Ads by Google Ads by Google

Fesiligia e Leoleo tagata faigaluega a le Ofisa o le Litaea


[ata: foa'i]
ausage@samoanews.com

Pago Pago, AMERIKA SAMOA

 

O le vaega 2 o le ripoti e fa’atatau i le tagi a le malo lea ua toe faila faasaga i le alii sa avea ma Pulesili o le Ofisa o le Litaea a le malo o Amerika Samoa, o lo o aofia ai ma faatalatalanoaga a Leoleo Suesue faatasi ai ma tagata faigaluega a le Ofisa o le Litaea, lea ua avea nei ma molimau o lenei mataupu.

 

O le susuga a Luatua Filisouaiga Taafua, lea o loo tatala i tua ina ua mae’a ona ia totogi le $35,000 sa fa’atulaga e tatala ai o ia i tua, o loo molia i moliaga e 28, lea e aofia ai moliaga e 14 o le gaoi atoa ai ma moliaga e 14 o le ave faagaoi o oloa sa tuuina atu i lalo o lana vaavaaiga.

 

O molimau na fesiligia e Leoleo e aofia ai le afioga a Fanene  Scanlan ua tuumalo, o ia fo’i lea sa avea ma Ta’ita’ifono o le Komiti Faafoe o le Litaea, ma tagata faigaluega e to’alua a le Ofisa o le Litaea o loo faaigoaina ia CW ma CM i totonu o le tagi tusitusia a le malo e uiga i lenei mataupu.

 

O le aso 27 o Iulai 2015 na fesiligia ai e Leoleo le ulua’i molimau ia CW, ma ia faailoa ai i Leoleo le faatonu lea e Luatua o alii faigaluega a le Ofisa o le Litaea ia CM ina ia saunia ma tusia siaki mo kamupani pepelo e 2 sa faia e Luatua, ma ia totogi mai nei siaki tupe i lalo o le Teugatupe a le Ofisa o le Litaea o loo faaagaaga mo galuega faatino atoa ai ma totogi o tagata faigaluega a le Ofisa (Administrative Account).

 

Na taua atili e CW i Leoleo le saini e le ua molia o siaki uma na saunia mo kamupani pepelo e 2 na ia faatula’i, atoa ai ma lona fa’aaoga faamalosi o le saini a le afioga a Fanene. Na taua atili e CW i Leoleo, e le i silafia e Fanene taimi uma na fa’aaoga ai e Luatua lana saini o loo faapipi’i i le rubber stamp ina ia atagia atu ai lona faatagaina o se siaki e fa’aaoga.

 

O le aso 5 o Aokuso o le 2015 na fesiligia ai e Leoleo le molimau lona lua, le susuga a CM e uiga i kamupani pepelo na faia e Luatua ina ia faa faigofie ai ona totogi atu tupe mo galuega fa’atino.

 

Na taua e CM i Leoleo Suesue e faapea, o siaki uma lava sa ia saunia e tusa ai o le faatonuga a Luatua, na faavae mai lea i luga o invoices na avatu e se tagata faigaluega a nei kamupani e 2.

 

Ae ina ua fesiligia e Su’etusi mai fafo ia CM e uiga i lenei mataupu, na toe suia ai lana tali ma ia ta’utino ai loa, o ia lava na saunia ma tapenaina invoices sa faavae ai i luga le aofa’i o le siaki e totogi atu i le kamupani. O ia invoices uma na ia faia lea i lalo o se faatonuga mai le susuga a Luatua. Ina ua mae’a ona sainia le siaki muamua, na alu ai loa CM e tala mai le siaki i lalo o le Faletupe o Hawaii, peita’i e le i mafai ona ia talaina le ulua’i siaki, ona e le o i ai sona igoa i luga o le siaki poo le kamupani fo’i e ana le siaki.

 

Na faataga e le ua molia ia CM e tuu lona igoa i luga o le siaki ina ia faa faigofie ai ona tala, ma mafai ai loa ona ia talaina le siaki mai le Faletupe a Hawaii. O le tele o siaki na sainia ma faamaonia e le ua molia, sa tala ma toe toe ai lava i le taimi lava lea e tasi i totonu o le teugatupe a Luatua.

 

Na faamanino atili e CM i Leoleo Suesue e faapea, e leai ni konekerate sa faia i le va o le Ofisa o le Litaea a le malo ma kamupani tua e 2 lea sa masani ona saini aga’i i ai siaki tupe e pei o le kamupani a le Hardcore Cleaning Service (HCS) ma le Star Company (SC), o ia fo’i kamupani, e le o ni kamupani moni, ae o kamupani pepelo na tapena lava e le ua molia ina ia faa faigofie ai ona totogi atu vaega tupe, o ia lava fo’i lea sa pulea ia kamupani pepelo e 2.

 

O le vaiaso na sosoo ai i le aso 12 o Aokuso, 2015, na fesiligia ai loa e Leoleo le afioga a Fanene e tusa ai o lenei mataupu, aemaise ai lava le fa’aaoga faamalosi e Luatua o lana saini o loo i lugao le rubber stamp e faalua ai saini i luga o le siaki uma e ova atu ma le $250.

 

Na taua e Fanene i Leoleo Suesue, na te le i faatagaina lava Luatua na te fa’aaogaina lana saini i luga o le rubber stamp e faamaonia ai ni siaki na ave aga’i i kamupani ia e 2 o le HCS ma le SC. Sa ia taua atili e faapea, o siaki uma lava pe tusa ma le 8 na savatu na te sainia ae na ia toe faafoia ona e i ai vaega e le i sao ona faia.

 

Na taua atili e Fanene i Leoleo le i ai o le taimi na faailoa atu ai e CM ia te ia, le fa’aaoga faasolitulafono lea e Luatua o lana saini mai le rubber stamp e faalua ai saini i luga o siaki a le Ofisa o le Litaea. Ina ua fesiligia e Fanene ia Luatua e uiga i lona fa’aaoga o lana saini i luga o le rubber stamp peitai na faailoa atu e Luatua ia te ia, o le faiga masani lava lea ua leva ona sau ai le Ofisa mai le tele o tausaga ua te’a aemaise lava pe afai e saini ni siaki tetele.

 

I le va o le aso 8 o Ianuari e oo atu i le aso 16 o Iuni o le tausaga e 2015, e fitu (7) siaki na saini e le ua molia mo le kamupani lona 3 sa ia fausia e igoa o le Filiga Electronic Company (FEC) i le aofa’i e $3,095. O nei siaki uma sa tala mai i teugatupe a le Ofisa o le Litaea ona toe teu lea e le ua molia i totonu o lana teugatupe.

 

O le aso 14 o Setema o le tausaga lava lea 2015 na toe fesiligia ai e Leoleo Suesue le susuga a CM e faatatau i le tagata e suafa ia Fialoa. Na taua e CM e faapea, o le susuga a Fialoa, sa galue i le kamupani sa faaleleia le Fale Atoa o le Litaea i Utulei, e aofia ai ma le toe faaleleia o le lifi e feoa’i ai tagata i totonu o le fale o le Centennial Building i Utulei. Ae talu ai ua maea ona faailoa e Fialoa ia CM le auala e seki ai ki o le masini lifi pe afai ae faaletonu, o le mafuaa’aga lea na manatu ai loa Luatua e taofia le toe faia e Fialoa o galuega faa konekerate mo le faaleleia o le fale atoa ae fausia loa ana kamupani pepelo ina ia ona maua ai lea vaega tupe.

 

Na faamaonia e le Matagaluega o Fefaatauaiga a le malo (DOC) i Leoleo Suesue, e leai ni faamaaoniga e iloa ai o kamupani nei e tolu o le FEC, HCS and SC uma maea ona lesitalaina faaletulafono i totonu o Asosi Pisinisi i le atunu’u. O invoices uma lava na tapena mai ai siaki na totogi atu i pisinisi pepelo nei, o gaioiga uma lava na faatinoina e le ua molia.

 

O le aso 7 o Fepuari 2019 na solofua ai e le afioga i le ali’i Faamasino ia Elvis P. Patea le ulua’i tagi sa faila faasaga ia Luatua, ina ua talia le talosaga a le malo e solofua ai lenei tagi e aunoa ma se masalosaloga tatau. O le uiga o lea faaiuga, ua solofua le tagi faasaga ia Luatua ae i ai le avanoa o le malo latou te toe failaina ai le tagi lava lenei faasaga ia Luatua.

 

Na taua e le loia a le malo sa finauina lea talosaga i le Samoa News, ua mafua ona talosaga le malo ina ia solofua le tagi faasaga ia Luatua o le molimau autu o lenei mataupu na fuafua e malaga i fafo mo ona togafitiga.

 

E silia i le $112,000 le vaega tupe na taua e le malo i le latou ulua’i tagi na fa’aaoga faagaoi e le ua molia.