Pago Pago, AMERIKA SAMOA

E to’atele afioga i Faipule sa latou fesiligia le Faatonusili fou o le Matagaluega o Tagata Faigaluega a le malo (DHR), le Faletua ia Lynn Pulou-Alaimalo, i le mafua’aga ua ia faia ai nei mau suiga lea ua aafia ai le toatele o tagata faigaluega a o latou itumalo.

Na faailoa e Faipule ia Pulou Alaimalo le toatele o tagata palota a latou itumalo ua telefoni atu ma faailoa atu o latou lagona le fiafia i le tele o suiga le manuia ua ia faia i le Ofisa talu ona tofia o ia e avea ma Ta’ita’i.

E le gata fo’i i lea, e i ai Faipule sa latou faailoa i le tamaitai Faatonusili nisi o tusitusiga mai tagata e lagolagoina o ia, o loo taua ai itu lelei uma o lana auaunaga i le malo atoa ai ma le tulaga maualuga sa i ai lana tautua i totonu o vaega ‘au a le malo tele o Amerika.

O le vaiaso na te’a nei na molimau ai Pulou Alaimalo i luma o le Komiti o le Faagaioiga o le Malo a le Maota o Sui mo lana iloiloga e faamaonia ai tofiga a le Kovana e avea ai o ia ma sui o le Kapeneta.

O le iloiloga na taitaia lea e le afioga i le ali’i Faipule mai Aua ia Faimealelei Anthony Fu’e Allen. 

Na faamanino e Faimealelei i le Komiti le mafua’aga na tuai ai ona faataunuu le iloiloga e faamaonia ai Pulou Alaimalo. I lona talitonuga, ana vave le komiti e faatino lea iloiloga i le 2 vaiaso talu ai, atonu e ese se tulaga e oo i ai sana faaiuga. I lona taofi, o le taimi talafeagai lelei lenei ua aumai e le Atua e faataunuu ai galuega a le Komiti.

Na saunoa le afioga i le ali’i Faipule ia Vailoata E. Amituanai ma faailoa i le molimau le taua tele o le tofiga ua filifilia o ia e le Kovana e galuega ai. O le matagaluga lea ua tofia o ia e ta’ita’i ai, e sulufa’i uma atu i ai le atunu’u mo galuega e tausi ai aiga, peita’i, ua tau faalufesasi lona mafaufau i le tele o faasea ua oo atu i lona Ofisa faasaga ia te ia.

Na faailoa e Vailoata i le molimau le tele fo’i o tusitusiga na oo atu ia te ia mai tagata e lagolagoina ma sapaia le faamoemoe o le tamaitai Faatonusili.

“O le fautuaga, ia tautuana ma oe le galuega, afai ae pasia oe, ia fai le faamaoni ma faailoa le alofa i tagata faigaluega. Aua e te faapito i se tagata se to’atasi. Aua e te faaitu’au a ia faalagolago i le Atua,” o le saunoaga lea a Vailoata.

Na faailoa e le sui mai le itumalo o Ituau, le afioga a Logoituau Mark Atafua lona faanoanoa i le auala na oo atu ai tusitusiga e faatatau i le molimau i totonu o le Maota. Na ia faailoa atili i le tamaitai faatonusili, o tusitusiga na aumai, o loo taua ai na o viiviiga e faatatau ia te ia. Sa ia fautua i le molimau ina ia faatino ana galuega ma le alofa.

Na fesiligia e le tamaitai faipule mai le itumalo o Fofo ia Andra Tereise Samoa agavaa o le tamaitai faatonusili o loo taua i luga o lana tusi talosaga. O nisi o galuega o loo taua ai e foliga mai e faatino faalua i le taimi e tasi. E le gata foi i lea, e le o ni taimi uumi lea o loo faailoa mai i le tusi talosaga na galue ai le tamaitai faatonusili i se galuega ona siitia ese fo’i lea.

Na faamanino e Pulou Alaimalo e faapea, talu ai le fesuisuia’i o nofoaga e siitia i ai lona to’alua ao tautua ai i le malo, o le mafua’aga fo’i lea o le pupuu ai o taimi o loo taua i lana tusi talosaga e mafai ona galue ai i lea nofoaga ma lea nofoaga.

Mo se faataitaiga e i ai le taimi e na o le 4 masina ai le umi e faiaoga ai i se aoga i le nofoaga lea ua siitia i ai lo latou aiga, ae afai fo’i e toe siitia i se isi fo’i nofoaga ona o le galuega a lona to’alua i totonu o vaega ‘au a le malo tele, ona faamuta fo’i lea o lana tautua i lea galuega ae siitia o ia.

E mafua ona galue i galuega eseese nei i tua e pei ona saunoa le tamaitai faatonusili, e le gata e fesoasoani ai i le tau atina’eina o le la aiga, ae maua ai fo’i ma le avanoa e fesoasoani mai ai i le atina’eina o lona aiga i Amerika Samoa nei.

Saunoa le afioga a Samoa e faapea, sa i ai se mataupu na lagona ai lava lona faanoanoa faasaga i suiga ua ia faia, lea ua aafia ai se tasi o tagata faigaluega sa pito sili ona lelei ma faamoemoeina i le galuega.

Mo se faataitaiga e pei ona saunoa Samoa, sa i ai se Tina mai lona itumalo ua silia i le 40 tausaga o galue i le matagaluega, a o lea ua malolo ritaea nei o ia. Sa aoaoina ma koleni e le Tina lea se tasi o tamaitai faigaluega ina ia mafai ai ona avea le tamaitai faigaluega ma se tasi o tagata e faamoemoeina i le galuega. 

Peita’i o le faafitauli ua tula’i mai, ina ua tofia Pulou Alaimalo e avea ma ta’ita’i, na ia faia ai loa suiga tetee i totonu o le matagaluega, ma ua le toe galue ai lea tamaita’i. E le i manatu Samoa e tali le tamaitai faatonusili i lana fesili, pau lana fautuaga, soo se taimi na te faia ai ni faaiuga poo ni suiga, ia faia ma le alofa ina ia aua ne’i aafia ai tagata faigaluega.

Saunoa le afioga i le Faipule mai Manu’a #1 ia Alumamalu Filoiali’i Ale e faapea, soo se tagata faigaluega lava e tofia mai i totonu o se matagaluega, o loo tele lona silafia i auala e faatino ai lea matagaluega. Sa ia taua lona lagolagoina o le filifilia o le tamaitai faatonu e le Kovana e fai ma ta’ita’i, e le gata ua lava lona silafia i le galuega ae maualuga fo’i lona soifua a’oa’oina.

O le isi mataupu na fesiligia i le taimi o le iloiloga, o le faaiuga a le Kovana ia Lemanu P. S. Mauga e toe faafo’i i tua siitaga o totogi o tagata faigaluega, atoa ai ma suiga i tulaga ma tofiga talu mai le 2019.

Saunoa le afioga i le ali’i faipule ia Vailuama Steve Leasiolagi e faapea, na te le lagolagoina le faaiuga a le kovana e toe faafo’i ai totogi o tagata faigaluega sa faia talu mai le 2019, ona o totogi uma o tagat faigaluega nei o loo i totonu o le paketi ma le Tala Faatatau o le Tupe na pasia mo le Tausaga Tupe lenei 2021.

Na faailoa atili e Vailiuama i le molimau e faapea, o faamatalaga ua oo mai ia te ia, e ui i le to’atele o tagata faigaluega i totonu o le matagaluega na aafia i suiga o siitaga o totogi, ae ina ua faia le faaiuga e toe faafo’i uma i tua siitaga o totogi, e na o tagata lava e latalata i le Faatonusili e lei toe faafoia i tua a latou totogi, ae o isi uma tagata faigaluega e le lagolagoina o ia, na aafia uma i latou i le toe faafo’i i tua o totogi.

Saunoa le tamaitai faatonusili e faapea, o le poloaiga lava e aumai i le Kovana e fai, o le mea lena e usita’i i ai.

Ina ua fesiligia o ia poo ia mauaina le totogi o le Faatonusili sa i ai muamua, na tali le molimau, “o lea lava.”

Saunoa Vailiuama e faapea, na mafua ona maualuga le totogi o le Faatonusili sa i ai muamua i le Ofisa, ona sa faaopoopo atu i ai ma le isi galuega na te tauaveina, o le faagaioina lea o le totogi o tagata faigaluega a le malo. Ae talu ai ua toe faafo’i e le kovana lea auaunaga i le Ofisa o le Tupe, o le mea lea na te talitonuina ai le le tatau lea ona tumau pea le totogi i le tulaga sa i ai.

Na faamanino e le tamaitai faatonusili e faapea, o le poloaiga e toe faafo’i ai i tua totogi tagata faigaluega, e faavae mai i luga o le faaiuga a le kovana. E i ai siitaga o totogi sa faia e le tusa ma ala o le tulafono, o siitaga la ia ua faatonuina e le kovana e toe faafo’i i tua.

Sa ia taua atili fo’i e faapea, o nisi o totogi e tatau ona agavaa mo siitaga o alo ma fanau o le atunuu o loo ta’i $10,000 ma le ta’i $11,000, lea ua tatau ona oo atui le $12,000 ma luga atu i le tausaga.