ia taumafai ai ona fesoasoani e tineia le gasegase o le Suka, Toto Maualuga, Ova le Mamafa o le Tino, Kanesa, Gugu ma le Fa'amama Toto i le atunu'u. [ata: Leua Aiono Frost]

O le vasega o fale'aiga ma faletalimalo sa le mafai ona auai muamua i le semina o Mea'ai Paleni sa fa'atulaga e le DOH Tobacco/Diabetes Coalition ia Ianuari, lea ua toe soso'o ai le fonotaga fetufa'i o taofi, ina ia fesoasoani le 'au fai Fale'aiga, ia taofiofia mai le laulauina o taumafa e le tatau ona tausami ai le lautele o tagata ua gasegase i le Suka, Toto Maualuga, Fa'amama Toto ma isi ma'i tumau fo'i ua tatau ona fa'aitiitia lo latou mamafa.

 

I le tauaofiaga lona lua lenei ua auai mai ai sui o le KS Mart Restaurant, Solip Hong, le sui o le Cocoa Bean Restaurant Landy Mataiao; sui o le Tropical Pizzas Sauaiga Siilata; tina e ona le Stevens and Sons Fa'afetai Shalhout; Tanuvasa Vailoa Levaula o le Maliu Mai Beach Resort Restaurant & Country Club Restaurant; o le sui mai le Carl's JR o Fuifui Ikenasio; le sui o le Emilio's Restaurant ia Ngaire Brighouse; le sui mai le Matai Restaurant o Sherry T; le sui o le Famous Restaurant Glory Tasi ma le tama'ita'i e ona lea fale'aiga o Hayan fa'apea ma le sui fo'i e ona le fale'aiga o le Sunny's o Mah Kwai.

 

O e na faia folasaga sa fa'afofogaina i lea taeao ua suia i le vaega a le Ma'i Suka a le LBJ, lea e fa'atautaia e le Tausima'i Resitala o Loata Sipili mo le folasaga muamua, ae o le folasaga lona lua na fa'atautaia lea e le tama'ita'i Pule i Me'ai Fa'atulaga mo Gasegase i le LBJ, Ms Ianeta Ah Ping.

 

Sa auai foi soi o le Komiti Fa'afoe o le DOH Tobacco Diabetes lea e ta'ita'ifono ai le susuga Patele Vaiula Iulio, sui totino fa'apa'aga ai le Tausala Lalelei o Amerika Samoa. Ms Magalita Johnson.

 

I le folasaga na muamua, sa matua fa'amatala auiliilia ai le mafuaga ua le gafatia ai e le tagata ma'i suka ona taofiofia le gasolo atu o lona ma'i suka ina le mafai ona togafitia. "O le mea muamua lava, ua le usita'ia le tele o le 'aiga e tatau ona tausami fa'atolu ai i le aso e tasi. O nisi ua le mafai ona te'ena le so'ona tausami i mea'ai ua iloa lelei ua le tatau mo lona gasegase o le Suka o taumafai ona togafitia ai ma le inumia o fuala'au e togafitia ai lo latou gasegase e pei ona fa'atonuina,” o se faamatalaga lea a Sipili.

 

"A e afai e tu'u i latou i mea ua mae'a ona fa'atonuina ai, ia le tele se mamafa o le 'aiga i le taeao, tausami ia lava fuala'au 'aina ma inu lelei juice ae le o apainu suamalie e tele ai le kasa, i le 'ai mamafa i le aoauli ae toe 'ai mama fo'i i le afiafi, e le mafai ona sasi le gafatia ona e soifua umi ma lou ma'i suka aua o lo'o e gafataulimaina lena tulaga."

 

"I le tulaga o tagata o lo'o talavou ma e le'i fa'alogoina se gasegase pe tau vaivai, aua le fa'amasani i le so'ona 'ai lava se'ia maona lelei, e le o se mea lelei lena mo le tausiga o lou soifua. E tatau ona e fa'amasani i le taumafa paleni. Tausami paleni e amata atu i le taimi nei a'o e talavou, e te le afaina i le tele o ma'i tumau ogaoga lea ua taumafai ona sailia vaifofo i le taimi nei."

 

Mo le vasega o le au fai fale'aiga, sa saunoa ai fa'apea ai Sipili, "E leai sa'u tala tele e faia i le mamalu o le au fai fale'aiga, aua e le o fale'aiga lea e mafua ai ona so'ona mamafa tino o tagata. O le filifiliga lava a le tagata latou e afua ai ona so'ona taumafa i mea'ai ua nanau i ai o latou loto. Peita'i e mafai ona fesoasoani mai i latou i le mau tau'ave lea e tau fa'amalosia a'ia'i i le mamalu o le atunu'u. Le fa'aaogaina o le masina Saina i mea'ai, aua le toe faia, aua e leai ma se mea a lena masina e faia i le mea'ai, na'o le fa'asusua atili o lau tausami.”

 

"O le so'ona asu fo'i o mea'ai mo i latou ua tou va'aia lava o lo'o gasegase, e tatau ona fa'aitiitia lava le tele o le mea'ai i a latou ipu, i taumafai ona paleni le 'aiga o lo'o ia fa'amoemoe e taumafa ai.”

 

Ina ua mae'a le folasaga sa iloga mai e le'o i ai ni fa'amaumauga tau pasene o i latou ua maua i le ma'i suka i le taimi nei pe a fa'atusatusa i tausaga ua te'a, masalo se'iloga e faia se faitauga o le atunu'u, ona maua lea o se isi faitauga fou. Ua fa'ailoa mai, ona e le'i toe faia se isi suesuega a le Matagaluega o le Soifua Maloloina lata mai, e mafai ai ona iloa patino se faitauga o tagata o lo'o maua i le ma'i suka ma le toto maualuga i lenei vaitau.

 

I le folasaga a Ah Ping, sa ia matua toe aumaia atoa ai le lisi o mea e ao ina fa'autagia e i latou e kukaina mea'ai, ae maise fo'i o le tapenaga o mea tausami i tua i aiga, atoa ai ma fale'aiga uma lea ua atoa i le semina.

 

O le lisi muamua sa ia fa'ailoa mai na tapena mai e le CDC a le Malo Tele. O lo'o ua fa'ailoa patino ai le malosi o le 'a'asa o le ogaumu e kuka ai so'o se ituaiga o a'ano o manu, e eseese fo'i lea malosi. O le kuka fo'i e le tatau ona ova i le lua itula ua tapena ae le'i tausamia. Afai e le tausamia e tatau ona tu'ufa'alelei i apa tapunia lelei ma fa'afulisa, se'ia toe fia tausami le aiga ona aumai lea e toe fa'avevela ma tausami loa.

 

O so'o se mea'ai ua tapena e le tatau ona ova i le lua itula e le'i fa'aaogaina. Peita'i i fa'alavelave o aiga Samoa ma Ekalesia fo'i, e matua ova mamao lea taimi e le'i tufaina lava le tausami. O se tasi lea o mea e afua ai ona mama'i le atunu'u.

 

O le isi va'aiga e i ai mea e gaosia fa'apitoa ai tausami, e ao ina fa'a'aisa lelei mea e tuu fa'alelei ai se'ia fia fa'atauina e se tasi, afai e le taulia ae ua sili i le lua itula, ua tatau ona le toe fa'aaogaina.

 

O fale'aiga e ao ina iloa lelei e fa'aauupegaina tagata faigaluega o kukaina mea'ai i totigilima, fa'apea ma ofu fa'apitoa mo kuka, fa'aaoga fo'i ma le neti mo lauulu o tama'ita'i, ae pulou ali'i i le pulou o le sifi kuka.

 

O vaila'au o lo'o fa'aaogaina fo'i mo le fufuluina o mea e fa'aaoga i kuka e pei o luga o laulau, laupapa tipi povi ma a'ano o manufasi, naifi, tui ma sipuni tetele e fa'aaoga i kuka e ao ina fa'avaivevela pe fufuluina muamua i le vaila'au ua atofaina, sina clorox e tusa ma le tasi le sipuni i le 4 kuata o le suavai manino.

 

O nisi o mea ua fa'ailoa mai, o le vevela e o'o i ai le kukaina o a'ano o manufasi e le tutusa ma e tatau ai ona kuka eseese, tipi eseese, e le tu'ufa'atasia. A uma ona tipi fuala'au 'aina o lau kuka, fufulu mama mea uma, fa'ato'a tipitipi mai a'ano o manu fasi ma tu'u eseese. O le fa'ama'alili fo'i o mea'ai, e le tatau ona tu'ufa'atasi, ae eseese mea e fa'ama'alili ai.

 

O nei mea uma ua taulimaina e le 'au faifale'aiga, ma ua latou o atu e toe fafagu lelei ona a'oa'o o latou tagata faigaluega.

 

O nisi o fesili, ona ua matauina e nisi o le au faifale'aiga, ua tele na'ua mea o lo'o se ai fo'i le tautua, ma o lea fo'i fa'ato'a tima'ia ai i latou, ae maise lava i le malosi o le ogaumu e kuka ai mea ese'ese nei ua fa'ailoa mai. Po'o le taumafai fo'i e fa'afulisa sanuisi ua mae'a tapena, ae le o le tu'u lava i luga o le fata e piki mai ai e le tagata fa'atau.

 

"Masalo afai o le aga lea e tatau ma le tausiga lelei o le soifua maloloina, ua matua ese le tele, sa tatau ona to'atele lava ua maliliu i le taimi nei, ona e o'o lava i aiga, o lo'o sese ona tapena mea taumafa mo fanauiti se'ia o'o i matua ma aiga atoa. Pei lava ua tatau ona fa'atulafonoina mo so'o se fale'aiga nei mea uma, fa'atasi ai ma faleoloa o fa'ataua mai isi mea'ai lea e gaosia solo mai i pisinisi laiti a tagata taito'atasi."

 

Ona o le tulaga o le CDC lea e “auina mai ai nei tapula'a uma, e fuafua lea mo le falema'i ina ia toe malolosi gasegase ua tausia fa'apitoa ai, ae o mea taumafa mo le lautele, o i latou o lo'o lelei pea o latou soifua maloloina e le o fa'apogaia i se gasegase, o le isi lea ala e le o afaina ai le soifua o le to'atele. Peita'i e o'o loa ina ma'i le tagata, ua sili ona tuga lona tino ma lona malosi'aga mai totonu e tetee ai fa'ama'i, ua tatau ai loa ona mataituina mea uma nei i le tapenaga o a latou tausami, ia le avea le fa'atamala lea o le gaosiga o mea'ai, ma mea e toe maumau ai lona avanoa o totoe e toe fa'afo'isia mai ai le malosi ia te ia." O lo'o talanoa lea tali i le "immune system" o le tagata soifua.